រាជធានីភ្នំពេញ ៖ លោកយាយម្នាក់ ដែលមានទឹកភ្នែកហូររហាមផងនោះ កាលពីរសៀលថ្ងៃទី៣១ ខែកក្កដា បានមកដល់ទីចាត់ការកោះសន្តិភាព លើកដៃសំពះអង្វរសុំឱ្យជួយចុះផ្សាយនូវរឿងរ៉ាវរបស់លោកយាយ ដែលត្រូវកូនស្រីបង្កើតប្រើដំបងវាយគាត់រយះក្បាល និងយកប្រាក់អស់ចំនួន៥.៥០០ដុល្លារអាមេរិក…
រាជធានីភ្នំពេញ ៖ លោកយាយម្នាក់ ដែលមានទឹកភ្នែកហូររហាមផងនោះ កាលពីរសៀលថ្ងៃទី៣១ ខែកក្កដា បានមកដល់ទីចាត់ការកោះសន្តិភាព លើកដៃសំពះអង្វរសុំឱ្យជួយចុះផ្សាយនូវរឿងរ៉ាវរបស់លោកយាយ ដែលត្រូវកូនស្រីបង្កើតប្រើដំបងវាយគាត់រយះក្បាល និងយកប្រាក់អស់ចំនួន៥.៥០០ដុល្លារអាមេរិក ។ លោកយាយទទូចសុំឱ្យស្ថាប័នតុលាការជួយពន្លឿនលើការកាត់ក្តីសំណុំរឿងគាត់ឱ្យបានឆាប់ ដើម្បីបានទទួលភាពយុត្តិធម៌ពីកូនស្រីមកវិញ ។
ពាក្យបណ្តឹងរបស់លោកយាយ ហ៊ូ សុខុម គឺសំណូមពរសុំឱ្យសមត្តកិច្ចចាប់ខ្លួនកូនស្រី ដែលប្រើអំពើហិង្សាមកលើរូបគាត់ជាម្តាយ បញ្ជូនទៅតុលាការ ដើម្បីផ្តន្ទាទោសតាមផ្លូវច្បាប់ និងទាមទារមកវិញនូវប្រាក់ចំនួន៥.៥០០ដុល្លារអាមេរិក ព្រមទាំងសងថ្លៃការព្យាបាលរបួសចំនួន៥លានរៀលផងដែរ ។ ប៉ុន្តែពាក្យបណ្តឹងនោះ រហូតមកដល់ពេលនេះ មានរយៈពេល៩ខែហើយ តុលការនៅមិនទាន់បានលើកយកសំណុំរឿងនេះមកបើកសវនាការជំនុំជម្រះក្តី ដើម្បីរកយុត្តិធម៌ជូនលោកយាយទេ ។
លោកយាយមកកាន់ទីចាត់ការកោះសន្តិភាពនាពេលនេះ គឺមានគោលបំណងសុំឱ្យតុលាការពន្លឿនសំណុំរឿង ដើម្បីឱ្យគាត់បានឃើញភាពយុត្តិធម៌មកវិញ ទាន់គាត់នៅរស់រានមានជីវិត ព្រោះពេលនេះ វ័យកាន់តែជរាណាស់ទៅហើយ ។ លោកយាយបានពោលថា បើតុលាការមិនជួយរកយុត្តិធម៌ជូនគាត់ទេ គាត់ក៏មិនអាចនៅរស់បានតទៅទៀតដែរ មូលហេតុគ្មានប្រាក់ទិញអាហារ និងថ្នាំសង្កូវសម្រាប់ព្យាបាលជំងឺប្រចាំកាយ ដូច្នេះលោកយាយបានសម្រេចចិត្តរួចហើយ គឺជ្រើសរើសរកវិធីធ្វើអត្តឃាតដោយមិនចាំបាច់ដល់អស់អាយុទាន់ ។
លោកយាយបាននិយាយទាំងហូរទឹកភ្នែក និងលើកដៃសំពះទទូចហើយទទួចទៀត សុំឱ្យតុលាការកាត់ក្តីរឿងគាត់ឱ្យបានឆាប់ ដូច្នេះមានតែកោះសន្តិភាពទេ ដែលអាចជួយអង្រួនបេះដូងលោកចៅក្រម ឲ្យយកសំណុំរឿងលោកយាយមកកាត់ក្តី ដើម្បីលោកយាយបាននៅមើលសង្គមបច្ចុប្បន្នកំពុងមានការអភិវឌ្ឍទៅមុខទៀត ។
