ខេត្តបាត់ដំបង ៖ ឥទ្ធិពលទឹកភ្លៀង ដែលបានបង្អោរធ្លាក់ជាបន្តបន្ទាប់ជិត១សប្ដាហ៍ចុងក្រោយនេះ បាននិងកំពុងយាយីយ៉ាងខ្លាំងដល់ផលដំណាំ និងលំនៅឋានរបស់ប្រជាពលរដ្ឋនៅតាមបណ្ដាឃុំមួយចំនួន ក្នុងស្រុកសំឡូត ។ នេះបើតាមលោកអភិបាលស្រុកសំឡូតបានប្រាប់កោះសន្តិភាព នៅព្រឹកថ្ងៃទី២៨ កក្កដា នេះ ប៉ុន្តែមិនទាន់បង្កឱ្យមានគ្រោះថ្នាក់ដល់ប្រជាពលរដ្ឋ ឬសត្វពាហនៈនៅឡើយទេ ។
លោកជេស សាម៉េត អភិបាលស្រុកសំឡូតបានប្រាប់តាមទូរស័ព្ទថា ជិតមួយសប្ដាហ៍ហើយ ដែលភ្លៀងបានគ្របដណ្ដប់ស្ទើរទូទាំងស្រុកសំឡូត ។ ប៉ុន្តែធ្ងន់ធ្ងរបំផុត នៅយប់ថ្ងៃទី២៨ កក្កដា ដែលភ្លៀងបានធ្លាក់ស្ទើរពេញមួយយប់តែម្ដង ដែលធ្វើឱ្យលិចផលដំណាំ និងលំនៅឋានមួយចំនួនរបស់ប្រជាពលរដ្ឋ ។ លោកអភិបាលស្រុកបានប្រាប់ថា ជំនន់ទឹកភ្លៀងនេះ បានប៉ះទង្កិចទៅលើឃុំចំនួន៤ ដែលមើលទៅហាក់មានសភាពធ្ងន់ធ្ងរជាងគេ គឺនៅឃុំតាតោក ឃុំសំឡូត ឃុំកំពង់ល្ពៅ និងឃុំស៊ុង ។
លោកអភិបាលស្រុកបានបញ្ជាក់ថា ពេលនេះ ទឹកភ្លៀងបាននិងកំពុងជន់លិចលំនៅឋាន និងផលដំណាំមួយចំនួន នៅក្នុងឃុំទាំង៤ខាងលើនេះ ដែលមន្ត្រីនៅតាមមូលដ្ឋានកំពុងចុះត្រូតពិនិត្យ ដើម្បីធ្វើរបាយការណ៍ជូនថ្នាក់ដឹកនាំ ។ ប៉ុន្តែលោកអភិបាលស្រុកបានបញ្ជាក់ថា អ្វីដែលលោកបារម្ភនោះ គឺទីតាំងការិយាល័យបោះឆ្នោតក្នុងឃុំខ្លះ កំពុងជួបហានិភ័យដោយសារទឹកជន់លិច ដែលធ្វើឲ្យប្រជាពលរដ្ឋមិនអាចធ្វើដំណើរទៅបោះឆ្នោតបាន ប្រសិនបើដល់ថ្ងៃបោះឆ្នោតភ្លៀងនៅតែមិនព្រមរាំង ។
លោកជេស សាម៉េត បានបញ្ជាក់ដែរថា នេះជាជំនន់ទឹកភ្លៀង តែវាអាចស្រកវិញយ៉ាងឆាប់រហ័សប្រសិនបើអាកាសធាតុថមថយវិញ ព្រោះទឹកស្ទឹងនៅសំឡូត ក៏មិនទាន់ជន់ជោរខ្លាំងដែរ ដូច្នេះទឹកជំនន់នេះ នឹងអាចស្រកវិញ បើមេឃរាំង។
លោកបានបន្ថែមថា ពេលនេះ អាជ្ញាធររបស់លោកកំពុងចុះស្រង់របាយការណ៍អំពីផលប៉ះពាល់ ហើយបើតាមរបាយការណ៍ គឺជំនន់ទឹកភ្លៀងនេះ បានបង្កឲ្យប៉ះពាល់ដល់លំនៅឋាន និងផលដំណាំមួយចំនួនរបស់ប្រជាពលរដ្ឋ តែមិនទាន់មានសេចក្ដីរាយការណ៍អំពីការគ្រោះថ្នាក់មនុស្ស និងសត្វពាហនៈនៅឡើយទេ ។
ចែករំលែកព័តមាននេះ