ខេត្តបន្ទាយមានជ័យ ៖ កម្លាំងកងរាជអាវុធហត្ថដេញរថយន្ត១គ្រឿង ដឹកសត្វព្រៃ ពីព្រំដែនមកធ្លាក់ទឹកស្រះ ទើបចាប់បានជនសង្ស័យ២នាក់ និងសត្វព្រៃ២២៤ក្បាល ស្មើ៤៣៤គីឡូក្រាម នៅវេលាម៉ោង១១និង៣០នាទី ថ្ងៃទី០៥…
ខេត្តបន្ទាយមានជ័យ ៖ កម្លាំងកងរាជអាវុធហត្ថដេញរថយន្ត១គ្រឿង ដឹកសត្វព្រៃ ពីព្រំដែនមកធ្លាក់ទឹកស្រះ ទើបចាប់បានជនសង្ស័យ២នាក់ និងសត្វព្រៃ២២៤ក្បាល ស្មើ៤៣៤គីឡូក្រាម នៅវេលាម៉ោង១១និង៣០នាទី ថ្ងៃទី០៥ ខែសីហា ឆ្នាំ២០១៨ នៅតាមបណ្តោយជាតិលេខ៦ ស្ថិតភូមិចក្រី ឃុំជប់វ៉ារី ស្រុកព្រះនេត្រព្រះ។
លោកវរសេនីយ៍ត្រី ស៊ីន រ៉ាស៊ី មេបញ្ជាការកងរាជអាវុធហត្ថស្រុកព្រះនេត្រព្រះបានប្រាប់ថា ជនសង្ស័យ២នាក់ មាន១- ឈ្មោះ ប៉ាន ផារៈ ភេទប្រុស អាយុ២៨ឆ្នាំ (អ្នកបើកបររថយន្ត) ២- ឈ្មោះ យ៉ាន យេង ភេទប្រុស អាយុ៣៩ឆ្នាំ (ព្រូរថយន្ត) ជនទាំង២នាក់រស់នៅភូមិស្វាយ ស្រុកពួក ខេត្តសៀមរាប ។
លោកបានបញ្ជាក់ថា នៅពេលដែលឃាត់រថយន្ត និងចាប់ជនសង្ស័យ និងសត្វព្រៃ គឺកម្លាំងកងរាជអាវុធហត្ថក្រុងប៉ោយប៉ែតបានធ្វើការស្រាវជ្រាវ និងកំណត់មុខសញ្ញាបានរថយន្ត១គ្រឿងដែលសង្ស័យដឹកសត្វព្រៃ ហើយកម្លាំងកងរាជអាវុធហត្ថបានដេញតាមពីព្រំដែន រហូតដល់ចំណុចសង្កាត់ទឹកថ្លា ក្រុងសិរីសោភ័ណមក ។
ដោយឃើញសមត្ថកិច្ចដេញតាមជនសង្ស័យបានចូលប្តូរស្លាក់លេខរថយន្ត ហើយកម្លាំងបានឃើញជនសង្ស័យបើករថយន្តបត់ចូលផ្លូវតូចហើយក៏បានបើកបុករថយន្តសឺរ៉ែនកម្លាំងសមត្ថកិច្ចទៀត ដែលបណ្តាលខូចផ្នែកខាងមុខ បន្ទាប់មកជនសង្ស័យបើកគេចទៅតាមផ្លូវជាតិលេខ៦ ដែលទិសដៅទៅខេត្តសៀមរាប ហើយកម្លាំងកងរាជអាវុធហត្ថស្រុកព្រះនេត្រព្រះក៏បានទំនាក់ទំនងឲ្យកម្លាំងជួយស្ទាក់ ដោយបានដាក់រថយន្ត២គ្រឿង លើស្ពានបិតផ្លូវជនសង្ស័យ ។
បន្ទាប់មករថយន្តជនសង្ស័យបានបើកគេចរថយន្តសមត្ថកិច្ចបិតផ្លូវគេចចូលផ្លូវតូចខាងត្បូងផ្លូវជាតិលេខ៦ បើកគេចចូលក្រោយផ្ទះប្រជាពលរដ្ឋ រហូតទាល់ផ្លូវក៏បើកទម្លាក់ទឹកស្រះ ហើយបើកទ្វាររថយន្តរត់គេចខ្លួន ត្រូវកម្លាំងសមត្ថកិច្ចចាប់បាន២នាក់ រថយន្តធ្លាក់ចូលស្រះទឹកបែកកញ្ចក់មុខ បណ្តាលឲ្យសត្វព្រៃធ្លាយការ៉ុងចូលស្រះមួយចំនួន និងស្រង់បានមួយចំនួន ។ ហើយយករថយន្តស្ទួច២គ្រឿង មកស្ទួចយករថយន្តដឹកសត្វព្រៃពីក្នុងស្រះជិត១ម៉ោង ទើបយកសត្វព្រៃច្រកការ៉ុង និងថង់ស្បៃខៀវមានសត្វព្រៃចំនួន២២៤ក្បាល ស្មើ៤៣៤គីឡូក្រាម មានសត្វអណ្តើកតូចចំនួន១៧០ក្បាល សត្វអណ្តើកធំ ចំនួន២៧ក្បាល សត្វកន្ធាយ១០ក្បាល សត្វអន្សង១៧ក្បាល ងាប់ទាំងអស់ ។
លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានប្រាប់ថា ក្រោយពេលដែលកម្លាំងកងរាជអាវុធហត្ថស្រុកព្រះនេត្រព្រះសហការជាមួយក្រុងប៉ោយប៉ែតឃាត់ខ្លួនជនសង្ស័យ២នាក់ និងរថយន្ត១គ្រឿង ពាក់ស្លាក់លេខភ្នំពេញ 2V-9941ដែលដឹកសត្វព្រៃបានបញ្ជូនមកទីបញ្ជាការកងរាជអាវុធហត្ថខេត្តបន្ទាយមានជ័យបានធ្វើការឆែកឆេររថយន្តរកឃើញមានស្លាកលេខក្នុងរថយន្តមានចំនួនចំនួន២២៤ក្បាល ស្មើ៤៣៤គីឡូក្រាម និងស្លាកលេខរថយន្ត៣គូ មានស្លាកលេខភ្នំពេញ 2Z- 9183 និងស្លាកលេខភ្នំពេញ 2M-7502 ស្លាកលេខវាស៊ីងតុន AAN-7398 ។
លោកបានបញ្ជាក់ថា ក្រោយពេលឃាត់ជនសង្ស័យ២នាក់ និងរថយន្ត១គ្រឿងត្រូវបានកម្លាំងជំនាញកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមច្បាប់ហើយចំណែកសត្វព្រៃដែលចាប់បានត្រូវបានរៀបចំឯកសារប្រគល់ជូនមន្ត្រីខណ្ឌរដ្ឋបាលព្រៃឈើបន្ទាយមានជ័យ ៕
ចែករំលែកព័តមាននេះ