កោះសន្តិភាពបានពិនិត្យឯកសាររបស់លោកយាយ ហ៊ូ សុខុម គឺបានដល់ដៃលោក ម៉េង តូនី ចៅក្រមស៊ើបសួរសាលាដំបូងរាជធានីភ្នំពេញហើយ ហើយក៏បានឃើញដីកាកោះរបស់លោក ស៊ិន វិរៈ ព្រះរាជអាជ្ញារងកោះហៅភាគីដើមចោទ និងចុងចម្លើយឲ្យចូលឆ្លើយ២-៣លើកមកហើយដែរ តែលោកយាយថា ឈ្មោះ មាស ភារុណ កូនស្រីគាត់នេះ មិនបានចូលខ្លួនឆ្លើយបំភ្លឺនៅតុលាការទេ ។ ជាសំណូមពរ តុលាការគួរតែលើកយកសំណុំរឿងនេះមកកាត់ក្តីទៅ ដើម្បីផ្តន្ទាទោសជនបង្កអំពើហិង្សាវាយយកកាបូបប្រាក់របស់គាត់ និងសុំឲ្យតុលាការចាប់ខ្លួនកូនស្រី ដែលជាជនដៃដល់វាយគាត់ជាម្តាយរយះក្បាល យកទៅឃុំខ្លួនតាមទោសកំហុស ក្នុងបទល្មើសដូចការចោទប្រកាន់នោះ ។
លោកយាយមានតែម្រាមដៃដប់លើកប្រណម្យ ទទូចសុំយុត្តិធម៌ពីតុលាការមកវិញប៉ុណ្ណោះ គឺមិនចង់បានអ្វីទៀតឡើយព្រោះគាត់ចាស់ជរាហើយ ។ ទោះបីជាបែបណា កោះសន្តិភាពមិនអាចរកការបំភ្លឺតបពីកូនស្រីលោកយាយបានទេ ព្រោះមិនអាចទាក់ទងបានដោយគ្រាន់តែដឹងថា កូនស្រីដែលលោកយាយចោទប្រកាន់នេះ រស់នៅក្នុងសង្កាត់ទួលសង្កែ ចំណែកលោកយាយរស់នៅជាមួយក្មួយនៅម្តុំផ្សារស៊ិឡឹប ក្នុងសង្កាត់ផ្សារថ្មីទី៣ ។
នារសៀលថ្ងៃទី១ ខែសីហា កោះសន្តិភាពបានជួបលោកស្រីក្រឡាបញ្ជីមួយរូបខាងចៅក្រម សើុបសួរ និងបានប្រាប់ថា សំណុំរឿងម្តាយបង្កើតប្តឹងកូនស្រី ដោយចោទប្រកាន់ថា បានយកដំបងឈើជ្រុងវាយក្បាលគាត់នោះ គឺខាងចៅក្រមសើុបសួរបានបំពេញកាតព្វកិច្ចតាមនីតិវិធីគ្រប់ជ្រុងជ្រោយហើយ ហើយកាលពីសប្តាហ៍មុននេះ ក៏បានចាត់បញ្ជូនទៅចៅក្រមជំនុំជម្រះរួចហើយដែរ ។ ដូច្នេះ រឿងនេះបានផុតពីដៃចៅក្រម
សើុបសួរ និងបានបញ្ជូនទៅដល់ចៅក្រមជំនុំជម្រះហើយ ប៉ុន្តែមិនដឹងធ្លាក់ទៅលើដៃលោកចៅក្រមណាមួយទេ ។
លោកស្រីក្រឡាបញ្ជីបានបង្ហើបឱ្យដឹងទៀតថា ជាធម្មតាទេ គឺចុងចោទស្ថិតនៅក្រៅនីតិវិធីដំណើរការនៃការសាកសួរ ដែលអាចយឺតយ៉ាវបន្តិច ព្រោះទាំងខាងចៅក្រមទ ាំងខាងអយ្យការត្រូវការចំណាយពេលវេលាកោះហៅគូភាគីទាំងសងខាងមកសាកសួរ ។ការចេញដីកាកោះហៅដើមបណ្តឹង និងចុងចម្លើយមកសាកសួរ ត្រូវប្រើពេលវេលាច្រើនថ្ងៃ គឺ១លើកទៅ៣លើក តែបើភាគីមួយៗចូលតាមដីកាកោះ១លើកៗនោះនីតិវិធីនៃដំណើរការសាកសួរនឹងអាចឆាប់បញ្ចប់ ។ ដំណើរការសាកសួររឿងក្តី មិនអាចតម្រូវចិត្តតាមភាគីណាមួយទេ ហើយក៏មិនសន្មតថាប្រើពេលឆាប់ឬយូរដែរ សំខាន់កុំឱ្យតែក្រឡាបញ្ជី ចៅក្រម ឬព្រះរាជអាជ្ញាណាម្នាក់ទុករឿងគេចោល ។
ចំពោះសំណុំរឿងលោកយាយ ហ៊ូ សុខុម គឺបានដំណើរការទៅដោយរលូន និងតាមនីតិវិធីទៀតផង តុលាការមិនអាចតម្រូវចិត្តដើមបណ្តឹងដែលចង់បាននោះទេ ។ ចំពោះការលើកឡើងថា ភាគីចុងចោទមិនដែលបានចូលមកឆ្លើយបំភ្លឺនោះជារឿងមិនពិតទេ ចុងចម្លើយគឺអ្នកស្រី មាស ភារុណ បានចូលឆ្លើយបំភ្លឺនៅគ្រប់ដំណាក់កាលកោះហៅ ។ ការឆ្លើយបំភ្លឺរបស់ចុងចោទ គឺផ្ទុយពីពាក្យបណ្តឹងរបស់ដើមចោទ តែទោះជាយ៉ាងណា តុលាការបានបំពេញតាមនីតិវិធីទាំងអស់ ៕
ចែករំលែកព័តមាននេះ