ខេត្តព្រៃវែង ៖ កម្លាំងកងរាជអាវុធហត្ថខេត្តព្រៃវែង ក្រោមការបញ្ជាផ្ទាល់ពីលោកឧត្តមសេនីយត្រី ឈួន គឹមសាន្ត មេបញ្ជាការខេត្ត បានបើកប្រតិបត្តិការដ៏ធំមួយ ធ្វើការបង្ក្រាបករណីជួញដូរគ្រឿងញៀន នៅស្រុកកំចាយមារ…
ខេត្តព្រៃវែង ៖ កម្លាំងកងរាជអាវុធហត្ថខេត្តព្រៃវែង ក្រោមការបញ្ជាផ្ទាល់ពីលោកឧត្តមសេនីយត្រី ឈួន គឹមសាន្ត មេបញ្ជាការខេត្ត បានបើកប្រតិបត្តិការដ៏ធំមួយ ធ្វើការបង្ក្រាបករណីជួញដូរគ្រឿងញៀន នៅស្រុកកំចាយមារ ដោយបានធ្វើការឃាត់ខ្លួនជនសង្ស័យជាបន្តបន្ទាប់រហូតដល់ទៅ៧នាក់ និងដកហូតបានថ្នាំញៀនចំនួន១៧កញ្ចប់ កាលពីថ្ងៃទី៣១ កក្កដា និងថ្ងៃទី១ សីហា ថ្មីៗនេះ។
លោកវរសេនីយ៍ត្រី ផាត់ សុជោត ប្រធានមន្ទីរយុត្តិធម៌កងរាជអាវុធហត្ថខេត្តព្រៃវែង បានឲ្យដឹងថា ប្រតិបត្តិការណ៍នៅថ្ងៃទី១-គឺថ្ងៃទី៣១ កក្កដា វេលាម៉ោង៥ និង១៥នាទីល្ងាច កម្លាំងអាវុធហត្ថខេត្ត ធ្វើការឃាត់ខ្លួនជនសង្ស័យបានចំនួន២នាក់ នៅចំណុចភូមិទន្សាយជល់ហឹប ឃុំដូនកឹង ស្រុកកំចាយមារ ដោយម្នាក់ឈ្មោះ ពៅ ឡុក ភេទប្រុស អាយុ២២ឆ្នាំ និងម្នាក់ទៀតឈ្មោះ ធិ សម្ភស្ស ភេទប្រុស អាយុ១៨ឆ្នាំ និងដកហូតបានវត្ថុតាងថ្នាំញៀនប្រភេទម្សៅក្រាមពណ៌សចំនួន១កញ្ចប់។
ក្រោយពីស្តាប់ចម្លើយសារភាពរបស់ជនសង្ស័យទាំង២ ទើបកម្លាំងអាវុធហត្ថខេត្តកំណត់បានមុខសញ្ញា ហើយក៏ឈានទៅធ្វើការឃាត់ខ្លួនជនសង្ស័យបានចំនួន២នាក់ទៀត នៅវេលាម៉ោង៦ និង៣០នាទី ថ្ងៃដដែល នៅចំណុចភូមិគរ ឃុំដូនកឹង ស្រុកកំចាយមារ ដោយម្នាក់ឈ្មោះ រិន រាជ ភេទប្រុស អាយុ២៥ឆ្នាំ និងម្នាក់ទៀតឈ្មោះ សួន បូផាន់ ភេទប្រុស អាយុ២០ឆ្នាំ ព្រមទាំងបានឆែកឆេរ នៅក្នុងផ្ទះរបស់ឈ្មោះ រិន រាជ រកឃើញវត្ថុតាងថ្នាំញៀនប្រភេទម្សៅក្រាមពណ៌ស ចំនួន៨កញ្ចប់ ស្មើនិងទម្ងន់២,៩៩ក្រាម ដាវកែច្នៃ១ កាំបិត១ និងកន្ត្រៃ១។
ក្រោយពីត្រូវចាប់ខ្លួនបាន ជនសង្ស័យឈ្មោះ សួន បូផាន់ បានឆ្លើយសារភាពថា ថ្នាំញៀនទាំងអស់នោះ រូបគេបានមកពីឈ្មោះ មៀច រដ្ឋា ភេទប្រុស អាយុ៣០ឆ្នាំ នៅភូមិព្រៃឫស្សី ឃុំជាខ្លាង ស្រុកស្វាយអន្ទរ ទើបកម្លាំងអាវុធហត្ថខេត្តប្រើធ្នាក់អន្ទងហៅ មុខសញ្ញាឲ្យចូលស៊ង រួចក៏ធ្វើការចាប់ឃាត់ខ្លួនបាន នៅវេលាម៉ោង៩ព្រឹក ថ្ងៃទី១ សីហា នៅចំណុចភូមិ កំចាយមារជើង ឃុំក្រញូង ស្រុកកំចាយមារ និងដកហូតបានវត្ថុតាងថ្នាំញៀនម្សៅក្រាមពណ៌ស ចំនួន៤កញ្ចប់ទៀត ស្មើនិងទម្ងន់១០,៥៩ក្រាម។ សរុបមក ១ករណីនេះ កម្លាំងអាវុធហត្ថខេត្ត ធ្វើការឃាត់ខ្លួនជនសង្ស័យបានចំនួន៥នាក់ និងដកហូតបានវត្ថុតាងថ្នាំញៀនចំនួន១៣កញ្ចប់ ស្មើនិងទម្ងន់១៥,២៤ក្រាម។
លោកវរៈសេនីយត្រី ផាត់ សុជោត បានបញ្ជាក់ឲ្យដឹងទៀតថា ក្រោយពីបញ្ចប់ករណីទី១រួច នៅវេលាម៉ោង១២ និង១៥នាទី ថ្ងៃទី១ សីហាដដែលនោះ កម្លាំងរបស់លោកសហការជាមួយកម្លាំងអាវុធហត្ថស្រុកកំចាយមារ បានអនុវត្តវិធានញុះញង់ និងបង្ក្រាបក្រុមអ្នកចែកចាយថ្នាំញៀនបាន១ករណីទៀត នៅចំណុចភូមិត្បូងវត្ត ឃុំក្របៅ ស្រុកកំចាយមារ ដោយឃាត់ខ្លួនជនសង្ស័យបានចំនួន២នាក់ ទី១ឈ្មោះ ហុន ធាន ភេទប្រុស អាយុ៣៩ឆ្នាំ និងទី២ឈ្មោះ ស៊ិន សុផល ភេទប្រុស អាយុ៥៣ឆ្នាំ ដោយដកហូតបានវត្ថុតាងថ្នាំញៀនប្រភេទ-ម្សៅក្រាមពណ៌ស ចំនួន៤កញ្ចប់ ស្មើនិងទម្ងន់០.៤៣ក្រាម។ បច្ចុប្បន្ននេះ ជនសង្ស័យរួមនឹងវត្ថុតាង ទាំងករណីទី១ និងករណីទី២ ត្រូវបានឃាត់ខ្លួននៅបញ្ជាការដ្ឋានកងរាជអាវុធហត្ថខេត្តព្រៃវែង ដើម្បីកសាងសំណុំរឿង ចាត់ការទៅតាមនីតិវិធី៕
https://youtu.be/9cSnhyksW-E
ចែករំលែកព័តមាននេះ