ម្ចាស់ផ្ទះភ័យព្រលឹងចុងសក់ …ស្លា.ប់ម្នាក់នៅកន្លែងភ្លាមៗ
- ភ្នំពេញ
រាជធានីភ្នំពេញ ៖ បុរសជាសន្តិសុខម្នាក់ជិះម៉ូតូត្រឡប់មកពីបោះឆ្នោត និងទៅលេងប្រពន្ធកូននៅស្រុកកំណើតពេលត្រឡប់មកភ្នំពេញវិញដល់ពាក់កណ្តាលផ្លូវត្រូវរថយន្តមួយគ្រឿងធ្វើដំណើរបញ្ច្រាសទិសគ្នាបុកចំពីមុខពេញទំហឹង បណ្តាលឲ្យប៉ើងជាង៧០ម៉ែត្រ បាក់ដៃបាក់ជើងទាំងបោកក្បាលហូរឈាមស្លាប់ភ្លាមៗនៅកន្លែងកើតហេតុ ។ ចំណែករថយន្តមិនទាន់អស់ល្បឿនបានងាកចង្កូតទៅខាងស្តាំជ្រុលទៅចូលផ្ទះជួសជុលម៉ូតូរបស់ប្រធានប្រជាការពារភូមិ បណ្តាលឲ្យរលំខូចខាតទាំងស្រុង និងបុកចំគ្រែគាត់កំពុងសម្រាន្តប៉ើងទាំងគ្រែ…
ចំណែករថយន្តមិនទាន់អស់ល្បឿនបានងាកចង្កូតទៅខាងស្តាំជ្រុលទៅចូលផ្ទះជួសជុលម៉ូតូរបស់ប្រធានប្រជាការពារភូមិ បណ្តាលឲ្យរលំខូចខាតទាំងស្រុង និងបុកចំគ្រែគាត់កំពុងសម្រាន្តប៉ើងទាំងគ្រែ និងមនុស្សរមូលជាប់ជាមួយមុងចេញពីក្នុងផ្ទះជាង១០ម៉ែត្រធ្លាក់ទៅក្រោមធ្វើឲ្យម្ចាស់ផ្ទះភ័យព្រលឹងចុងសក់ដែលហេតុការណ៍គួរឲ្យរន្ធត់ និងហួសចិត្តនេះដែរបានកើតឡើង កាលពីវេលាម៉ោង៩និង៣០នាទីយប់ថ្ងៃទី៣០ ខែកក្កដា នៅតាមបណ្តោយផ្លូវជាតិលេខ១ ចន្លោះគីឡូម៉ែត្រលេខ១៦ ភូមិយកបាទ សង្កាត់ក្បាលកោះ ខណ្ឌច្បារអំពៅ ។
សពជនរងគ្រោះមានឈ្មោះ ម៉ម សិដ្ឋ អាយុ២៧ឆ្នាំ ភេទប្រុស មុខរបរសន្តិសុខ មានប្រពន្ធនិងកូនប្រុសតូចម្នាក់ ស្នាក់នៅវត្តបទុមវត្តី មានស្រុកកំណើតភូមិអណ្តូងតាស្រែន ឃុំជ្រែស ស្រុកមេសាង ខេត្តព្រៃវែង ។
ប្រភពព័ត៌មានពីកន្លែងកើតហេតុបានប្រាប់ឲ្យដឹងថា មុនកើតហេតុគេឃើញសពបុរសខាងលើជិះម៉ូតូមួយគ្រឿង ពណ៌ក្រហម ពាក់ស្លាកលេខ ភ្នំពេញ1CW -5060 ធ្វើដំណើរពីខេត្តចូលមកភ្នំពេញ តាមផ្លូវជាតិលេខ១ ទិសដៅពីត្បូងទៅជើង មកដល់ចំណុចកើតហេតុ ស្រាប់តែមានមានរថយន្តមួយគ្រឿង ពណ៌ទឹកប្រាក់ ពាក់ស្លាកលេខ ភ្នំពេញ 2AI-2100 ជិះគ្នា២នាក់ប្តីប្រពន្ធ បើកបរដោយបុរសជាប្តីធ្វើដំណើរបញ្ច្រាសទិសគ្នាបានបុកគ្នាជាមួយម៉ូតូជនរងគ្រោះចំពីមុខពេញទំហឹង