រាជធានីភ្នំពេញ ៖ សេចក្តីរាយការណ៍បឋមឱ្យដឹងថា បុរសជាចុងភៅម្នាក់ត្រូវបានក្រុមចោរ៤នាក់ជិះម៉ូតូ២គ្រឿង ប្រដាប់ដោយកាំភ្លើងជិះដេញតាមស្ទាក់ផ្លូវ និងបាញ់៣គ្រាប់ គំរាមប្លន់យកម៉ូតូម៉ាកហុងដាឌ្រីម ស៊េរី២០១៨មួយគ្រឿងបានសម្រេច និងជិះគេចខ្លួនដោយសុវត្តិភាព ។ ទោះបីជាយ៉ាងណា ការផ្ទុះអាវុធនេះពុំបណ្តាលឱ្យបុរសជាម្ចាស់ម៉ូតូរងរបួសនោះទេ ។
ហេតុការណ៍នេះ កើតឡើងកាលពីវេលាម៉ោងប្រមាណ១២និង៣០នាទីរំលងអធ្រាត្រ ចូលថ្ងៃតី២០ សីហា ស្ថិតនៅតាមហាវិថី សេនាប្រមុខគឹម អ៊ីលស៊ុង មុខ សាលាបឋមសិក្សាទួលគោក ហៅសាលាពៅអ៊ំ ក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ ។
សេចក្តីរាយការណ៍បន្តថា បុរសម្ចាស់ម៉ូតូរងគ្រោះឈ្មោះ ធី ថាន អាយុ២៥ឆ្នាំ ជាចុងភៅភោជនីយដ្ឋាន តុង ហ្វាយៀន មានលំនៅផ្ទះលេខ ៣០ផ្លូវ ២៨៩សង្កាត់បឹងកកក់ទី១ខណ្ឌទួលគោក ។ រីឯម៉ូតូដែលដែលត្រូវក្រុមចោរប្លន់ម៉ាកហុងដាឌ្រីម ពណ៌ខ្មៅ សេរី២០១៨ ពាក់ស្លាកលេខកំពង់ចាម១R-៧៧២៦ ។
តាមព័ត៌មានឱ្យដឹងថា មុនពេលកើតហេតុជនរងគ្រោះកំពុងធ្វើដំណើរចេញពីហាងគោលបំណង ដោយជួនប្អូនប្រុសធ្វើដំណើរទៅផ្ទះ ។ ស្រាប់តែមានជនសង្ស័យ៤នាក់ជិះម៉ូតូ២គ្រឿងបានមកដល់តាមពីក្រោយ និង បានប្រើល្បិចជាស្រែកបបួលវាយគ្នា ។ ដោយមានការភ័យខ្លាច ជនរងគ្រោះបានជិះម៉ូតូត្រឡប់ក្រោយ មកហាងវិញ ស្ថិតនៅមុខសាលាបឋមសិក្សាទួលគោក ហើយត្រូវក្រុមជនសង្ស័យជិះម៉ូតូដេញតាមស្ទាក់ផ្លូវ ភ្ជង់និងបាញ់៣គ្រាប់និងប្លន់យកម៉ូតូជិះគេចខ្លួនបានសម្រេច ។
នៅយប់នោះ ហេតុការណនេះបានបង្កភ្ញាក់ផ្អើលយ៉ាងខ្លាំង ហើយជនរងគ្រោះក៏បានមកដាក់ពាក្យបណ្តឹង នៅសមត្ថកិច្ចមូលដ្ឋានបានចុះទៅស្រាវជ្រាវផងដែរ ។ តាមព័ត៌មានថា នៅកន្លែងកើតហេតុ មានបំពាក់
កាម៉េរាជាច្រើន ។ តាមរយៈកាមេរ៉ាសុវត្ថិភាព បើសិនជាមានការស្រាវជ្រាវ ជនសង្ស័យទាំងនោះ ច្បាស់ជាមិនរួចខ្លួននោះទេ ។
ចែករំលែកព័តមាននេះ