រាជធានីភ្នំពេញ ៖ អាជ្ញាធរខណ្ឌដូនពេញ បានអះអាងថា ក្នុងពេលចុះរៀបចំសន្តិសុខសណ្តាប់ធ្នាប់ របៀបរៀបរយសាធារណៈ និងសម្អាតបរិស្ថានអនាម័យ នៅតាមមហាវិថីព្រះមុនីវង្ស មហាវិថីសហព័ន្ធរុស្ស៊ី មហាវិថីព្រះនរោត្តម តីរៈវិថីព្រះស៊ីសុវត្ថិ ផ្លូវលេខ៤៧ ផ្លូវនិងផ្លូវលេខ១០៦-១០៨ អាជ្ញាធរប្រមូល ជនអនាថា បានចំនួន១៥នាក់ ស្រី៨ និង បានស្ទូចរថយន្តដែលចតគ្មានសណ្តាប់ធ្នាប់ បានចំនួន២គ្រឿង យកមករក្សាទុកនៅសាលាខណ្ឌដូនពេញ និងរក្សាទុករថយន្តនៅ អធិការដ្ឋាននគរបាលខណ្ឌ ធ្វើកិច្ចសន្យាអប់រំណែនាំ និងព្រមានឲ្យរាងចាល។
មន្ត្រីរដ្ឋបាលខណ្ឌដូនពេញ បានអះអាងថា នៅថ្ងៃទី១០ ខែសីហា ឆ្នាំ២០១៨ លោក សុខ ពេញវុធ អភិបាល នៃគណៈអភិបាលខណ្ឌដូនពេញ បានបញ្ជាឲ្យកម្លាំងគណៈបញ្ជាការឯកភាពរដ្ឋបាលខណ្ឌ បន្តចុះរៀបចំសន្តិសុខ សណ្តាប់ធ្នាប់ របៀបរៀបរយសាធារណៈ និងសម្អាតបរិស្ថានអនាម័យ នៅតាមផ្លូវសំខាន់ៗក្នុងភូមិសាស្ត្រខណ្ឌ បន្តផ្សព្វផ្សាយសេចក្តីជូនដំណឹងឲ្យបងប្អូនប្រជាពលរដ្ឋដែលចតយានយន្តគ្រប់ប្រភេទ នៅលើទ្រូងផ្លូវ ត្រូវចតឲ្យផុតពីចិញ្ចើមផ្លូវ ដើម្បីទុកផ្លូវសម្រាប់ថ្មើរជើង។ ចំពោះបងប្អូនដែលប្រកបអាជីវកម្មផ្សេងៗ ត្រូវលក់តាមគំនូសដែលរដ្ឋបាលខណ្ឌ បានកំណត់ជូន និងរក្សាអនាម័យបរិស្ថានឲ្យបានស្អាត មានសោភ័ណភាព។
លោកបន្តថា ជាលទ្ធផលនៃការចុះរៀបចំសណ្តាប់ធ្នាប់នេះ រដ្ឋបាលខណ្ឌ បានធ្វើប្រមូលជនអនាថា បានចំនួន១៥នាក់ ស្រី៨ និងបានស្ទូចរថយន្តដែលចតគ្មានសណ្តាប់ធ្នាប់ បានចំនួន០២គ្រឿង យកមករក្សាទុកនៅសាលាខណ្ឌដូនពេញ និងរក្សាទុករថយន្តនៅ អធិការដ្ឋាននគរបាលខណ្ឌ ដើម្បីធ្វើកិច្ចសន្យាអប់រំណែនាំ។ សូមបញ្ជាក់ថា ក្នុងពេលចុះរៀបចំសន្តិសុខ សណ្តាប់ធ្នាប់ និងសម្អាតបរិស្ថានអនាម័យនោះ អាជ្ញាធរ បានប្រើម៉ាស៊ីនបាញ់លាងចល័ត ធ្វើការសម្អាតតាមដេប៉ូសំរាម, ធ្វើការប្រមូលសំរាមក្រោយពីក្រុមហ៊ុនស៊ីនទ្រីប្រមូលរួច។
ប៉ុន្តែមានបងប្អូនប្រជាពលរដ្ឋមួយចំនួនបញ្ចេញសំរាមខុសម៉ោងកំណត់នោះ កម្លាំងប្រជាការពារយកម៉ូតូកង់បីប្រមូលសំរាម រួចធ្វើការបូមបាញ់លាងសម្អាតតាមសួនច្បារ-ច្រាំងទន្លេ ចាប់ពីមុខផ្សាររាត្រីរហូតដល់កំពង់ចម្លងអរិយក្សត្រ, ផ្លូវលេខ៤៧ ផ្លូវលេខ១០៦-១០៨-៥១-៥៣ លាងសម្អាតថ្នល់-ការ៉ូឡាសួនសម្តេចតេជោហ៊ុនសែន, សួនច្បារព្រះបរមរតនៈរូប សួនច្បារមុខវិទ្យាស្ថានជាតិអប់រំ មហាវិថីព្រះសីហនុ និងមហាវិថីព្រះនរោត្តម មហាវិថីព្រះមុន្នីវង្ស តីរៈវិថីព្រះស៊ីសុវត្ថិ ដើម្បីឲ្យមានបរិស្ថានអនាម័យល្អ ជូនប្រជាពលរដ្ឋលេងកម្សាន្ត និងហាត់ប្រាណ ប្រកបដោយផាសុខភាព៕
ចែករំលែកព័តមាននេះ