រាជធានីភ្នំពេញ ៖ អ្នកជំនាញជាច្រើនបានលើកឡើងពីសក្ដានុពលនានាដែលធ្វើឲ្យខេត្តព្រះសីហនុ នឹងក្លាយជាប៉ូលសេដ្ឋកិច្ចទី២ បន្ទាប់ពីរាជធានីភ្នំពេញ នៅរយៈពេល៥ឆ្នាំខាងមុខនេះ ។
លោកបណ្ឌិត សុក ស៊ីផាន់ណា ទីប្រឹក្សារាជរដ្ឋាភិបាលកម្ពុជា បានថ្លែងនាពេលថ្មីៗនេះថា នៅក្នុងគោលនយោបាយអភិវឌ្ឍន៍វិស័យឧស្សាហកម្មរបស់រាជរដ្ឋាភិបាលឆ្នាំ២០១៥-២០២៥ បានដាក់ខេត្តព្រះសីហនុ ជាតំបន់ឧស្សាហកម្មពិសេសមួយ ដោយសារហេដ្ឋារចនាសម្ព័ន្ធតភ្ជាប់កាន់តែមានភាពងាយស្រួល និងមានសក្តានុពលជំរុញកំណើនសេដ្ឋកិច្ចជាតិ ដូចជា ព្រលានយន្តហោះអន្តរជាតិ, កំពង់ផែទឹកជ្រៅលំដាប់អន្តរជាតិ, ការតភ្ជាប់ផ្លូវគោក ផ្លូវរថភ្លើង និងគម្រោងសាងសង់ផ្លូវល្បឿនលឿន ដែលនឹងសាងសង់នាពេលខាងមុខនេះ ។ លោកបន្តថា ៖« កត្តាហេដ្ឋារចនាសម្ព័ន្ធ និងសក្តានុពលរបស់ខេត្ត នឹងធ្វើឲ្យខេត្តនេះក្លាយជាតំបន់សេដ្ឋកិច្ចធំទី២ នៅរយៈពេលប៉ុន្មានឆ្នាំខាងមុខនេះ » ។
លោក សុក ស៊ីផាន់ណា បានបន្តថា ៖« និយាយពីការសាងសង់ខុនដូនៅខេត្តព្រះសីហនុ យើងត្រូវសួរថា តើអ្នកអភិវឌ្ឍន៍ផ្តោតលើអ្នកណាជាគោលដៅ ។ បើអ្នកវិនិយោគផ្តោតលើប្រជាជនក្នុងស្រុក ខ្ញុំមិនសូវមានជំនឿចិត្តនោះទេ » ។ លោកបន្តថា ៖« ប្រជាពលរដ្ឋខេត្តព្រះ សីហនុ ទំនងមិនសូវចាប់អារម្មណ៍ខុនដូច្រើនទេ ពួកគេនៅតែចាប់អារម្មណ៍លំនៅឋានផ្ទាល់ដី ដោយសារខេត្តនៅសល់ដីទំនេរច្រើន និងមានតម្លៃធូរថ្លៃនៅឡើយ » ។
ខេត្តព្រះសីហនុបច្ចុប្បន្នបានក្លាយជាប៉ូលទី២ ដែលអ្នកវិនិយោគបរទេសបាននិងកំពុងសាងសង់ខុនដូនៅតំបន់នេះច្រើន ដូចជា គម្រោង Dseaview, Sunshine Bay, Royal Bayview គម្រោងSea Gate Suite និងគម្រោងខុនដូជាច្រើនទៀត ដែលបាននិងកំពុងសាងសង់ជាបន្តបន្ទាប់ ។
អ្នកវិនិយោគក្នុងខេត្តព្រះសីហនុ បានសម្តែងនូវសុទិដ្ឋិនិយមផងដែរ ប៉ុន្តែលោកបានទាមទារឲ្យមានការពង្រីកព្រលានយន្តហោះបន្ថែមទៀត ។
