រាជធានីភ្នំពេញ ៖ បុរសម្នាក់ត្រូវបានមិត្តភក្តិខលហៅទៅចូលរួមផឹកស៊ីជាមួយតាំងពីព្រលប់រហូតដល់វេលាយប់ជ្រៅទើបត្រឡប់ចូលផ្ទះវិញក្នុងស្ថានភាពស្រវឹង បន្ទាប់មកបានចូលទៅដេកជាធម្មតា ។ លុះដល់ព្រឹកឡើង ស្រាប់តែមានការភ្ញាក់ផ្អើលកើតឡើងខណៈពេលដែលស្ត្រីជាប្រពន្ធដាស់ឲ្យក្រោកដើម្បីទៅធ្វើការងារប្រទះឃើញគាត់ដេកស្លាប់បាត់ទៅវិញ ។ ហេតុការណ៍ភ្ញាក់ផ្អើលខាងលើបានកើតឡើងកាលពីវេលាម៉ោង៥និង១០នាទីព្រឹកថ្ងៃទី២៧ ខែកក្កដា ឆ្នាំ២០១៨ ស្ថិតនៅក្នុងភូមិចុងបង្គោល ឃុំបែកចាន ស្រុកអង្គស្នួល ខេត្តកណ្តាល ។
បុរសដែលស្លាប់នោះឈ្មោះ ចក់ ពុទ្ធារ៉ា អាយុ៣៧ឆ្នាំ ជនជាតិខ្មែរ មុខរបរកម្មករសំណង់ មានទីលំនៅក្នុងភូមិកើតហេតុខាងលើ ។ មានប្រពន្ធឈ្មោះ ស៊ូ ណាត អាយុ៣៥ឆ្នាំ មុខរបរកម្មការនីរោងចក្រ និង មានកូនប្រុសម្នាក់ និងស្រីម្នាក់ក្នុងបន្ទុកគ្រួសារ ។
តាមស្ត្រីជាប្រពន្ធបានឲ្យដឹងថា នៅវេលាម៉ោង៧និង២០នាទីយប់ ថ្ងៃទី២៦ ខែកក្កដា ឆ្នាំ២០១៨ ក្រោយពីត្រឡប់មកពីទទួលគាត់ចេញពីធ្វើការរោងចក្រវិញដល់ផ្ទះមានមិត្តភក្តិម្នាក់ខលហៅទៅផឹកស្រាជាមួយរហូតដល់ម៉ោងប្រហែល១១និង១៥នាទីយប់ ថ្ងៃដដែលទើបត្រឡប់ចូលផ្ទះ រួចបានឡើងដេកនៅលើគ្រែជាមួយគ្នាគាត់ ហើយខណៈនោះគាត់មិនបានដឹងថា ប្ដីស្លាប់នោះឡើយ ព្រោះគាត់បានដេកលង់លក់ដោយមិនដឹងខ្លួនដែរ ។ លុះដល់វេលាម៉ោង៥និង១០នាទីព្រឹកថ្ងៃទី២៧ ខែកក្កដា នេះក្រោយពីភ្ញាក់ពីដំណេកគាត់ដាស់ប្ដីឲ្យក្រោកទៅធ្វើការ ប៉ុន្តែអត់ភ្ញាក់សោះខុសប្លែកពីរាល់ថ្ងៃ ។ ពេលនោះគាត់ក៏ទៅចាប់អង្រួន ស្រាប់តែមានការតក់ស្លុតស្ទើរគាំងបេះដូង ព្រោះឃើញប្ដីស្លាប់ និងមានសភាពស្តូកស្តឹងទៅហើយ ។ ប៉ុន្តែដោយមិនអស់ចិត្តគាត់បានចាប់ធ្វើចលនាបេះដូងជាការសង្គ្រោះបឋម តែប្ដីនៅតែមិនដឹងខ្លួនទៀត ។
ក្រោយពេលកើតហេតុនគរបាលផ្នែកពិនិត្យ និងវិភាគកន្លែងកើតហេតុស្រុកអង្គស្នួលបានចុះទៅកាន់កន្លែងកើតហេតុ ដោយមានចូលរួមពីមន្ត្រីក្រុមប្រឹក្សាឃុំ គ្រូពេទ្យ លោកមេភូមិ នគរបាលប៉ុស្តិ៍ នឹងឪពុកម្តាយបងប្អូនរបស់បុរសនោះផងធ្វើការពិនិត្យកោសល្យវិច្ច័យឃើញថា ជនរងគ្រោះបានស្លាប់ដោយសារខ្យល់គ ហើយបានប្រគល់សពទៅឲ្យក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