ខេត្តកណ្តាល ៖ នៅព្រឹកថ្ងៃទី២៣ ខែកក្កដា ឆ្នាំ២០១៨ នៅសាលាដំបូងខេត្តកណ្តាលបានបើកសវនាកាជំនុំជម្រះសំណុំរឿងក្រុមទទួលផលចោរកម្ម និងទទួលផលចោរកម្មមានស្ថានទម្ងន់ទោសចំនួនបីខេត្ត ។
សវនាការនេះមានលោកចៅក្រម គឹម ម៉េង ជាប្រធានប្រឹក្សាមានការចូលរួមពីលោក ទី សំណាង ចៅក្រម លោក ផូង វណ្ណ ចៅក្រម និងលោក ឯក ស៊ុនរស្មី ជាតំណាងអយ្យការ ។ ក្រោយបញ្ចប់សវនាការលោក គឹម ម៉េង ប្រធានក្រុមប្រឹក្សាជំនុំជម្រះសាលាដំបូងខេត្តកណ្ដាលសម្រេចលើកពេលប្រកាសសាលក្រមទៅថ្ងៃទី៣១ ខែកក្កដា ឆ្នាំ២០១៨ ខាងមុខនេះ ។
មន្ត្រីតុលាការថ្លែងថា ជនជាប់ចោទទី១-ឈ្មោះ តេង លី ភេទប្រុស, ទី២-ឈ្មោះ ហេង ភក្តី ភេទប្រុស, ទី៣-ឈ្មោះ យន់ សំអឿន ភេទប្រុស, ទី៤-ឈ្មោះ យន់ វាសនា ភេទប្រុស និងទី៥-ឈ្មោះ សេង បូរិទ្ធ ភេទប្រុស ជាប់ចោទពីបទ«ទទួលផលចោរកម្ម និងទទួលផលចោរកម្មមានស្ថានទម្ងន់ទោស» តាមមាត្រា៤០០, ៤០១ នៃក្រមព្រហ្មទណ្ឌដែលកំណត់ការផ្តន្ទាទោសដាក់ពន្ធនាគារពី០៥ឆ្នាំទៅ១០ឆ្នាំ ។
សូមរំលឹកថា ការបើកប្រតិបត្តិការណ៍បង្ក្រាបនេះក្រោយកម្លាំងនគរបាល ស្រុកកណ្តាលស្ទឹង ឃាត់ខ្លួនក្រុមចោរ ធាក់ផ្តួលម៉ូតូប្លន់បាន៦នាក់ក្រោយពួកគេធ្វើសកម្មភាពវាយប្លន់ជនរងគ្រោះ២នាក់ប្តីប្រពន្ធកាលពីថ្ងៃទី១០ ខែកុម្ភៈ ឆ្នាំ២០១៨ នៅចំណុចដីភូមិព្រែកអង្គុញ ឃុំសៀមរាប ស្រុកកណ្តាលស្ទឹងខេត្តកណ្តាល រួចគេចខ្លួន ។
លោក អ៊ាវ ចំរើន ស្នងការនគរបាលខេត្តកណ្តាលបានឲ្យដឹងថា ក្រោយពីជនសង្ស័យ១ក្រុមធ្វើសកម្មភាពធាក់ផ្តួលវាយប្លន់ជនរងគ្រោះឈ្មោះ ឈៀង ប៉េងសៀន ភេទប្រុស អាយុ២៥ឆ្នាំ មានមុខរបរកសិករ និងឈ្មោះ សឿន សម្ភស្ស ភេទស្រី អាយុ២៥ឆ្នាំ មានមុខរបរកសិករ អ្នកទាំងពីរជាប្តីប្រពន្ធរស់នៅភូមិក្រាំងធ្មៃ ឃុំគោកត្រប់ ស្រុកកណ្តាលស្ទឹង ខេត្តកណ្តាល បណ្តាលឲ្យបាត់បង់ម៉ូតូមួយគ្រឿងម៉ាកC125 ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ កណ្តាល 1Y-5246 ។
ក្រោយកើតហេតុកម្លាំងនគរបាលលោកតាមបង្ក្រាប់បានមុខសញ្ញា៦នាក់ធ្វើការដកហូតបានស្លាកលេខម៉ូតូបានចំនួន៣ (ភ្នំពេញ 1GS-2799), (ភ្នំពេញ 1GI-2551) (ឧ.មានជ័យ 1C-6117) និងម៉ូតូចំនួន៤គ្រឿង ។
លោកបានបន្តថា ក្រោយធ្វើការស្រាវជ្រាវឃាត់បានជនសង្ស័យទាំង៦នាក់រួចនាំមកសាកសួរទើបថា មានបក្ខពួកមួយចំនួនទៀតនៅខេត្តកំពង់ឆ្នាំង និងខេត្តកំពង់ស្ពឺ ដោយមានការឯកភាព ពីអគ្គនគរបាលជាតិនិងមានដឹកនាំដោយផ្ទាល់ពីលោក ឯក ស៊ុនរស្មី ព្រះរាជអាជ្ញារងអម សាលាដំបូងខេត្តកណ្តាល នៅថ្ងៃទី១៣ ខែមីនា ឆ្នាំ២០១៨ បានចុះទៅសហការជាមួយកម្លាំងនគរបាលខេត្តទាំងពីរធ្វើការស្រាវជ្រាវឆែកឆេរទីតាំងទទួលទិញលក់ម៉ូតូទទួលផលចោរកម្មចំនួន៥គោលដៅរកឃើញម៉ូតូ មិនប្រក្រតីជាច្រើនគ្រឿងឃាត់ខ្លួនអ្នកពាក់ព័ន្ធចំនួន៦នាក់នាំយកមកសាកសួរ ៕
ចែករំលែកព័តមាននេះ