រាជធានីភ្នំពេញ ៖ មន្ត្រីនគរបាលមានឋានន្តរស័ក្តិវរសេនីយ៍ទោ ដែលបានបាញ់សម្លាប់ខ្លួននៅក្នុងបន្ទប់សណ្ឋាគារ និងខារ៉ាអូខេ«កូឡូសូ» កាលពីរសៀលថ្ងៃ១ សីហា ត្រូវបានស្គាល់អត្តសញ្ញាណហើយ គឺឈ្មោះ
ម៉ុន រតនៈឧត្តម ជាកូនប្រុសបង្កើតរបស់លោក ទេស ស៊ីម៉ុន អនុប្រធានមន្ទីរសុខាភិបាលខេត្តបន្ទាយមានជ័យ ។
ហេតុការណ៍ធ្វើអត្តឃាតនេះ បានកើតឡើងគួរឱ្យភ្ញាក់ផ្អើល នៅក្នុងបន្ទប់លេខ២០៩ ជាន់ទី២ របស់សណ្ឋាគារ និងខារ៉ាអូខេ «កូឡូសូ» ដែលមានទីតាំងនៅខាងមុខជាប់ផ្លូវលេខ៣៦០ និងខាងក្រោយផ្លូវលេខ៣៥០ ក្នុងសង្កាត់បឹងកេងកងទី៣ ខណ្ឌចំការមន ។ លោកវរសេនីយ៍ទោ ម៉ុន រតនៈឧត្តម ជាមន្ត្រីនគរបាលក្រសួងមហាផ្ទៃ បានប្រើកាំភ្លើងខ្លីម៉ាកកា៥៤ បាញ់សម្លាប់ខ្លួននៅក្នុងបន្ទប់យ៉ាងស្ងៀមស្ងាត់ និងអាថ៌កំបាំងបំផុត ហើយនៅព្រឹកថ្ងៃទី២ ខែសីហា សពក៏ត្រូវបានក្រុមគ្រួសារតម្កល់ធ្វើបុណ្យនៅវត្តនិរោធ ក្នុងខណ្ឌច្បារអំពៅ។
ក្នុងពិធីបុណ្យសព នៅវត្តនិរោធនេះដែរ ឪពុកមាបង្កើតម្នាក់បានរៀបរាប់ថា ចំពោះការធ្វើអត្តឃាតរបស់ក្មួយប្រុសបង្កើតគាត់នេះ គឺគាត់មិនបានដឹងថា រូបគេមានវិបត្តិអ្វីច្បាស់លាស់នោះឡើយ ព្រោះរូបគាត់មានទីលំនៅឆ្ងាយពីគ្នា និងទើបតែមកពីខេត្តមកចូលរួមបុណ្យសពរបស់ក្មួយ ។ ក្មួយប្រុសរបស់គាត់រូបនេះ ជាមនុស្សមានអត្តចរិតស្លូតបូត សុភាពរាបសា និងមិនសូវចេះមាត់កទេ គឺជាមនុស្សមឹះៗ និងត្រឹមត្រូវបំផុត តែមិនដឹងថា រូបគេមានបញ្ហាអ្វីទើបបានជាដាច់ចិត្តធ្វើបែបនេះ ។ បុរសជាឪពុកមាបន្តទៀតថា សព្វថ្ងៃក្មួយប្រុសគាត់នៅលីវ និងមិនទាន់មានប្រពន្ធកូននៅឡើយទេ ព្រោះរូបគេនៅក្មេងទើបតែមានអាយុ២៦ឆ្នាំប៉ុណ្ណោះ និងដឹងខ្លះៗថា រូបគេមានសង្សារហើយដែរ តែពួកគាត់មិនដឹងថា រូបគេធ្វើបែបនេះ ដោយសារតែវិបត្តិអ្វីឡើយ ។
ពាក់ព័ន្ធទៅនឹងករណីមន្ត្រីនគរបាលថ្នាក់វរសេនីយ៍ទោ នៃក្រសួងមហាផ្ទៃឈ្មោះ ម៉ុន រតនៈឧត្តម អាយុ២៦ឆ្នាំ ធ្វើអត្តឃាតដោយបាញ់សម្លាប់ខ្លួននេះ មិនមានប្រភពណាមួយប្រាប់ឱ្យដឹងពីមូលហេតុនោះឡើយ សូម្បីតែក្រុមគ្រួសារក៏ដោយ ។ ចំណែកសមត្ថកិច្ចខណ្ឌចំការមន មិនបានបញ្ជាក់ប្រាប់ពីមូលហេតុអ្វីដែលឈានទៅដល់ការបាញ់សម្លាប់ខ្លួនរបស់មន្ត្រីនគរបាលក្រសួងមហាផ្ទៃរូបនេះឡើយ ដោយគ្រាន់តែប្រាប់អ្នកកាសែតថា «បើចង់ដឹងរឿងនេះច្បាស់ ទាល់តែទៅសួរនាំខាងក្រុមគ្រួសាររបស់ជនរងគ្រោះ ទើបដឹង ចំណែកឯពួកគាត់ជាអាជ្ញាធរមូលដ្ឋានមិនបានដឹងរឿងអ្វីឡើយ» ។
ការបញ្ជាក់ប្រាប់អ្នកកាសែតនេះ ហាក់បីដូចជាមានការលាក់លៀមចំពោះព័ត៌មានខាងលើយ៉ាងខ្លាំង ។ ជាក់ស្តែង កាលពីរសៀលថ្ងៃកើតហេតុ មានក្រុមអ្នកកាសែតយ៉ាងច្រើន បានទៅដល់ទីតាំងសណ្ឋាគារ និងខារ៉ាអូខេ«កូឡូសូ» ហើយត្រូវក្រុមសន្តិសុខនាំគ្នាព្យាយាមរារាំង ហាមមិនឱ្យថតយករូបភាពទេ ។ ចំណែកឯសមត្ថកិច្ចមូលដ្ឋានវិញ ក៏ហាក់បីដូចជាមានការលាក់បាំង និងព្យាយាមបិទបាំងព័ត៌មានខាងលើនេះ ដែរ ដោយផ្តល់តែបន្តិចបន្តួចប៉ុណ្ណោះពីការធ្វើអត្តឃាតនេះ ៕
ចែករំលែកព័តមាននេះ