រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានវាយតម្លៃរបស់ក្រុមជនបរទេសមួយចំនួនដែលធ្វើការវិស័យសិទ្ធិមនុស្សមកលើករដ្ឋាភិបាលកម្ពុជា គឺជាការលម្អៀង ។ ការលើកឡើងរបស់អ្នកនាំពាក្យគណបក្សកាន់អំណាចនេះ…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានវាយតម្លៃរបស់ក្រុមជនបរទេសមួយចំនួនដែលធ្វើការវិស័យសិទ្ធិមនុស្សមកលើករដ្ឋាភិបាលកម្ពុជា គឺជាការលម្អៀង ។
ការលើកឡើងរបស់អ្នកនាំពាក្យគណបក្សកាន់អំណាចនេះ បន្ទាប់ពីក្រុមអង្គការសង្គមស៊ីវិល អន្តរជាតិចំនួនបួនរកឃើញថា ការរៀបចំការបោះឆ្នោតខាងមុខ គឺជាឆាកល្ខោនតែប៉ុណ្ណោះ ព្រោះការបោះឆ្នោតខាងមុខ គ្មានភាពសេរីត្រឹមត្រូវ និងយុត្តិធម៌នោះ ឡើយ ។ យ៉ាងណាក្តីលោក សុខ ឥសាន បានអះអាងឲ្យដឹងនៅថ្ងៃទី២៦ កក្កដាថា ប្រទេសកម្ពុជាជាប្រទេសឯករាជ្យ និងមានអធិបតេយ្យពេញលេញ ។ មានតែប្រជាជនកម្ពុជាទេដែលជាអ្នក សម្រេចជោគវាសនារបស់ប្រទេសកម្ពុជា ដែលគ្មានជនបរទេសណាអាចរំលោភលើសិទ្ធិអធិបតេយ្យរបស់ប្រជាជនកម្ពុជាបានជាដាច់ខាត ។
លោកបន្តថា ដំណើរការបោះឆ្នោតនៅកម្ពុជា គឺជាសំណូមពរចង់បានរបស់ប្រជាជនកម្ពុជា ស្របតាមគោលការណ៍លទ្ធិប្រជាធិបតេយ្យរបស់កម្ពុជា ។ ប្រជាជនកម្ពុជាដែលមានឈ្មោះក្នុងបញ្ជីបោះឆ្នោតនឹងអញ្ជើញទៅបំពេញករណីកិច្ច និងកាតព្វកិច្ចរបស់ខ្លួន ស្របតាមរដ្ឋធម្មនុញ្ញ ក្នុងនាមជាអ្នកសម្រេចជោគវាសនារបស់ប្រទេសខ្លួនដែលជនបរទេសគ្មានសិទ្ធិទាល់តែសោះ ។
លោកបញ្ជាក់ថា «បរទេសណាទទួលស្គាល់ ប្ញមិនទទួលស្គាល់ជារឿងរបស់បរទេសនោះ តែវាអាស្រ័យលើការទទួលស្គាល់របស់ប្រជាជនកម្ពុជាជាកត្តាកំណត់ ។ នៅឆ្នាំ១៩៩៨ ការបោះឆ្នោតត្រូវបានសហគមន៍អឺរ៉ុបវាយតម្លៃថា ជាអច្ឆរិយតាមដងទន្លេមេគង្គ តែទណ្ឌិតបានទាត់ ចោលជាការឥតប្រយោជន៍ តើគិតយ៉ាងណា ? មានសារសំខាន់ឬទេ ហេតុម៉េចបានជាបាត់មាត់មិននិយាយផង ?» ។ ជាមួយគ្នានោះដែរ អ្នកនាំពាក្យគណបក្សកាន់អំណាចក៏បានលើកឡើងថា បរិយាកាសបោះឆ្នោតល្អមានសន្តិភាព ស្ថិរភាពនយោបាយ មានសុខសុវត្ថិភាពល្អ មិនដូចជនបរទេសម្នាក់កំពុងបំភិតបំភ័យមិនឲ្យជនជាតិខ្លួនចូលទៅជិតទីប្រជុំជនខ្លាចគ្រោះថ្នាក់ ។ នៅកម្ពុជានាយករដ្ឋមន្ត្រី មិនដែលថ្លែងសារនៅក្នុងបន្ទប់កញ្ចក់ដូចប្រធានាធិបតីប្រទេសខ្លះ ដោយខ្លាចគេបាញ់នោះទេ ។ លោកបន្ថែមថា ដូច្នេះការវាយតម្លៃ និងសន្និដ្ឋានណាមួយផ្ទុយពីសភាពការណ៍ពិតនៅកម្ពុជា អាចចាត់ទុកជាចេតនាទុច្ចរិតចង់បំផ្លាញការបោះឆ្នោត និងកាន់ជើងអតីតបក្សប្រឆាំងតែប៉ុណ្ណោះ ។
សូមជម្រាបថា ការលើកឡើងរបស់អ្នកនាំពាក្យគណបក្សកាន់អំណាចនេះ បន្ទាប់ពីក្រុមអង្កការសង្គមស៊ីវិលអន្តរជាតិចំនួន៤ ត្រូវបានវិទ្យុអាស៊ីសេរីស្រង់សំដីផ្សាយការរៀបចំការបោះឆ្នោត ខាងមុខមើលទៅដូចជា មានប្រជាធិបតេយ្យយ៉ាងណា ប៉ុន្តែការពិត គឺអ្វីៗដែលកំពុង រៀបចំនេះ គឺជាឆាកល្ខោនតែប៉ុណ្ណោះ ព្រោះការបោះឆ្នោតខាងមុខគ្មានភាពសេរីត្រឹមត្រូវ និងយុត្តិធម៌នោះឡើយ ៕
ចែករំលែកព័តមាននេះ