បណ្តាលឲ្យប៉ើងទាំងម៉ូតូនឹងមនុស្សជាង៧០ម៉ែត្រហើយបាក់ដៃជើងទាំងសង្ខាងនឹងបោកក្បាលហូរឈាមស្លាប់ភ្លាមៗយ៉ាងអាណោចអាធម៌ ។ ចំណែករថយន្តខ្ទេចមួយកំណាត់មុខទាំងស្រុង ។ ហើយរថយន្តបង្កបានរ៉េចង្កូតទៅខាងស្តាំដូចជាប្រឹងគេចម៉ូតូក៏ជ្រុលទៅបុកចូលផ្ទះជួសជុលម៉ូតូរបស់ប្រធានប្រជាការពារភូមិ បណ្តាលឲ្យខូចខាតទាំងស្រុងថែមទៀត ។
ប្រភពពីម្ចាស់ផ្ទះរងគ្រោះបានប្រាប់ឲ្យដឹងថា រូបគាត់ឈ្មោះ ពេញ វណ្ណា អាយុ៥១ឆ្នាំ ជាប្រធានប្រជាការពារភូមិ និងជាជាងជួសជុលម៉ូតូ ។ ទ្រព្យសម្បត្តិដែលខូចខាតរួមមានផ្ទះឈើប្រក់ស័ង្កសីផ្ទាល់ដីមួយខ្នង ទំហំ៣ម៉ែត្រកន្លះគុណនឹង៦ម៉ែត្រ ឧបករណ៍ជួសជុលម៉ូតូនឹង គ្រឿងបន្លាស់ម៉ូតូមួយចំនួនព្រមទាំងទ្រព្យសម្បត្តិមានតម្លៃផ្ទាល់ខ្លួនមួយចំនួនទៀត ។
ប្រភពពីម្ចាស់ផ្ទះបានប្រាប់ឲ្យដឹងថា មុនពេលកើតហេតុរូបគាត់កំពុងតែសម្រាន្តលង់លក់នៅលើគ្រែក្នុងផ្ទះរបស់គាត់តែម្នាក់ឯង ស្រាប់តែរថយន្តបង្កខាងលើបុករះចូលក្នុងផ្ទះយ៉ាងកំរោលបណ្តាលឲ្យរលំខ្ទេចខ្ទីអស់នឹងបុកទាំងគ្រែគាត់ប៉ើងជាង១០ម៉ែត្រចេញពីក្នុងផ្ទះទាំងគ្រែនឹងមនុស្សរមូលជាប់ក្នុងមុង ដូចត្រីជាប់មង ធ្លាក់ទៅក្រោមបុកផ្ទប់នឹងជញ្ជាំងផ្ទះគេ ហើយរថយន្តក៏ធ្លាក់ទៅតាមដែរ តែសំណាងគាត់មិនបានរងរបួសអ្វីធ្ងន់ធ្ងរនោះ គឺខូចខាចតែទ្រព្យសម្បត្តិតែប៉ុណ្ណោះ ។ ភ្លាមៗគាត់បានឃើញតៃកុងឡានបើកទ្វាររថយន្តរត់គេចខ្លួន គាត់បម្រុងនឹងឃាត់តែខ្លួនគាត់រមូលជាប់ជាមួយមុងចេញមិនរួចបានត្រឹមស្រែកឲ្យប្រជាពលរដ្ឋជួយទម្រាំនឹងគេចេញមកជួយ តៃកុងរថយន្តបង្ករត់គេចខ្លួនបាត់ស្រមោលដោយសុវត្ថិភាពហើយ ។
ក្រោយកើតហេតុសពរងគ្រោះត្រូវសាច់ញាតិមកទទួលនឹងដឹកយកទៅធ្វើបុណ្យនៅស្រុកកំណើតខាងប្រពន្ធនៅស្រុកបាភ្នំ ខេត្តព្រៃវែង ចំណែកខាងផ្ទះប្រជាការពារត្រូវដែលខូចខាតសមត្ថកិច្ចបានធ្វើកំណត់ហេតុ នឹងវាស់វែងយកម៉ូតូរងគ្រោះនឹងរថយន្តបង្កទៅរក្សាទុកនៅការិយាល័យនគរបាលចរាចរណ៍ក្រុងរង់ចាំម្ចាស់រថយន្តចូលខ្លួនមកដោះស្រាយតាមផ្លូវច្បាប់ ៕
ចែករំលែកព័តមាននេះ