រាជធានីភ្នំពេញ ៖ អ្នកជំនាញអចលនទ្រព្យនៃក្រុមហ៊ុនអន្តរជាតិនានាបានសម្តែងនូវសុទិដ្ឋិនិយមថា កម្ពុជានឹងទាក់ទាញអ្នកវិនិយោគអន្តរជាតិកាន់តែច្រើនថែមទៀតក្រោយការបោះឆ្នោតបានបញ្ចប់ ដែលមានបរិយាកាសល្អប្រសើរ និងស្ថិរភាពនយោបាយ ។
អ្នកនាង Grace Rachny Fong នាយិកានៃក្រុមហ៊ុន Century21 Cambodia បានមានប្រសាសន៍តាមទូរស័ព្ទនាព្រឹកថ្ងៃទី៣០ កក្កដា ថា អ្វីៗនឹងល្អប្រសើរជាងមុន ដោយសារការបោះឆ្នោតនេះបានបង្ហាញនូវសន្តិភាព សន្តិសុខ និងស្ថិរភាពនយោបាយ ដែលធ្វើឲ្យអ្នកវិនិយោគកាន់តែមានទំនុកចិត្ត ។
អ្នកនាងថា ៖« ទាំងមុនការបោះឆ្នោត កំឡុងការបោះឆ្នោត និងក្រោយការបោះឆ្នោត យើងឃើញថា ស្ថានភាពនៃការទិញ-លក់អចលនទ្រព្យ នៅតែកើនឡើង » ។ អ្នកនាងបន្ថែមថា ៖« សន្តិភាព ស្ថិរភាពនយោបាយនេះហើយ ជាអ្វីដែលពួកគេមើលឃើញ ជាអ្វីដែលអ្នកវិនិយោគកាន់តែមានទំនុកចិត្ត ហើយយើងគិតថា អ្នកវិនិយោគអន្តរជាតិ នឹងចូលមកវិនិយោគកាន់តែច្រើននៅកម្ពុជា »។
អគ្គនាយកក្រុមហ៊ុនគេហទំព័រ Realestate.com.kh លោក Tom O”Sullivan បានថ្លែងថា ក្រោយបញ្ចប់ការបោះឆ្នោត និងគិតពីពេលនេះដល់ដំណាច់ឆ្នាំ វិស័យអចលនទ្រព្យនៅកម្ពុជា នឹងកើនឡើង និងមានភាពប្រសើរឡើងកាន់តែខ្លាំង ។ លោកបន្តថា មុនការបោះឆ្នោត អ្នកវិនិយោគនិយាយពីបញ្ហាស្ថិរភាពនយោបាយ ប៉ុន្តែលទ្ធផល និងដំណើរការនៃការបោះឆ្នោតបានបង្ហាញរួចហើយថា កម្ពុជាមានសន្តិភាព និងស្ថិរភាពនយោបាយ ។ លោកបន្តថា ឧស្សាហកម្មអចលនវត្ថុនៅកម្ពុជា នឹងបន្តរីកចម្រើនខ្លាំងបន្ថែមទៀតនាពេលខាងមុខ ពិសេសក្រោយការបោះឆ្នោត។ លោកបន្តថា ៖« កម្ពុជានឹងទាក់ទាញអ្នកវិនិយោគចិន ជប៉ុន កូរ៉េ និងបណ្តាអ្នកវិនិយោគមកពីប្រទេសក្នុងតំបន់នឹងចូលមកកម្ពុជាកាន់តែច្រើន » ។
នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានថ្លែងថា ការពិត ស្ថានភាពមុន និងក្រោយការបោះឆ្នោត មិនមានអ្វីផ្លាស់ប្តូរគួរឲ្យកត់សម្គាល់នោះទេ ព្រោះបរិយាកាសនយោបាយមិនជះឥទ្ធិពលដល់វិស័យនេះទេ ព្រោះស្ថានភាពជាក់ស្តែង គឺដោយសារកត្តាទីផ្សារខ្លួនឯងប៉ុណ្ណោះ ។ អ្នកនាងបន្តថា ហេតុនេះ យើងគិតថា ក្រោយការបោះឆ្នោត វិស័យនេះនឹងកាន់តែមានភាពល្អប្រសើរជាងមុន និងទទួលបានអ្នកវិនិយោគកាន់តែច្រើនថែមទៀត ។
លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា បានថ្លែងថា ក្រោយការបោះឆ្នោតមានប្រតិកម្មពីសហរដ្ឋអាមេរិកទាក់ទងនឹងបញ្ហានយោបាយនៅកម្ពុជា ព្រោះមេបក្សដែលបានរលាយហើយនោះមិនទាន់អស់ចិត្តទេ ។ ហេតុនេះ ស្ថានភាពហាក់មិនច្បាស់លាស់ ប៉ុន្តែបើពិនិត្យមើលស្ថានភាពសេដ្ឋកិច្ចកម្ពុជា នឹងនៅតែរក្សាបានកំណើនរឹងមាំនៅ៥ឆ្នាំខាងមុខ ព្រោះតាមការវាយតម្លៃរបស់ស្ថាប័នអន្តរជាតិ ដូចជា ADB, IMF និង World Bank បានបង្ហាញថា សេដ្ឋកិច្ចកម្ពុជានៅតែមានកំណើនយ៉ាងរឹងមាំ តាមរយៈការធ្វើពិពិធកម្មសេដ្ឋកិច្ចកម្ពុជា ។
លោកបន្តថា ៖« តាមរយៈចំនួនអ្នកទៅចូលរួមបោះឆ្នោតជាង៨០% ពិតជាបានបង្ហាញទៅមជ្ឈដ្ឋានអន្តរជាតិរួចហើយថា ប្រទេសកម្ពុជាមានសុខសន្តិភាព ស្ថិរភាពនយោបាយ និងប្រជាធិបតេយ្យពេញលេញ ដែលអាចផ្តល់ទំនុកចិត្តដល់អ្នកវិនិយោគមកវិនិយោគនៅកម្ពុជាកាន់តែច្រើន បន្ទាប់ពីការបោះឆ្នោត » ៕
ចែករំលែកព័តមាននេះ