កម្ពុជា​ទទួល​បាន​ភ្ញៀវ​ទេសចរ​អន្តរជាតិ​ជាង​2,5​លាន​នាក់​ក្នុង​រយៈពេល​5​ខែ


រាជធានី​ភ្នំពេញ ៖ ក្នុង​រយៈពេល​៥​ខែ​ដើមឆ្នាំ​២០១៨​នេះ ភ្ញៀវ​ទេសចរ​អន្តរជាតិ​មក​ទស្សនា​កម្ពុជា នៅ​តែ​មាន​ចំនួន​កើនឡើង​ជាង​ពីរ​ខ្ទង់ បើ​ធៀប​នឹង​រយៈពេល​ដូច​គ្នា​នៃ​ឆ្នាំ​២០១៧ ។ ក្នុង​នោះ ភ្ញៀវ​ចិន​ឈរ​លំដាប់ថ្នាក់​លេខ​១ ក្នុង​កំណើន​៧៨,៧% ។ នេះ​បើ​យោង​តាម​របាយការណ៍​ក្រសួងទេសចរណ៍ ដែល​កោះសន្ដិភាព ទើប​ទទួល​បាន ។

តាម​តួលេខ​ជាក់ស្តែង​នៅ​ក្នុង​របាយការណ៍​បាន​បង្ហាញ​ថា រយៈពេល​៥​ខែ​ដើមឆ្នាំ​២០១៨​នេះ កម្ពុជា​ទទួល​បាន​ភ្ញៀវ​ទេសចរ​អន្តរជាតិ​ចំនួន​២.៥៩៣.៨៤៧​នាក់ កើនឡើង​១៣,៥% បើ​ធៀប​នឹង​គ្រា​ដូច​គ្នា​កាលពី​ឆ្នាំ​២០១៧ ។ ក្នុង​នោះ ភ្ញៀវ​ចិន​មាន​ចំនួន​៧៨៨.៣៨៧​នាក់ ស្មើនឹង​៣០,៤១%​នៃ​ចំនួន​ភ្ញៀវ​ទេសចរ​អន្តរជាតិ​សរុប កើនឡើង​៧៨,៧% តាម​ពីក្រោយ​ដោយ​ភ្ញៀវ​វៀតណាម មាន​ចំនួន​៣២៣.៨៩៥​នាក់ ស្មើនឹង​១២,៥%​នៃ​ចំនួន​ភ្ញៀវ​សរុប ថយ​ចុះ​២,៥%​ឈរ​លំដាប់ថ្នាក់​លេខ​២ និង​ចំណាត់ថ្នាក់​លេខ​៣ គឺ​ភ្ញៀវ​ទេសចរ​ឡាវ មាន​ចំនួន​១៧៧.៦៩៩​នាក់ ស្មើនឹង​៦,៩%​នៃ​ចំនួន​សរុប ថយ​ចុះ​៣,២% ។

ចំពោះ​ប្រភព​ទីផ្សារ​ទេសចរណ៍​សំខាន់​ៗ​មក​កម្ពុជា នៅ​ក្នុង​រយៈពេល​៥​ខែ​ដើមឆ្នាំ​២០១៨​នេះ ដែរ គឺ​មាន​ដូច​ជា ភ្ញៀវ​ទេសចរ​មក​ពី​តំបន់​អាស៊ី​ប៉ា​ស៊ី​ហ្វិ​ក មាន​ចំនួន​២.០០៩.៩០២​នាក់ ស្មើនឹង​៧៧,៥%​នៃ​ចំនួន​សរុប កើនឡើង​១៩,៤% ក្នុង​នោះ​មក​ពី​តំបន់​អាស៊ាន មាន​៨០៧.២៧៧​នាក់​ស្មើនឹង​៣១,១%​នៃ​ចំនួន​សរុប ថយ​ចុះ​៥,៩% ។ ចំណែក​ភ្ញៀវ​ទេសចរ​មក​ពី​តំបន់​អឺរ៉ុប​មាន​ចំនួន​៣៩៩.៧៦៣​នាក់ ស្មើនឹង​១៥,៤%​នៃ​ចំនួន​សរុប ថយ​ចុះ​៥,៩% ខណៈ​ភ្ញៀវ​ទេសចរ​មក​ពី​តំបន់​អា​មេ​រិ​ក​មាន​ចំនួន​១៧៧.២៣២​នាក់ ស្មើនឹង​៦,៨%​នៃ​ចំនួន​សរុប ថយ​ចុះ​ប្រមាណ​៣,៥% បើ​ធៀប​នឹង​រយៈពេល​ដូច​គ្នា​នៃ​ឆ្នាំ​២០១៧ ។

