រាជធានីភ្នំពេញ ៖ ជនសង្ស័យចំនួន២នាក់ត្រូវបាននារីជនជាតិចិន២នាក់បានបើករថយន្តដេញបំបុកផ្ទុបនឹងរបងផ្ទះប្រជាពលរដ្ឋបណ្តាលអោយរងរបួសធ្ងន់បន្ទាប់ពីជនសង្ស័យទាំង២នាក់នោះ បានធ្វើសកម្មភាពឆក់យកទូរស័ព្ទរបស់គាត់នៅពេលដែលពួកគាត់បើកកញ្ចក់រថយន្តនិយាយទូរស័ព្ទ ។
ហេតុការណ៍នេះដែរបានកើតឡើងនៅវេលាម៉ោង១និង៣០នាទីរំលងអធ្រាត្រឈានចូលថ្ងៃទី១៣ ខែសីហា ឆ្នាំ២០១៨ នៅចំណុចផ្លូវ១២៣ កែងនឹងផ្លូវ៤៥៦ ហើយឃាត់ខ្លួនបាននៅចំណុចផ្លូវ៤៥៤កែងនឹង១២៣ សង្កាត់ទួលទំពូង១ ខណ្ឌចំការមន ។
ជនសង្ស័យ និងជនរងគ្រោះមិនបានអោយស្គាល់អត្តសញ្ញាណនោះទេ គ្រាន់តែដឹងថា បុរសជាជនសង្ស័យជិះម៉ូតូម៉ាកស្កូបពី ពណ៌ស ពាក់ស្លាកលេខ ភ្នំពេញ 1CL-7241 ចំណែកនារីជនជាតិចិនជិះរថយន្តឡិចស៊ិស RX-300 ពណ៌ស ពាក់ស្លាកលេខ ភ្នំពេញ 2AN-9745 ។
តាមសម្តីអ្នកបកប្រែអោយជនរងគ្រោះដែលជាស្ត្រីជនជាតិ២នាក់បានអោយដឹងថា មុនពេលកើតហេតុរូបគាត់២នាក់(ស្ត្រីរងគ្រោះទាំង២)បានបើករថយន្តចេញពីហូបអាហារនៅជិតកន្លែងកើតហេតុគោលបំណងត្រលប់ទៅផ្ទះវិញនៅខណ្ឌសែនសុខ ។
ខណៈនោះពួកគាត់បានបើករថយន្តមកដល់ចំណុចផ្លូវ១២៣កែងនឹង៤៥៦ក៏បានឈប់រថយន្តបើកកញ្ចក់ហើយនិយាយទូរស័ព្ទ ស្រាប់តែមានបុរសជាជនសង្ស័យ២នាក់បានជិះម៉ូតូម៉ាកស្កូបពីមកធ្វើសកម្មភាពលូកដៃឆក់យកទូរស័ព្ទម៉ាក Meitu ដែលទិញតម្លៃជិត២ពាន់ដុល្លារបានសម្រេច ហើយព្យាយាមជិះម៉ូតូរត់គេចខ្លួន តែដោយសារតែហេតុការណ៍បែបនេះពួកគាត់ជាជនរងគ្រោះក៏បានបើករថយន្តដេញតាមជនសង្ស័យមកដល់ចំណុចកើតហេតុក៏បំបុកជនសង្ស័យទាំង២នាក់ផ្ទុបនឹងរបងផ្ទះប្រជាពលរដ្ឋតែម្តងទៅ ។
ក្រោយកើតហេតុមានសាច់ញាតិរបស់ជនសង្ស័យបានមកស្រែកឡូឡាដោយនារីជនជាតិចិនបានបើករថយន្តដេញបុកមិនមែនជាចោរឆក់នោះទេ ព្រោះពួកគេទើបនឹងចេញពីផ្ទះបាន៥នាទីប៉ុណ្ណោះហើយសូមអោយសមត្ថកិច្ចបើកការស្រាវជ្រាវរកហេតុផលអោយបានច្បាស់លាស់ផង ។
ជនសង្ស័យទាំង២នាក់ដែលរងរបួសធ្ងន់ធ្ងរត្រូវបានរថយន្តសង្គ្រោះបានមកដឹកយកទៅសង្គ្រោះនៅមន្ទីពេទ្យមិត្តភាពខ្មែរ-សូវៀត ។ ចំណែកជនរងគ្រោះត្រូវបានសមត្ថកិច្ចដឹកយកទៅសាកសួរ និងដាក់ពាក្យបណ្តឹងនៅប៉ុស្តិ៍នគបាលទួលទំពូង១ ហើយរថយន្ត និងម៉ូតូសមត្ថកិច្ចយកទៅរក្សាទុកនៅអធិការដ្ឋានខណ្ឌចំការមន ៕
ចែករំលែកព័តមាននេះ