រាជធានីភ្នំពេញ ៖ ជនសង្ស័យម្នាក់បានប្រើល្បិចខ្ចីម៉ូតូពីមិត្តភក្ដិដែលទើបតែស្គាល់គ្នាថាជិះទៅដឹកប្រពន្ធតែមួយភ្លែតប៉ុណ្ណោះ ហើយពេលម្ចាស់យល់ព្រមឲ្យខ្ចីម៉ូតូក៏ស្រាប់តែជិះយកទៅបាត់ស្រមោលរហូត។ ពេលនោះម្ចាស់ម៉ូតូបានតាមរកគ្រប់ច្រកល្ហក ប៉ុន្តែរកមិនឃើញឡើយ លុះជាង១ខែក្រោយមក នៅវេលាម៉ោង៨និង៣០នាទីព្រឹកថ្ងៃទី៨ ខែសីហា ឆ្នាំ២០១៨ ស្រាប់តែប្រទះឃើញជនសង្ស័យខាងលើនោះស្ថិតនៅម្ដុំរោងចក្រកាត់ដេរសាន់ស្កាយ ស្ថិតនៅក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ ក៏បានដេញតាមចាប់ខ្លួនជនសង្ស័យនោះប្រគល់ឱ្យនគរបាលប៉ុស្តិ៍ចោមចៅ៣ ដើម្បីសួរនាំ និងចាត់ការតាមច្បាប់។
នគរបាលបានឱ្យដឹងថា ជនសង្ស័យខាងលើនោះឈ្មោះស៊ាន ភារម្យ អាយុ៣៤ឆ្នាំ មានស្រុកកំណើតនៅក្នុងឃុំពោធិ៍ម្រាល ស្រុកបរសេដ្ឋ ខេត្តកំពង់ស្ពឺ បានមកស្នាក់នៅក្នុងសង្កាត់សំរោងក្រោម ខណ្ឌពោធិ៍សែនជ័យ ។ រីឯម៉ូតូ១គ្រឿងដែលជនសង្ស័យឆបោកយកទៅនោះម៉ាកហុងដាឌ្រីម ធុនសេ១២៥ ពណ៍ខ្មៅ ពាក់ស្លាកលេខ ព្រៃវែង ១H-៤៣០៥ ។ ចំណែកម្ចាស់ម៉ូតូដែលជាជនរងគ្រោះឈ្មោះប៉ុន រ៉ានី ភេទប្រុស អាយុ២៧ឆ្នាំ មុខរបររត់ម៉ូតូឌុប ស្នាក់នៅជិតវត្តតាំងកសាង ភូមិចំការឪឡឹក សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
ប្រភពដដែលបានបន្តថា ហេតុការណ៍ឆបោកខាងលើនេះបានកើតឡើងតាំងពីថ្ងៃទី១៥ ខែមិថុនា ឆ្នាំ២០១៨ មកម៉្លេះ គឺរយៈពេលជាង១ខែកន្លងមកហើយ ។ ចំណែកជនសង្ស័យនិងជនរងគ្រោះគឺជាមិត្តភក្តិទើបស្គាល់និងរាប់អានគ្នាបានមួយរយៈពេលខ្លីតែប៉ុណ្ណោះ ហើយជនសង្ស័យបានប្រើល្បិចខ្ចីម៉ូតូជនរងគ្រោះជិះ ដោយប្រាប់ថា ទៅដឹកប្រពន្ធមួយភ្លែតប៉ុណ្ណោះ ទើបជនរងគ្រោះឲ្យខ្ចីម៉ូតូ ។ បន្ទាប់មកជនសង្ស័យក៏បានជិះយកទៅបាត់រហូតតែម្ដង ហើយក្រោយពីចាំបាត់ៗទើបដឹងថា ត្រូវជនសង្ស័យបោក ។
ប្រភពដដែលបានបន្តទៀថា ពេលនោះបុរសជាម្ចាស់ម៉ូតូបានទូរស័ព្ទរកជនសង្ស័យ ដើម្បីឱ្យយកម៉ូតូត្រឡប់មកវិញ ប៉ុន្តែជនសង្ស័យបានបិទទូរស័ព្ទហៅមិនចូលឡើយ ។ ភ្លាមៗនោះបុរសជាម្ចាស់ម៉ូតូក៏បានដើរកគ្រប់ច្រកល្ហក ប៉ុន្តែរកមិនឃើញឡើយ លុះជាង១ខែក្រោយមកគឺនៅវេលាព្រឹកថ្ងៃទី៨ ខែសីហា ទើបប្រទះឃើញជនសង្ស័យខាងលើកំពុងស្ថិតនៅម្ដុំរោងចក្រកាត់ដេរសាន់ស្កាយ ជិតផ្សារព្រៃទាភូមិព្រៃទា សង្កាត់ចោមចៅ៣ ក៏ដេញតាមចាប់ខ្លួនប្រគល់ឱ្យនគរបាលប៉ុស្តិ៍ចោមចៅ៣ដើម្បីចាត់ការតាមច្បាប់តែម្ដង៕
ចែករំលែកព័តមាននេះ