លោក ឡៅ ហេង អ្នកវិនិយោគសណ្ឋាគារអូរឈើទាល ខេត្តព្រះសីហនុ បានថ្លែងថា ខេត្តព្រះសីហនុ ពិតជាមានការរីកចម្រើនលឿន ដោយសារការវិនិយោគរបស់ជនជាតិចិន ប៉ុន្តែហេដ្ឋារចនាសម្ព័ន្ធសម្រាប់ទាក់ទាញការវិនិយោគ រយៈពេលវែង មិនទាន់បានវិនិយោគច្រើននៅឡើយទេ តែអ្វីៗបានចាប់ផ្តើមដំណើរការល្អប្រសើរបណ្តើរៗហើយ ។ លោកបន្តថា ៖« បច្ចុប្បន្ន ព្រលានយន្តហោះកងកេង ទទួលជើងហោះហើរកាន់តែច្រើន តែព្រលាននេះនៅមានប្រវែងផ្លូវរត់ខ្លី ដែលទាមទារឲ្យមានការពង្រីកខ្សែរត់បន្ថែម ដើម្បីទាក់ទាញអាកាសចរណ៍ធំៗចុះចតបាន » ។
អភិបាលខេត្តព្រះសីហនុ លោក យន្ត មីនបានទទួលស្គាល់ពីល្បឿននៃការអភិវឌ្ឍក្នុងមូលដ្ឋានរបស់លោក ប៉ុន្តែលោកបានត្អូញត្អែរពីបញ្ហាប្រឈមរបស់ខេត្តទាក់ទងនឹងទំនាស់ដីធ្លី និងការកើនឡើងនូវវត្តមានទេសចរណ៍ ធ្វើឲ្យមានបញ្ហាប្រឈមក្នុងការបំពុលបរិស្ថាន ជាដើម។ លោកបន្តថា កន្លងមក អាជ្ញាធរបានណែនាំប្រជាពលរដ្ឋ និងអ្នកវិនិយោគ ប៉ុន្តែនាពេលខាងមុខ អាជ្ញាធរនឹងចាប់បង្ខំឲ្យអនុវត្តប្រព័ន្ធចម្រោះ ដើម្បីទប់ស្កាត់ការបំពុលបរិស្ថាន ។
លោកបន្តថា ៖« ការរីកចម្រើនរបស់ខេត្ត និងសក្តានុពលដែលកំពុងមានក្នុងមូលដ្ឋាននេះពិតណាស់ ខេត្តព្រះសីហនុនឹងក្លាយជាប៉ូលសេដ្ឋកិច្ចធំទី២ បន្ទាប់ពីរាជធានីភ្នំពេញ នាពេលឆាប់ៗខាងមុខ » ។
អគ្គនាយកក្រុមហ៊ុន Century21 Mekong លោក ច្រឹក សុខនីម បានថ្លែងថា ដោយសារខេត្តព្រះសីហនុជាតំបន់ទេសចរណ៍ ហើយរាជរដ្ឋាភិបាលកំពុងរៀបចំតំបន់នេះទៅជាតំបន់ពាណិជ្ជកម្មនាពេលអនាគត អ្នកវិនិយោគដែលមានគោលដៅធ្វើការវិនិយោគរយៈពេលវែងបានងាកទៅកាន់តំបន់នេះ ដោយសារវាជាតំបន់ដែលមានសក្តានុពលសម្រាប់ពេលអនាគត ។
លោកបន្តថា ៖« រដ្ឋាភិបាលបាននិងកំពុងផ្តោតការយកចិត្តទុកដាក់នៅតំបន់នេះ តាមរយៈការរៀបចំឆ្នេរឲ្យមានសោភ័ណភាព និងរៀបរយជាងមុន, គម្រោងសាងសង់ផ្លូវហាយវ៉េពីរាជធានីភ្នំពេញទៅកាន់ខេត្តនេះ, ការមានព្រលានយន្តហោះលំដាប់អន្តរជាតិ និងកំណើនភ្ញៀវទេសចរ សុទ្ធតែជាកត្តាហុចសក្តានុពលដល់អ្នកវិនិយោគសាងសង់ខុនដូនៅខេត្តនេះ » ។ លោកបន្តថា ៖« ពេលបុណ្យទានម្តងៗពិបាករកផ្ទះសំណាក់ និងសណ្ឋាគារសម្រាប់ស្នាក់នៅ ដូច្នេះ ការទិញខុនដូសម្រាប់លំហែនឹងជាជម្រើសមួយផងដែរ » ៕
ចែករំលែកព័តមាននេះ