រាជធានីភ្នំពេញ ៖ អ្នកនាំពាក្យគណៈកម្មាធិការជាតិរៀបចំការបោះឆ្នោត លោកហង្ស ពុទ្ធា នៅថ្ងៃទី៣០ ខែកក្កដា ឆ្នាំ២០១៨ បានច្រានចោលលើការលើកឡើងរបស់អាមេរិកដែលមិនទទួលស្គាល់លទ្ធផលការបោះឆ្នោតជ្រើសតាំងសមាជិកសភាកម្ពុជា អាណត្តិទី៦ ដែលបានធ្វើឡើងកាលពីថ្ងៃទី២៩ កក្កដា ម្សិលមិញនេះ ។
ការច្រានចោលរបស់អ្នកនាំពាក្យបានធ្វើឡើងនៅក្នុងសន្និសីទសារព័ត៌មានរួមជាមួយអ្នកសង្កេតការណ៍អន្តរជាតិនៅសណ្ឋាគារកាំបូឌីយាណា ដោយលោកបានលើកឡើងថា៖ «សមាជិកព្រឹទ្ធសភាអាមេរិកម្នាក់មកជួបខ្ញុំបាននិយាយថា លោកមានការសោកស្តាយយ៉ាងខ្លាំងដែលរដ្ឋាភិបាលរបស់លោកបានលូកដៃចូលក្នុងកិច្ចការផ្ទៃក្នុងរបស់ប្រទេសកម្ពុជា»។
លោកបន្តថា សេចក្តីថ្លែងការណ៍របស់អាមេរិកពាក់ព័ន្ធនឹងការបោះឆ្នោតនេះមានលក្ខណៈនយោបាយច្រើន។ លោកថាប្រទេសកម្ពុជារងគ្រោះដោយសារកម្ពុជាមិនចេះបង្កើតលទ្ធិប្រជាធិបតេយ្យ ឬ កម្មុយនិស្តទេ។ នៅពេលដែលលទ្ធិទាំងពីរនេះ (ប្រជាធិបតេយ្យនិងកម្មុយនិស្ត) ចូលមកដល់ប្រទេសកម្ពុជាមានការបែងចែកគ្នា។
លោកបានលើកឡើងថាក្នុងនោះមានក្រុមអ្នកកាន់អំណាចនិងក្រុមអ្នកជំទាស់ តែតួនាទីរបស់ គ.ជ.ប អនុវត្តទៅតាមច្បាប់គោលបំណងក្នុងការផ្លាស់ប្តូរអំណាចគ្រប់គ្រងរដ្ឋបានដោយសន្តិវិធីដោយអហិង្សា។ ចំពោះអហិង្សាដែលពិភពលោកបានរកឃើញ និងអនុវត្តនោះ គឺគ្មានទេនៅកម្ពុជា គឺមានតែការបោះឆ្នោតដោយសេរីនិងយុត្តិធម៌ នេះ។ ការបោះឆ្នោត គឺប្រព្រឹត្តទៅតាមច្បាប់គ្មានប្រទេសណាមួយមិនអនុវត្តតាមច្បាប់នោះទេ។
កម្ពុជាបានអនុវត្តតាមច្បាប់កម្ពុជា នៅប្រទេសឥណ្ឌូនេស៊ីគោរពច្បាប់ឥណ្ឌូនេស៊ី បារាំងគោរពច្បាប់បារាំង។ ចំពោះកម្ពុជាបានគោរពច្បាប់កម្ពុជា ហើយពលរដ្ឋខ្លួនឯងទទួលខុសត្រូវចំពោះការសម្រេចចិត្ត។ លោកបានលើកឡើងថា៖ «ការសម្រេចចិត្តរបស់ប្រទេសខាងក្រៅអាចជាការភាន់ច្រឡំដែរ»។
ប្រតិកម្មរបស់ថ្នាក់ដឹកនាំ គ.ជ.ប ធ្វើឡើងបន្ទាប់ពីការិយាល័យរដ្ឋមន្ត្រីទទួលបន្ទុកព័ត៌មានរបស់សេតវិមានអាមេរិកចេញសេចក្តីថ្លែងការណ៍នារសៀលថ្ងៃទី ២៩ កក្កដា ថាការបោះឆ្នោតសភាដែលមានកំហុសឆ្គងនៅកម្ពុជា ។
សេចក្តីថ្លែងការណ៍បានលើកឡើងថា៖ «សហរដ្ឋអាមេរិកមានការសោកស្តាយដែលការបោះឆ្នោតសភានៅកម្ពុជា នៅថ្ងៃទី ២៩ ខែកក្កដា គ្មានភាពសេរី និងយុត្តិធម៌ ហើយមិនតំណាងអោយឆន្ទៈរបស់ប្រជាជនកម្ពុជា។ ការបោះឆ្នោតដែលមានកំហុសឆ្គងនេះ ដែលបានផាត់ចេញនូវគណបក្សប្រឆាំងសំខាន់ជាងគេនៅកម្ពុជា គឺជាបរាជ័យមួយយ៉ាងធំបំផុតចំពោះប្រព័ន្ធប្រជាធិបតេយ្យ ដែលមានចែងនៅក្នុងរដ្ឋធមុ្មនុញ្ញនៃប្រទេសកម្ពុជា ហើយកាត់បន្ថយយ៉ាងច្រើននូវការសំរេចបានរបស់ប្រទេសកម្ពុជា នៅក្នុងការជំរុញការផ្សះផ្សានយោបាយ និងកំណើនសេដ្ឋកិច្ច តាំងពីមានកិច្ចព្រមព្រៀងសន្តិភាពទីក្រុងប៉ារីស ឆ្នាំ ១៩៩១ មក»៕
ចែករំលែកព័តមាននេះ