រាជធានីភ្នំពេញ ៖ កំណើនភ្ញៀវទេសចរ និងវិនិយោគិនចិនបានធ្វើឲ្យវិស័យអាកាសចរណ៍នៅខេត្តព្រះសីហនុកើនឡើងជិត៨៩%ក្នុងរយៈពេល៥ខែដើមឆ្នាំនេះ ធៀបនឹងរយៈពេលដូចគ្នាកាលពីឆ្នាំមុន ។
ទីប្រឹក្សាសមាគមទីភ្នាក់ងារទេសចរណ៍កម្ពុជា លោក ហូ វណ្ឌី បានថ្លែងឲ្យដឹងតាមទូរស័ព្ទនារសៀលថ្ងៃទី៦ សីហា ម្សិលមិញថា អាកាសចរណ៍ជាច្រើនបានភ្ជាប់ជើងហោះហើរទៅកាន់ព្រលានយន្តហោះកងកេង ខេត្តព្រះសីហនុ ពិសេសក្រុមហ៊ុនអាកាសចរណ៍មកពីប្រទេសចិន ។ លោកបន្តថា ក្នុងរយៈពេល៥ខែដើមឆ្នាំនេះ តាមតួលេខដែលលោកទទួលបាន គឺចំនួនអាកាសចរណ៍ចុះឡើងព្រលានយន្តហោះនេះ បានកើនឡើងរហូតដល់៨៨,៩% ។ លោកបន្តថា ៖« កំណើនអាកាសចរណ៍នេះ បានឆ្លុះបញ្ចាំងពីការរីកចម្រើនរបស់កម្ពុជា ពិសេសកំណើនភ្ញៀវទេសចរ និងអ្នកវិនិយោគមកពីប្រទេសចិន » ។ លោកបន្តថា ៖« កំណើនភ្ញៀវទេសចរអន្តរជាតិ ពិសេសភ្ញៀវទេសចរចិនបានធ្វើឲ្យចំនួនបន្ទប់សណ្ឋាគារក្នុងក្រុងព្រះសីហនុ កើនឡើងជាប្រចាំផងដែរ » ។
យោងតាមរបាយការណ៍ក្រសួងទេសចរណ៍ រយៈពេល៥ខែដើមឆ្នាំ២០១៨នេះ កម្ពុជាទទួលបានភ្ញៀវទេសចរអន្តរជាតិចំនួន២.៥៩៣.៨៤៧នាក់ កើនឡើង១៣,៥% បើធៀបនឹងគ្រាដូចគ្នាកាលពីឆ្នាំ២០១៧ ។ ក្នុងនោះ ភ្ញៀវចិនមានចំនួន៧៨៨.៣៨៧នាក់ ស្មើនឹង៣០,៤១%នៃចំនួនភ្ញៀវទេសចរអន្តរជាតិសរុប កើនឡើង៧៨,៧% ។
លោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុ បានមានប្រសាសន៍ឲ្យដឹងផងដែរថា លោកកំពុងសិក្សាពីតួលេខនេះឡើងវិញ ដើម្បីធ្វើឲ្យប្រាកដថា ចំនួនអាកាសចរណ៍ពិតជាកើនឡើងដូចតួលេខពិតឬយ៉ាងណា ប៉ុន្តែតាមអ្វីដែលលោកដឹង គឺអាកាសចរណ៍ជាង៥០០ជើងបានចុះឡើងជាប្រចាំក្នុង១សប្តាហ៍ នៅព្រលានយន្តហោះក្នុងខេត្តនេះ ។ លោកបន្តថា ៖« បើសិនជាមើលពីកំណើនភ្ញៀវទេសចរមកទស្សនាក្នុងខេត្តបានកើនឡើងច្រើន និងធ្វើឲ្យបន្ទប់សណ្ឋាគារខ្វះខាតជាប្រចាំ ពិសេសថ្ងៃចុងសប្តាហ៍ និងថ្ងៃបុណ្យទានធំៗ »។
លោកបន្តថា ៖« តាមកំណើនភ្ញៀវទេសចរ និងកំណើនយន្តហោះចុះចត ហាក់មានភាពខុសគ្នា ប៉ុន្តែខ្ញុំមិនទាន់សន្និដ្ឋានបែបណានៅឡើយទេ » ។ លោកបន្តថា ជាមួយនឹងការមកដល់របស់ភ្ញៀវទេសចរចិន និងទេសចរអន្តរជាតិដទៃទៀត នឹងធ្វើឲ្យបន្ទប់សណ្ឋាគារនៅតែខ្វះខាត ទោះជាចុងឆ្នាំនេះមានសណ្ឋាគារធំៗចំនួន៥ ដែលមានបន្ទប់ជាង២ពាន់បានបើកដំណើរការក្តី ក៏ខេត្តនេះនឹងនៅតែខ្វះបន្ទប់ ។ លោកបន្ថែមថា នៅឆ្នាំ២០១៩ខាងមុខ លោកគិតថា ចំនួនអាកាសចរណ៍មកចុះចតនៅព្រលាននេះនឹងកើនឡើងថែមទៀត ។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថា មិនអាចទាក់ទងសុំការអត្ថាធិប្បាយបានទេ ប៉ុន្តែបើតាមរបាយការណ៍ក្រសួងទេសចរណ៍ ក្នុងរយៈពេល៥ខែដើមឆ្នាំនេះ អាកាសយានដ្ឋានអន្តរជាតិខេត្តព្រះសីហនុ បានទទួលភ្ញៀវទេសចរអន្តរជាតិចំនួន៥៥.៩៤៧នាក់ ស្មើនឹង២,២%នៃចំនួនទេសចរអន្តរជាតិសរុប កើនឡើង៨៨,៩% ៕
ចែករំលែកព័តមាននេះ