ទីក្រុងសិង្ហបុរី ៖ ប្រទេសសិង្ហបុរីអាចនឹងទាញអត្ថប្រយោជន៍ពីកិច្ចព្រមព្រៀងដៃគូពេញលេញ និងជឿនលឿនឆ្លងមហាសមុទ្រប៉ាស៊ីហ្វិក (CPTPP) ដែលនឹងជំរុញដល់ការនាំចេញសរុប និងផលិតផលក្នុងស្រុកសរុប (GDP) ប្រមាណ០,២% នៅឆ្នាំ២០៣៥។
រដ្ឋមន្ត្រីពាណិជ្ជកម្ម និងឧស្សាហកម្ម លោក Chan Chun Sing បានថ្លែងកាលពីថ្ងៃទី៦ សីហាថា ៖« វាអាចនឹងមានឱកាសអាជីវកម្ម និងការវិនិយោគកាន់តែច្រើនទៀត ដូចជា ការចូលទីផ្សារ CPTPP ងាយស្រួលជាងមុន ជាពិសេស ប្រទេសម៉ិកស៊ិក និងកាណាដា ដែលគ្មានកិច្ចព្រមព្រៀងពាណិជ្ជកម្មសេរី (FTAs) ជាមួយសិង្ហបុរី » ។
គួរបញ្ជាក់ថា CPTPP ឬ TPP-11 ត្រូវបានចរចា និងចុះហត្ថលេខានៅថ្ងៃទី៨ ខែមីនា ដោយប្រទេសអូស្ត្រាលី ព្រុយណេ កាណាដា ស៊ីលី ជប៉ុន ម៉ាឡេស៊ី ម៉ិកស៊ិក នូវែលសេឡង់ ប៉េរូ សិង្ហបុរី និងវៀតណាម បន្ទាប់ពីសហរដ្ឋអាមេរិកដកខ្លួនចេញពីកិច្ចព្រមព្រៀង
នេះ ។
កិច្ចព្រមព្រៀងនេះ មានគោលដៅកាត់បន្ថយពន្ធនាំចូលក្នុងប្រទេស ដែលស្មើ១៣,៥%នៃសេដ្ឋកិច្ចពិភពលោក និងមានប្រជាពលរដ្ឋសរុប៥០០លាននាក់ រួមទាំងមានផលិតផលក្នុងស្រុកសរុប (GDP) ប្រមាណ១៣ទ្រីលានដុល្លារ។ CPTPP នឹងរកប្រាក់ចំណូលបន្ថែមបានប្រមាណ១៤៧ប៊ីលានដុល្លារផងដែរ ។
លោក Chan Chun Sing បន្ថែមថា អត្ថប្រយោជន៍បានពីកិច្ចព្រមព្រៀងនេះ គឺមានក្នុងវិស័យជាច្រើននៅប្រទេសសិង្ហបុរី ។ ក្រុមហ៊ុនផលិតរបស់សិង្ហបុរី ជាពិសេស ផ្នែកអាហារកែច្នៃ វាយនភ័ណ្ឌ និងសម្លៀកបំពាក់ នឹងទទួលបានការអនុគ្រោះពន្ធនៅពេលពួកគេនាំចេញទៅកាន់ទីផ្សារ CPTPP ។
សម្រាប់វិនិយោគិនវិញ ការកំហិតទុនបរទេសនៅក្នុងវិស័យសុខាភិបាលឯកជន, ទូរគមនាគមន៍ ថាមពល និងវិស័យសេវាកម្មបរិស្ថានក្នុងប្រទេសព្រុយណេ ម៉ាឡេស៊ី និងវៀតណាម នឹងត្រូវលុបបំបាត់ ៕
ចែករំលែកព័តមាននេះ