រាជធានីភ្នំពេញ ៖ បើនិយាយពីមៀនខ្មែរ គ្រប់គ្នាតែងនឹកទៅដល់មៀននៅកោះអន្លង់ចិន ព្រោះវាមានផ្លែធំ, សាច់ក្រាស់ និងរសជាតិឈ្ងុយផ្អែមជាប់មាត់ ។ ជារៀងរាល់ឆ្នាំ រដូវមៀន…
រាជធានីភ្នំពេញ ៖ បើនិយាយពីមៀនខ្មែរ គ្រប់គ្នាតែងនឹកទៅដល់មៀននៅកោះអន្លង់ចិន ព្រោះវាមានផ្លែធំ, សាច់ក្រាស់ និងរសជាតិឈ្ងុយផ្អែមជាប់មាត់ ។ ជារៀងរាល់ឆ្នាំ រដូវមៀន គឺចាប់ពីខែកុម្ភៈ ដល់ខែកក្កដានេះ ហើយអូសអន្លាយដល់រហូតដល់ខែកញ្ញា ។ ស្របពេលដែលមៀនកំពុងហុចផល អ្នកស្រុកកោះអន្លង់ចិន កំពុងមមាញឹក និងប្រមូលផល ខណៈតម្លៃនៅលើទីផ្សារឆ្នាំនេះល្អប្រសើរផងដែរ ។
ម្ចាស់ចម្ការមៀននៅភូមិក្បាលកោះ ឃុំអន្លង់ចិន បានឲ្យដឹងថា មៀនរបស់អ្នកភូមិក្បាលកោះ ឃុំអន្លង់ចិន ស្រុកស្អាងនេះ ជាប្រភេទពូជម្យ៉ាងដែលមានរសជាតិផ្អែម និងមានក្លិនក្រអូបឈ្ងុយគួរឱ្យចង់ទទួលទាន ខុសពីពូជផ្សេងៗ ។
លោក ប៊ុន អ៊ាង បាននិយាយថា ៖ «បច្ចុប្បន្ន ដំណាំមៀននេះ ត្រូវបានអ្នកភូមិកោះអន្លង់ចិន ចាត់ទុកជាដំណាំយុទ្ធសាស្ត្រសម្រាប់ទ្រទ្រង់ជីវភាពទៅហើយ ។ ដូចឃើញស្រាប់ហើយ នៅពេលឈានជើងដល់ទឹកដីកោះអន្លង់ចិន ផ្ទះណាក៏មានដើមមៀនដែរ ដុះជាជួរៗនៅអមសងខាងផ្លូវ ដែលសុទ្ធតែមានផ្លែធំៗ និងក្លិនដ៏ក្រអូបគួរឱ្យចង់ពិសា » ។
លោកបន្ដថា មៀនចាប់ផ្ដើមផ្លែតាំងពីខែមករា ប៉ុន្តែផ្លែច្រើនគឺនៅក្នុងខែកក្កដានេះ និងបន្ដរហូតដល់ខែកញ្ញា ហើយចំពោះតម្លៃវិញ គឺទៅតាមប្រភេទរបស់វាដូចជា ប្រភេទទី១ មៀនសាច់ក្រាស់ តម្លៃ១៤.០០០រៀល, ប្រភេទទី២ តម្លៃជាមធ្យម១០.០០០រៀល និងប្រភេទទី៣ តម្លៃពី៧.០០០ទៅ៨.០០០រៀល ក្នុង១គីឡូក្រាម ។ លោកថា ៖« កាលពីមៀនមិនសូវសម្បូរ តម្លៃហាក់ខ្ពស់បន្ដិច ប៉ុន្តែមកដល់ខែកក្កដានេះ ធ្លាក់ចុះបន្តិច ចំណែកទីផ្សារនៅតែល្អ ព្រោះមានតម្រូវការខ្ពស់ » ។
លោក ប៊ុន អ៊ាង បានបញ្ជាក់ថា ៖« ពេលប្រមូលផលម្តងៗ គឺមានមូ៉យមកទទួលទិញដល់ទីកន្លែង តែពេលខ្លះ ខ្ញុំក៏ដឹកយកទៅបោះឱ្យម៉ូយនៅផ្សារតាខ្មៅដោយខ្លួនឯងដែរ ដែលទទួលបានតម្លៃខ្ពស់បន្ដិច » ។
