ខេត្តសៀមរាប ៖ គ្រញូងមួយដើមដែលគេអះអាងថា មានតម្លៃរាប់ម៉ឺនដុល្លារនៅក្នុងតំបន់រមណីយដ្ឋានអង្គរ ដែលកាន់កាប់ដោយអាជ្ញាធរជាតិអប្សរានោះ ត្រូវបានជនមិនស្គាល់មុខលួចចូលមកកាប់ជាលើកទី២ បើកុំតែបានអ្នកភូមិឃើញទាន់ កុំអីឈ្មួញដឹកយកទៅលក់បាត់ទៅហើយ ។
ការលួចកាប់ដើមគ្រញូងនេះ ត្រូវបានគេសង្ស័យថា បើចោរក្នុងមិនឱ្យដៃ ចោរក្រៅក៏មិនហ៊ានដែរ បានកើតឡើងនៅយប់ថ្ងៃទី៨ សីហា ស្ថិតក្នុងភូមិសាស្ដ្រភូមិគោកតាចាន់ សង្កាត់គោកចក ក្រុងសៀមរាប ហើយត្រូវបានអ្នកភូមិជូនដំណឹងភ្លាមៗទៅ អាជ្ញាធរមូលដ្ឋាននិងអាជ្ញាធរជាតិអប្សរា ដើម្បីអន្តរាគមន៍ និងទប់ស្កាត់មិនឱ្យមានការដឹកជញ្ជូនចេញបាន ប៉ុន្តែបានកាប់ផ្តួលទៅហើយ ។
មហាជនចោទសួរថា តើបាត់មន្ត្រីអប្សារាទៅណាអស់ ព្រោះពួកគាត់នៅយាម២៤ម៉ោងលើ២៤ម៉ោង ក្នុងតំបន់នោះមិនឱ្យប្រជាពលរដ្ឋណាលួចធ្វើផ្ទះបាន ។ ចុះចោរចូលមកលួចកាត់ឈើគ្រញូងអីក៏ស្រួលម្ល៉េះ ម្តេចក៏អត់មានអ្នកណាម្នាក់ដឹងសោះ ។ ទើបបណ្តោយឱ្យមានរឿងនេះកើតឡើង និងទីបំផុតត្រឹមតែប្រមូលយកសាកសពដើមឈើគ្រញូងសែងដាក់ឡានយកទៅរក្សាទុកតែប៉ុណ្ណោះ ។
បើតាមការបញ្ជាក់របស់លោក ស៊ិន ពិសី បុគ្គលិកនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរា បានឱ្យដឹងថា បន្ទាប់ពីមានការសម្របសម្រួលពីភាគីពាក់ព័ន្ធ ដើមគ្រញូងដែលគេលួចកាប់នោះ បានយកទៅរក្សាទុកនៅស្នាក់ការតំបន់ការពារឧទ្យានអង្គរនៅថ្ងៃទី១០ ខែសីហា ។ លោករំលឹកថា ក្រោយដឹងហេតុការណ៍នៅយប់ថ្ងៃទី៨ សីហានោះមក ភាគីពាក់ព័ន្ធបានសហការយ៉ាងយកចិត្តទុកដាក់ ដោយបានប្រើកម្លាំងយាមល្បាតជាប់រហូត ព្រោះបារម្ភខ្លាចក្រុមជនខិលខូចចូលមកដឹកជញ្ជូនឈើដែលកាប់រួចហើយនេះ ។
លោកបានបន្តថា គ្រញូងដែលត្រូវគេលួចកាប់នោះមានទំហំមិនធំប៉ុន្មានទេ គឺមានមុខកាត់ជិត៤តឹក និងបណ្តោយជាង១០ម៉ែត្រ ។ លោកបន្ថែមថា ភូមិសាស្ដ្រដែលជនមិនស្គាល់មុខលួចកាប់នោះ គឺចុះពីផ្លូវកៅស៊ូប្រមាណ១០ម៉ែត្រប៉ុណ្ណោះ តែវានៅដាច់ឆ្ងាយពីផ្ទះអ្នកភូមិបន្ដិច ណាមួយវេលាយប់ដែលគេលួចកាត់នោះ មានភ្លៀងធ្លាក់ពេញមួយយប់ផងដែរ ដែលជាឱកាសសម្រាប់ក្រុមចោរទាំងនោះ ។
ជុំវិញករណីខាងលើ លោក ឡុង កុសល អ្នកនាំពាក្យនៃអាជ្ញាធរជាតិអប្សរាបានប្រាប់កោះសន្តិភាពតាមទូរស័ព្ទនៅវេលាម៉ោង៩និង៣០នាទីថ្ងៃទី១២ សីហា ថា ករណីចោរលួចកាត់ឈើគ្រញូងនៅក្នុងតំបន់អង្គរនោះ ក្រោយទទួលបានដំណឹងពីអាជ្ញាធរមូលដ្ឋានភ្លាម អាជ្ញាធរជាតិអប្សរា បានធ្វើការយ៉ាងជិតស្និទ្ធជាមួយមន្ទីរបរិស្ថានខេត្តសៀមរាប និងសមត្ថកិច្ចនគរបាលមូលដ្ឋាន, សមត្ថកិច្ចនគរបាលបេតិកភ័ណ្ឌ បានសម្រេចដកហូត ហើយកាត់ជាកង់ៗ រួចដឹកជញ្ជូនឈើគ្រញូង ដែលចោរកាប់ផ្ទួល មករក្សាទុកនៅទីមានសុវត្ថិភាពហើយ ។ លោកបានបន្តថា បច្ចុប្បន្នអាជ្ញាធរជាតិអប្សរា បានសហការជាមួយសមត្ថកិច្ចជំនាញ ដើម្បីធ្វើការស្រាវជ្រាវបន្ត ដើម្បីចាប់ជនល្មើសយកមកផ្តន្ទាទោសទៅតាមផ្លូវច្បាប់ឱ្យខាងតែបាន ។
គួរបញ្ជាក់ផងដែរថា ចោរដែលព្រហើនហ៊ានចូលលួចកាប់ដើមគ្រញូងមានតម្លៃនៅក្នុងតំបន់អង្គរគឺជាលើកទី២ហើយ ដែលលើកទី១ បានធ្វើឱ្យអគ្គនាយករងម្នាក់ និងមន្ត្រីខ្លះនៃអាជ្ញាធរជាតិអប្សរាបានក្លាយជាជនជាប់ចោទរហូតមានការចោទប្រកាន់តាមផ្លូវច្បាប់ និងឃុំខ្លួននៅពន្ធនាគារផងដែរ ។ ឯលើកទី២នេះ មិនដឹងថាតើនរណាជាអ្នកទទួលខុសត្រូវ និងតើនរណាថ្លើមធំដល់ម្លុឹង ?
ចែករំលែកព័តមាននេះ