រាជធានីភ្នំពេញ ៖ ចូលចិត្តដើរទិញឥវ៉ាន់នៅក្រៅប្រទេសមែនអត់? អញ្ចឹងតើអ្នកដឹងទេថា អ្នកអាចរកលុយបានមកវិញ (VAT Refund) សម្រាប់ការទិញ ឥវ៉ាន់តាមហាង និងទីផ្សារទំនើបនានានៅក្រៅប្រទេស ដូចជា ថៃ សិង្ហបូរី ឬគ្រប់ប្រទេសអឺរ៉ុប?
អ្នកនាង ទេវី ដែលបានធ្វើដំណើរទៅក្រៅប្រទេសជាច្រើន ដូចជាសិង្ហបុរី ថៃ អូស្ត្រាលី និងបណ្តាប្រទេសជាច្រើនទៀតនៅអឺរ៉ុប និងតែងតែជាវឥវ៉ាន់មកស្រុកកំណើតវិញ បានចែករំលែកនូវព័ត៌មាននិងគន្លឹះសំខាន់ៗមួយចំនួន អំពីរបៀបដើម្បីទាមទារអ្វីដែលជារបស់អ្នក (VAT Refund) នៅក្នុងប្រទេសមួយចំនួនដែលលោកអ្នកបានជាវឥវ៉ាន់ ៖
១- យកលិខិតឆ្លងដែនទៅជាមួយពេលទៅទិញឥវ៉ាន់ ៖ សួរអ្នកលក់ឲ្យភ្ជាប់ឲ្យអ្នកជាមួយឯកសារដែលអ្នកត្រូវការ ហើយត្រូវឲ្យអ្នកលក់បំពេញឯកសារនោះផងដែរ។
២ – រក្សាទុកវិក្កយបត្រ និងទំរង់នានា ៖ អ្នកត្រូវមានឯកសារ និងវិក្កយបត្រទាំងអស់ដែលបានទិញឥវ៉ាន និងឯកសារសារដែលបានបំពេញ រៀបរាប់ពីមុខទំនិញដែលបានជាវ ដើម្បីបង្ហាញនៅចំពោះមុខមន្ត្រីគយមុននឹងធ្វើដំណើរត្រឡប់ទៅផ្ទះវិញហើយអ្នកត្រូវប្រាកដថា មន្ត្រីគយបានវាយត្រាចុះបញ្ជីឯកសារឲ្យអ្នកបានត្រឹមត្រូវ ។
៣- យកលុយរបស់អ្នកត្រឡប់មកវិញ ៖ ត្រង់ចំណុចនេះ គឺមានលក្ខណៈផ្សេងៗពីគ្នាពីប្រទេសមួយទៅប្រទេសមួយ។ ដូច្នេះអ្នកត្រូវសួរព័ត៌មានពីអ្នកលក់ផងដែរថា តើនៅផ្សារទំនើបដែលអ្នកកំពុងតែជាវឥវ៉ាន់ មានបញ្ជរមន្ត្រីគយដែលអ្នកអាចទារលុយបានមកវិញនៅផ្សារតែម្តង ឬយ៉ាងណា?
បើសិនជាមិនមានទេ លោកអ្នកអាចប្រតិបត្តិការក្នុងការទារលុយពន្ធមកវិញ (VAT Refund) នៅព្រលានយន្តហោះ ។
អ្នកនាង ទេវី បានផ្តាំផ្ញើថា ដោយសារតែបែបបទនៃការយកលុយមកវិញនៃទំនិញដែលបានជាវមានការប្រែប្រួលខុសពីមុន ដែលមានន័យថា មន្ត្រីដែលទទួលបន្ទុក គឺតែងតែទាមទារឲ្យលោកអ្នកបង្ហាញទំនិញដែលបានជាវឲ្យគេបានឃើញផ្ទាល់ភ្នែក ។
អ្នកនាង ទេវី មានប្រសាសន៍បញ្ជាក់ថា៖ «ដូច្នេះសំខាន់បំផុត បើសិនជាអ្នកត្រូវទាមយកប្រាក់ពន្ធមកវិញ ពីការជាវឥវ៉ាន់នៅក្រៅប្រទេស អ្នកត្រូវតែយកឥវ៉ាន់ដែលបានទិញនៅផ្សារទាំងអស់ ដូចជាកាប៉ូបដៃ ខ្សែក្រវ៉ាត់ ទូរស័ព្ទ ឬក៏កុំព្យូទ័រ និងឥវ៉ាន់ផ្សេងៗទៀត ដាក់តាមខ្លួនក្នុងវ៉ាលិសតែមួយបានហើយ ព្រោះពេលបច្ចុប្បន្ននេះសឹងតែគ្រប់មន្ត្រីគយនឹងទាមទារមើលឥវ៉ាន់ជាក់ស្តែងតែម្តង ។
ដូច្នេះដើម្បីកុំឲ្យលោកអ្នកខាតបង់មិនអាចទារលុយពន្ធបានមកវិញ គឺលោកអ្នកគួរតែរៀបចំឥវ៉ាន់ដែលបានទិញទាំងអស់នោះក្នុងវ៉ាលិសតែមួយ ដើម្បីងាយស្រួលបង្ហាញទៅមន្ត្រីគយត្រួតពិនិត្យមុនពេលគេសម្រេចប្រគល់លុយពន្ធមកឲ្យលោកអ្នកវិញ»៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