ខេត្តព្រះសីហនុ ៖ ជនសង្ស័យ២ក្រុមមានគ្នាចំនួន៤នាក់ជំនាញខាងឆក់ច្រើនលើក ពេលនេះត្រូវបានជាប់អន្ទាក់សមត្ថកិច្ចនគរបាលខេត្តព្រះសីហនុ បន្ទាប់ពីពួកគេបានធ្វើសកម្មភាពឆក់ជនជាតិចិនក្នុងថ្ងៃតែមួយនៅ២ទីតាំងផ្សេងគ្នា។ លោកវរសេនីយ៍ទោ ស៊ុត សំអ៊ុន នាយការិយាល័យព្រហ្មទណ្ឌកំរិតស្រាល បានគូសបញ្ចាក់ថា…
ខេត្តព្រះសីហនុ ៖ ជនសង្ស័យ២ក្រុមមានគ្នាចំនួន៤នាក់ជំនាញខាងឆក់ច្រើនលើក ពេលនេះត្រូវបានជាប់អន្ទាក់សមត្ថកិច្ចនគរបាលខេត្តព្រះសីហនុ បន្ទាប់ពីពួកគេបានធ្វើសកម្មភាពឆក់ជនជាតិចិនក្នុងថ្ងៃតែមួយនៅ២ទីតាំងផ្សេងគ្នា។
លោកវរសេនីយ៍ទោ ស៊ុត សំអ៊ុន នាយការិយាល័យព្រហ្មទណ្ឌកំរិតស្រាល បានគូសបញ្ចាក់ថា ដោយមានកិច្ចសហការរវាងស្នងការដ្ឋាននគរបាលខេត្តព្រះសីហនុ និងខេត្តកំពតក្នុងការស្រាវជ្រាវករណីលួចមានស្ថានទម្ងន់ទោស (ឆក់ជនជាតិចិន) នៅខេត្តព្រះសីហនុហើយរត់គេចខ្លួនទៅខេត្តកំពត កាលពីវេលាម៉ោង ៦ និង ៣០នាទី យប់ថ្ងៃទី១១ ខែសីហា ឆ្នាំ២០១៨ នៅចំណុច ឆ្នេរអូរត្រេះ ភូមិ៦ សង្កាត់៤ ក្រុង-ខេត្តព្រះសីហនុ មានករណីឆក់ជនជាតិចិនមួយកើតឡើង ដែលធ្វើសកម្មភាពដោយជនសង្ស័យចំនួន៣នាក់ មិនស្គាល់អត្តសញ្ញាណ ជិះម៉ូតូ១គ្រឿងមិនស្គាល់ម៉ាក ហើយធ្វើសកម្មភាពឆក់ជនជាតិចិនកំពុងដើរមានគ្នា៣នាក់ ហើយក្រុមជនសង្ស័យបានជិះម៉ូតូគេចខ្លួនបាត់ស្រមោល។
ប្រភពដដែលបានបន្តថា បន្ទាប់ពីទទួលបានព័ត៌មានខាងលើភ្លាម លោកឧត្តមសេនីយ៍ ជួន ណារិន ស្នងការនគរបាលខេត្តបានបញ្ជាកម្លាំងជំនាញផែននគរបាលព្រហ្មទណ្ឌធ្វើការស្រាវជ្រាវ រហូតដឹងថា ក្រុមជនសង្ស័យបានជិះម៉ូតូទៅខេត្តកំពត ។ ភ្លាមនោះកម្លាំងសមត្ថកិច្ចបានធ្វើការសហការជាមួយកម្លាំងជំនាញស្នងការដ្ឋាននគរបាលខេត្តកំពតចុះបង្ក្រាបបានតែម្តង ។
ជនរងគ្រោះជាជនជាតិចិនមិនត្រូវបានស្គាល់អត្តសញ្ញាណ ក្រោយពេលកើតហេតុ ជនរងគ្រោះមិនបានមកដាក់ពាក្យបណ្តឹងឡើយ ។ ចំណែកជនសង្ស័យទាំង៤នាក់រួមមាន ១-ឈ្មោះ កប ផានិត ភេទប្រុស អាយុ១៦ឆ្នាំ មុខរបរកម្មករសំណង់ មានទីលំនៅភូមិល្អាង ឃុំល្អាង ស្រុកដងទង់ ខេត្តកំពត ២-ឈ្មោះ កេង ណា
រ័ត្ន ភេទប្រុស អាយុ១៧ឆ្នាំ មុខរបរជាងពិដាន មានទីលំនៅភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប ៣-ឈ្មោះ ប៉ាញ ក្តៀង ភេទប្រុស អាយុ២៥ឆ្នាំ មុខរបរជាងថ្នាំ មានទីលំនៅភូមិ៣ សង្កាត់៣ ក្រុងកំពត ខេត្តកំពត និង៤-ឈ្មោះ សុខ ឆេន ភេទប្រុស អាយុ១៨ឆ្នាំ មុខរបរជាងដែក មានទីលំនៅមិនពិតប្រាកដ។ ក្នុងនោះសមត្ថកិច្ចដកហូតបានសម្ភាររួមមាន ទូរស័ព្ទដៃចំនួន៩គ្រឿង និងម៉ូតូចំនួន២គ្រឿង ក្នុងនោះមួយគ្រឿងពណ៌ក្រហម និងមួយគ្រឿងទៀតម៉ាក ZOOMER X (ជាមធ្យោបាយធ្វើសកម្មភាព ) ។
បច្ចុប្បន្ន ជនសង្ស័យទាំង៤នាក់ខាងលើត្រូវបានកម្លាំងជំនាញការិយាល័យនគរបាលព្រហ្មទណ្ឌកម្រិតស្រាលបញ្ជូនទៅកាន់សាលាដំបូងខេត្ត ដើម្បីចាត់ទៅតាមនីតិវិធីច្បាប់នៅរសៀលថ្ងៃទី១៣ ខែសីហា ឆ្នាំ២០១៨នេះផងដែរ៕
ចែករំលែកព័តមាននេះ