ខេត្តកំពត ៖ កម្លាំងនគរបាលអន្តរាគមន៍របស់ស្នងការខេត្តកំពតដឹកនាំដោយលោកវរសេនីយ៍ទោ លក ញ៉ាវ នាយការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តបានសហការជាមួយនគរបាលខេត្តតាកែវ និងមានការសម្រួលនីតិវិធីដោយលោក ជ័យ រិទ្ធី ព្រះរាជអាជ្ញារងអមសាលាដំបូងខេត្តកំពត កាលពីវេលាម៉ោង២និង៣០រសៀល ថ្ងៃទី១០ ខែសីហា ឆ្នាំ២០១៨ បានដឹកនាំកម្លាំងចុះបង្ក្រាបទីតាំងជួញដូរ និងប្រើប្រាស់គ្រឿងញៀនមួយកន្លែងនៅចំណុចភូមិយាយ«ឡ» ឃុំត្រាំកក់ ស្រុកត្រាំកក់ ខេត្តតាកែវ ។
លោកវរសេនីយ៍ទោ លក ញ៉ាវ បានឲ្យដឹងថា ក្នុងប្រតិបត្តិការខាងលើកម្លាំងសមត្ថកិច្ចនគរបាលបានចាប់ឃាត់ខ្លួនជនសង្ស័យបានចំនួន៣នាក់ រឹបអូសវត្ថុតាងថ្នាំញៀន និងសម្ភារសម្រាប់បំរើសេវាគ្រឿងញៀនមួយចំនួនផងដែរ ។
លោកបានបន្តទៀតថា ជនសង្ស័យដែលឃាត់ខ្លួនរួមមាន ទី១-ឈ្មោះ មើន ញ៉ាញ់ ភេទប្រុស អាយុ២៧ឆ្នាំ មានទីលំនៅភូមិយាយ«ឡ» ឃុំត្រាំកក់ ស្រុកត្រាំកក់ ខេត្តតាកែវ, ទី២-ឈ្មោះ ជ័យ សាវុធ ភេទប្រុស អាយុ៥០ឆ្នាំ នៅភូមិដើមពោធិ៍ ឃ៉ំចំប៉ី ស្រុកអង្គរជ័យ ខេត្តកំពត និងទី៣-ឈ្មោះ ចេន ពិសិដ្ឋ ភេទប្រុស អាយុ១៦ឆ្នាំ នៅភូមិត្រាំងរំពាក់ ឃ៉ំត្រាំកក់ ស្រុកត្រាំកក់ ខេត្តតាកែវ ។ ដកហូតថ្នាំញៀនចំនួន១៥កញ្ចប់ ធំ១កញ្ចប់ និងសម្ភារសំរាប់សេវាប្រើប្រាស់ថ្នាំញៀនមួយចំនួន ។
ជនសង្ស័យរួម និងវត្ថុតាងថ្នាំញៀនសមត្ថកិច្ចបានកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