របាយការណ៍​ក៏​បាន​បង្ហាញ​ឲ្យ​ឃើញ​ផង​ដែរ​នូវ​ចំនួន​ទេសចរ​អន្តរជាតិ ដែល​បាន​ទៅ​ទស្សនា​តំបន់​អាទិភាព​សំខាន់​ៗ​នៅ​ក្នុង​ព្រះរាជាណាចក្រ​កម្ពុជា ក្នុង​នោះ​តំបន់​ភ្នំពេញ​ទទួល​បាន​ភ្ញៀវ​ទេសចរ​អន្តរជាតិ​ចំនួន​១.៣៨៧.៦៤៩​នាក់ ស្មើនឹង​៤៥,៦%​នៃ​ចំនួន​សរុប កើនឡើង​១៦,៤% ។ តំបន់​សៀមរាប​អង្គរ​ទទួល​បាន​ចំនួន​១.២០៦.៦៣៦​នាក់ ស្មើនឹង​៣៩,៦% នៃ​ចំនួន​សរុប កើនឡើង​១០,៤% ខណៈ​ដែល​តំបន់ឆ្នេរ​សមុទ្រ​មាន​ចំនួន​៤១៥.៥៨៣​នាក់ ស្មើនឹង​១៣,៦%​នៃ​ចំនួន​សរុប កើនឡើង​២២,៦% បើ​ធៀប​នឹង​រយៈពេល​ដូច​គ្នា​នៃ​ឆ្នាំ​២០១៧ ។

ចំពោះ​ភ្ញៀវ​ទេសចរ​អន្តរជាតិ​ដែល​ទៅ​ទស្សនា​តំបន់​អេកូ​ទេសចរណ៍​ភូមិភាគ​ឦសាន​មាន​ចំនួន​៣៥.៥៨៦​នាក់ កើនឡើង​៥,៥% ហើយ​តំបន់​ព្រះ​វិហារ​ទទួល​បាន​ភ្ញៀវ​ទេសចរ អន្តរជាតិ​ចំនួន​២៨.០៦៤​នាក់ ថយ​ចុះ​៥,១% បើ​ធៀប​នឹង​រយៈពេល​ដូច​គ្នា​ឆ្នាំ​២០១៧​កន្លង​ទៅ ។ ប្រធាន​សមាគម​ទីភ្នាក់ងារ​ទេសចរណ៍​កម្ពុជា លោកស្រី ឆាយ ស៊ី​វលី​ន បាន​ឲ្យ​ដឹង​កន្លង​មក​ថា វិស័យ​នេះ​មិន​បាន​រង​ផល​ប៉ះពាល់​ទេ ដោយសារ​យើង​ឃើញ​កំណើន​ភ្ញៀវ​អន្តរជាតិ​នៅ​តែ​បន្ត​កើនឡើង និង​មិន​មានការ​លុប​កញ្ចប់​ទស្សនកិច្ច​ណាមួយ​នោះ​ទេ ។ លោកស្រី​បន្ត​ថា ការ​កើនឡើង​នូវ​ចំនួន​ភ្ញៀវ​ទេសចរ គឺ​ឆ្លុះ​បញ្ចាំង​ពី​ទំនុកចិត្ត ដោយសារ​កត្តា​សុខ​សន្តិភាព និង​ស្ថិរភាព​នយោបាយ​ដែល​កម្ពុជា​សម្រេច​បាន ។ លោកស្រី​បន្ត​ថា ៖« យើង​នៅ​តែ​មាន​សុទិដ្ឋិនិយម​ចំពោះ​ទីផ្សារ​នេះ ហើយ​យើង​ឃើញ​ទីផ្សារ​កម្ពុជា​នៅ​តែ​មាន​ភាព​ទាក់ទាញ » ។

