ខេត្តព្រះសីហនុ ៖ រថយន្តមួយគ្រឿងបើកគេចជង្ហុកក៏រេចង្កូតក្រឡាប់ បណ្តាលឱ្យអ្នកជិះក្នុងរថយន្តនោះរងរបួសធ្ងន់ស្រាលច្រើននាក់ ។ ហេតុការណ៍នេះបានកើតឡើងនាវេលាម៉ោង៧និង៣០នាទីព្រឹកថ្ងៃទី១៩ ខែសីហា ឆ្នាំ២០១៨ ស្ថិតនៅផ្លូវជាតិលេខ៤ ត្រង់ចំណុចមុខក្លោងទ្វារវត្តភ្នំពេជ្រ ស្ថិតក្នុងភូមិអូរតាប៉ាង ឃុំអូរឧកញ៉ាហេង ស្រុកព្រៃនប់ ។
ជនរងគ្រោះក្នុងហេតុការណ៍គ្រោះថ្នាក់ខាងលើរួមមាន ៖ អ្នកបើកបររថយន្តឈ្មោះ សែ អិត ភេទប្រុស អាយុ៣៣ឆ្នាំ មានទីលំនៅខេត្តកំពត រងរបួសស្រាល ចំណែកអ្នករួមដំណើរ ៖ ១-ឈ្មោះ ម៉ូត អុីរ៉ន ភេទប្រុស អាយុ១៥ឆ្នាំ ជនជាតិខ្មែរអ៊ិស្លាម ជាសិស្ស មានទីលំនៅភូមិព្រែកទាល់ឃុំទឹកល្អក់ ស្រុកព្រៃនប់ ខេត្តព្រះសីហនុ បានរងរបួសធ្ងន់ ២-ឈ្មោះ រី ហ្វីន ភេទប្រុស អាយុ២១ឆ្នាំ ជនជាតិខ្មែរអ៊ិស្លាម ជាសិស្ស មានទីលំនៅឃុំនរាណ៍ ស្រុករតនៈ ខេត្តបាត់ដំបង បានរងរបួសធ្ងន់ ៣-ឈ្មោះ ឡៃ ពី ភេទប្រុស អាយុ១៧ឆ្នាំ ជនជាតិខ្មែរអ៊ិស្លាម ជាសិស្ស មានទីលំនៅភូមិអូរជ្រៅ ឃុំអូរជ្រៅ ស្រុកព្រៃនប់ ខេត្តព្រះសីហនុ បានរងរបួសធ្ងន់ ៤-ឈ្មោះ អ៊ែល សូលេះ ភេទប្រុស អាយុ១៤ឆ្នាំ ជនជាតិខ្មែរអ៊ិស្លាម ជាសិស្ស មានទីលំនៅភូមិទួលទទឹង៣ ឃុំទួលទទឹង ស្រុកព្រៃនប់ ខេត្តព្រះសីហនុ បានរងរបួសធ្ងន់ និង៥-ឈ្មោះ អ៊ូ ម៉ល ភេទប្រុសអាយុ២០ឆ្នាំ ជនជាតិខ្មែរអ៊ិស្លាម ជាសិស្ស មានទីលំនៅរាជធានីភ្នំពេញ បានរងរបួសធ្ងន់ ។
ប្រភពព័ត៌មានបានឱ្យដឹងថា ហេតុការណ៍គ្រោះថ្នាក់ខាងលើដែលបង្កឡើងដោយខ្លួនឯងនេះគឺរថយន្តមួយគ្រឿងម៉ាកហ៊ីយ៉ាន់ដាយ (ច្នៃ) ក្បាលពណ៌ក្រហម ពាក់ស្លាកលេខ ធ ៤០៣៤ ភព២ ធ្វើដំណើរក្នុងទិសដៅពីខេត្តព្រះសីហនុទៅភ្នំពេញ លុះមកដល់ចំណុចកើតហេតុខាងលើ រថយន្តបានបើកគេចជង្ហុកក៏រេចង្កូតក្រឡាប់តែម្តង បណ្តាលឱ្យអ្នកបើកបរម្នាក់រងរបួសស្រាល ចំណែកអ្នករួមដំណើរចំនួន៥នាក់ទៀតបានរងរបួសធ្ងន់ ។ ក្រោយកើតហេតុ អ្នករងរបួសទាំងអស់ត្រូវបានបញ្ជូនទៅសង្គ្រោះនៅគ្លីនិកឯកជនមួយកន្លែង៕
ចែករំលែកព័តមាននេះ