អ្នកស្រី ស៊ុន សារុំ ដែលបានដាំមៀន និងបន្លែបន្ទាប់បន្សំផ្សេងទៀតនៅភូមិចុងកោះ ឃុំអន្លង់ចិននេះ បានឲ្យដឹងផងដែរថា អ្នកស្រីបានដាំមៀនលើផ្ទៃដីទំហំ៣០ម៉ែត្រ បណ្តោយជាង២០០មែ៉ត្រ ដោយបានចំណាយទុនប្រមាណ៤ទៅ៥លានរៀល ហើយពេលនេះចាប់ផ្ដើមទទួលផល ក្នុង១ឆ្នាំ ប្រមូលផល២ដង ដោយម៉ៅឲ្យឈ្មួញកណ្តាលក្នុងមួយរដូវ៥ពាន់ដុល្លារ ព្រោះអ្នកស្រីជាជនពិការ ។
អ្នកស្រីនិយាយថា ៖« ដោយសារតែដំណាំមៀននេះហើយ ទើបធ្វើឲ្យគ្រួសារខ្ញុំមានជីវភាពធូរធារច្រើន » ។ អ្នកស្រីថា ៖« នៅឃុំកោះអន្លង់ចិននេះ មិនមែនមានតែគ្រួសារខ្ញុំនោះទេដែលមានជីវភាពធូរធារដោយសារដំណាំមៀន និយាយរួម បងប្អូនប្រជាពលរដ្ឋដែលរស់នៅលើដីកោះអន្លង់ចិន ភាគច្រើននិយមដាំផ្លែមៀន គួឆាយ និងចេកពងមាន់ ហើយពួកគេទទួលផលបានមកវិញយ៉ាងកាក់កប ម្នាក់ៗមានជីវភាពល្អប្រសើរមិនចាញ់អ្នកភ្នំពេញឡើយ » ។
អ្នកស្រី ស៊ុន សារុំ បានបញ្ជាក់ថា ៖« ផ្លែមៀនកោះអន្លង់ចិន មិនប្រើគីមីទេ គឺដាំតាមធម្មជាតិពិតៗ ទើបមានរសជាតិឈ្ងុយឆ្ងាញ់ជាប់មាត់ ។ ដូច្នេះ សូមបងប្អូនជួយទិញផ្លែមៀនកោះអន្លង់ចិនផង ដើម្បីលើកទឹកចិត្តបងប្អូនប្រជាពលរដ្ឋនៅទីនេះបន្តការដាំមៀនធម្មជាតិទៀត » ។
អ្នកស្រី រ៉ុង ស្រីង៉ា អ្នករស់នៅក្នុងភូមិក្បាលកោះ ឃុំអន្លង់ចិន តាំងពីជីដូនជីតាមក បានរៀបរាប់ថា ឪពុកម្តាយរបស់អ្នកស្រីប្រកបមុខរបរដាំមៀន, គួឆាយ និងចេកពងមាន់ តាំងពីយូរមកហើយ លើកលែងតែសម័យខ្មែរក្រហមប៉ុណ្ណោះ ។
អ្នកស្រីបន្ដថា ៖« តម្លៃមៀនពេលនេះធ្លាក់ថ្លៃបន្តិច បើធៀបនឹងពេលប្រមូលផលដំបូង ហើយបច្ចុប្បន្ន មៀនសម្បូរទីផ្សារណាស់ ។ ម្យ៉ាងទៀត មៀនមកពីវៀតណាម និងមៀនប៉ៃលិន ក៏សម្បូរដែរ ប៉ុន្ដែមៀនខ្មែរយើងដែលដាំនៅកោះអន្លង់ចិននេះផ្លែធំៗ សាច់ក្រាស់ និងមានក្លិនក្រអូបឈ្ងុយ ហេតុនេះហើយបានជាបងប្អូនយើងគាំទ្រ និងចូលចិត្តបរិភោគផ្លែមៀនដែលដាំនៅកោះអន្លង់ចិន » ។
គួរកត់សម្គាល់ថា នៅឃុំកោះអន្លង់ចិននេះ ក្រៅពីដំណាំមៀន ប្រជាពលរដ្ឋភាគច្រើនប្រកបរបរដាំដំណាំជាច្រើនដូចជា គួឆាយ, ចេកពងមាន់ និងបន្លែរួមផ្សំផ្សេងទៀត ដែលកំពុងជួយលើកកម្ពស់ជីវភាពរបស់ពួកគាត់ឲ្យកាន់តែប្រសើរឡើង ៕
ចែករំលែកព័តមាននេះ