ប្រធាន​សមាគម​ទេសចរណ៍​អាស៊ី​ប៉ា​ស៊ី​ហ្វិ​ក លោក ធួន ស៊ី​ណា​ន បាន​មាន​ប្រសាសន៍​ដែរ​ថា ភ្ញៀវ​ទេសចរ​មក​ពី​បណ្តា​ប្រទេស​ក្នុង​តំបន់​នៅ​តែ​បន្ត​កើនឡើង​ល្អ​ប្រសើរ បើ​ទោះជា​ភ្ញៀវ​មក​ពី​អា​មេ​រិ​ក និង​អឺរ៉ុប​មួយ​ចំនួន​មាន​សញ្ញា​ទ្រឹង​ក្តី ឬ​ថយ​ចុះ​តិចតួច​ក្ដី ប៉ុន្តែ​ជា​រួម គឺ​លំហូរ​ភ្ញៀវ​អន្តរជាតិ​នៅ​តែ​បន្ត​កើនឡើង ។
លោក​បន្ត​ថា ៖« អ្វី​ដែល​កាន់តែ​គួរ​ឲ្យ​ចាប់អារម្មណ៍ គឺ​ភ្ញៀវ​អន្តរជាតិ​ហាក់​មិន​បាន​សួរនាំ​ពី​ស្ថានភាព​នៅ​កម្ពុជា​ច្រើន​ទេ មាន​ន័យ​ថា ពួក​គេ​ជឿជាក់​លើ​ស្ថិរភាព និង​សុខ​សន្តិភាព​របស់​កម្ពុជា » ។
អ្នក​នៅ​ក្នុង​ផ្នែក​សេវា​បដិសណ្ឋារកិច្ច បាន​សម្តែង​នូវ​សុទិដ្ឋិនិយម​ក្នុង​វិស័យ​នេះ​ដូច​គ្នា ទន្ទឹម​នឹង​កំណើន​នៃ​ការ​កក់​បន្ទប់ ដោយសារ​ការ​មក​ដល់​របស់​ភ្ញៀវ​អន្តរជាតិ ។

កញ្ញា ម៉ឹង ប៊ុ​ណ្ណា​រី ជំនួយការ​ផ្នែក​លក់​នៅ​សណ្ឋាគារ​ហ៊ី​ម៉ា​វ៉ា​រី បាន​ឲ្យ​ដឹង​ថា កំណើន​ភ្ញៀវ​ទេសចរ​អន្តរជាតិ​មក​កម្ពុជា​បាន​កើនឡើង​គួរ​ឲ្យ​កត់សម្គាល់ ហើយ​ចំនួន​ភ្ញៀវ​ទេសចរ​ដែល​បាន​កក់ និង​ទទួល​សេវា​នៅ​សណ្ឋាគារ​ហ៊ី​ម៉ា​វ៉ា​រី ក៏​មានការ​កើនឡើង​គួរ​ឲ្យ​កត់សម្គាល់​ដែរ ។ កញ្ញា​ថា ៖« ចំនួន​ភ្ញៀវ​ទេសចរ​អន្តរជាតិ​បាន​កើនឡើង​ច្រើន​នៅ​ឆ្នាំ​នេះ បើ​ធៀប​នឹង​ឆ្នាំ​២០១៧​កន្លង​មក » ។ នៅ​ក្នុង​របាយការណ៍​ក្រសួងទេសចរណ៍​ក៏​បាន​រំលេច​ពី​ពលរដ្ឋ​ខ្មែរ​ចេញ​ទៅ​កម្សាន្ដ​នៅ​ក្រៅប្រទេស​មាន​សញ្ញា​កើនឡើង​ផង​ដែរ ដែល​ឆ្លុះ​បញ្ចាំង​ពី​និន្នាការ​ធ្វើ​ដំណើរ​ក្រៅប្រទេស​កាន់តែ​ច្រើន​ឡើងជា​លំដាប់ ។ ជាក់ស្ដែង ក្នុង​រយៈពេល​៥​ខែ​ដើមឆ្នាំ​២០១៨​នេះ មាន​ចំនួន​៨១១.០៦៤​នាក់ កើនឡើង​១៥,៩% បើ​ធៀប​នឹង​រយៈពេល​ដូច​គ្នា​នៃ​ឆ្នាំ​មុន ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