ខេត្តកណ្តាល ៖ នគរបាលស្រុកកោះធំ បានចាប់ខ្លួនបុរសម្នាក់ដាក់ខ្នោះ បន្ទាប់ពីផឹកស្រាស្រវឹងខ្លាំង ហើយទាស់ពាក្យសម្តីជាមួយប្រពន្ធ ក៏យកបាយកំពុងដាំក្នុងឆ្នាំងជះដាក់លើប្រពន្ធនិងកូនង៉ែត បណ្ដាលឱ្យរលាក កាលពីវេលាម៉ោង៥ល្ងាចថ្ងៃទី២៤ កក្កដា នៅលើទូកស្នាក់នៅរបស់ខ្លួន ក្នុងភូមិព្រែកខ្នាច ឃុំលើកដែក ស្រុកកោះធំ ។
មន្ត្រីនគរបាលស្រុកកោះធំបានឱ្យដឹងថា ជនកំរោលម្នាក់នេះឈ្មោះ ឈា ឈង អាយុ៣៧ឆ្នាំ មានរបរជាអ្នកនេសាទ ។ ចំណែកប្រពន្ធឈ្មោះ ធី គឹមលាង អាយុ២៥ឆ្នាំ និងកូនង៉ែតទើបកើតបាន១០ថ្ងៃប៉ុណ្ណោះឈ្មោះ ឈង គីមហេង ភេទស្រី ។ប្រភពដដែលឱ្យដឹងទៀតថា មុនពេលកើតហេតុ បុរសជាប្តីបានទៅផឹកស៊ីរហូតស្រវឹងជោក ទើបត្រឡប់មកទូកស្នាក់នៅនេសាទរបស់ខ្លួនវិញ ។ ពេលមកដល់ទូក បានបើកធុងបាស់ស្ដាប់ ខណៈនោះស្រាប់តែ
កូនៗឈ្លោះប្រកែកវាយតប់គ្នា ធ្វើឲ្យបុរសរូបនេះខឹង ក៏វាយកូន ។
ដោយឃើញបែបនេះ ប្រពន្ធក៏បន្ទោសបណ្តាលឲ្យកើតជាទំនាស់ពាក្យសម្តីគ្នា ហើយបុរសនេះក៏បានលើកឆ្នាំងដាំបាយ ដែលប្រពន្ធកំពុងដាំនៅលើចង្ក្រានមកជះដាក់ប្រពន្ធនិងកូនតូចទើបនឹងកើតបាន១០ថ្ងៃកំពុងបៅ បណ្ដាលឱ្យរលាកមុខកូនតូច និងរលាកខ្លួនប្រាណប្រពន្ធដែលទើបសម្រាលកូន ។ឃើញសភាពបែបនេះ ប្រពន្ធក៏ពុំបានតបតអ្វីទេ និងបានរាយការណ៍ទៅនគរបាលប៉ុស្ដិ៍លើកដែកឱ្យជួយអន្តរាគមន៍ ។ ក្រោយពីទទួលបានព័ត៌មាននេះភ្លាម នគរបាលប៉ុស្ដិ៍បានចុះទៅដល់ និងឃាត់ខ្លួនបុរសជាប្តីបញ្ជូនទៅកាន់អធិការដ្ឋាននគរបាលស្រុក ៕
ចែករំលែកព័តមាននេះ