ការហូរឈាម រឹមៗតាមទ្វារមាសក្នុងពេលមានផ្ទៃពោះអាចជារឿងគួរឲ្យខ្លាច ប៉ុន្តែអ្នកអាចគិតថា វាគឺជារឿងញឹកញាប់ដែលកើតឡើងបែបនេះ ។ តាមពិតទៅការធ្លាក់ឈាមក្នុងត្រីមាសដំបូងមានប្រហែល១៥ ទៅ២៥ភាគរយដែរ ។ ដូច្នេះការធ្លាក់ឈាមបែបនេះអាចជារឿងគួរឲ្យបារម្ភទេ ?
ករណីខ្លះការធ្លាក់ឈាមក្នុងពេលមានផ្ទៃពោះអាចជារឿងធម្មតា ហើយក៏មិនគ្រោះថ្នាក់ដែរ ខណៈពេលដែលរឿងផ្សេងទៀតដែលបង្កឡើងដោយជំងឺធ្ងន់ ប្រហែលជាផ្តល់ផលអាក្រក់ដល់កូន និងសុខភាពអ្នកផ្ទាល់បាន ។ ខាងក្រោមនេះគឺជាកត្តាមួយចំនួនដែលអាចធ្វើឲ្យធ្លាក់ឈាមក្នុងពេលមានផ្ទៃពោះ៖
១-ការធ្លាក់ឈាមដោយសារការកាច់សម្បុករបស់កូន ៖ អ្នកប្រហែលជាធ្លាប់មានការហូរឈាម រឹមៗជុំវិញសប្តាហ៍ទី១ ទៅទី២ក្រោយពីមេជីវិតទាំងពីររលាយចូលគ្នារួច ដែលជាពេលវេលាដែលពួកគេត្រូវកាច់សម្បុកក្នុងជញ្ជាំងស្បូន ។ ការកាច់សម្បុកនេះក៏នាំឲ្យធ្លាក់ឈាមផងដែរ ហើយច្រើនតែកើតឡើងជុំវិញរដូវដំបូងរបស់អ្នកដោយសារតែការបង្កកំណើតរបស់កូនក្នុងផ្ទៃ ។
២-ការហូរឈាមពីមាត់ស្បូន ៖ នៅពេលអ្នកមានផ្ទៃពោះ ការផ្គត់ផ្គង់ឈាមទៅស្បូន និងមាត់ស្បូននឹងកើនឡើង ហើយក៏កើនសរសៃឈាមនៅកន្លែងនេះច្រើនថែមទៀតដែរ ។ ដោយសារតែរឿងនេះមាត់ស្បូនគឺងាយនឹងហូរឈាមក្នុងពេលមានផ្ទៃពោះ និងដាច់ដោចដែរ ។
ឧទាហរណ៍ អ្នកប្រហែលជាសម្គាល់ឃើញការហូរឈាម រឹមៗក្រោយពីពិនិត្យក្នុងអាងត្រគាក ធ្វើតេស្ត Pap ឬរួមភេទ ។ គួរតែតមខ្លួនពីការរួមភេទមុនពេលពិនិត្យរាងកាយ ដូច្នេះទើបអាចបង្ការការរលាកដល់មាត់ស្បូនបាន ។
៣-ការបង្ករោគ ៖ ការបង្ករោគជាច្រើនដែលធ្វើឲ្យហូរឈាមតាមទ្វារមាសក៏ប្រហែលជាការឆ្លើយតបជាការហូរឈាមក្នុងពេលមានផ្ទៃពោះដែរ ។ រឿងនេះរួមទាំងជំងឺកាមរោគដូចជា ប្រមេះទឹកបាយ ឬទឹកថ្លា មេរោគផ្សិត ឬការបង្ករោគដោយបាក់តេរីក្នុងទ្វារមាស។
សញ្ញានៃការបង្ករោគផ្សេងៗទៀតប្រហែលជាមានការឈឺចាប់ ឬក្រហាយៗក្រោយពីនោមរួច ហូរទឹករំអិលពីទ្វារមាសខុសធម្មតា និងឈឺចាប់ក្នុងពេលរួមភេទ ។
៤-ជំងឺកូនក្រៅស្បូន ៖ លើករណីខ្លះ ពងមេជីវិតញីឈ្មោលដែលរលាយចូលគ្នាមិនបានកាច់សម្បុកក្នុងស្បូនទេ ។ ផ្ទុយទៅវិញវាអាចកាច់សម្បុកនៅកន្លែងណាផ្សេងជាពិសេសដៃស្បូនតែម្តង ។ នេះហៅថាកូនក្រៅស្បូន ដែលវាអាចធ្វើឲ្យបំពង់ដៃស្បូនដាច់ដោច និងហូរឈាមក្នុងពោះ ។ ការហូរឈាមក្នុងពេលប្រហែលជានាំឲ្យខ្សោយ ឈឺចាប់ សន្លប់ និងស្យុក ។
រឿងនេះអាចជារឿងគ្រោះថ្នាក់ដល់អាយុជីវិតបាន ។ ការធ្លាក់ឈាមតាមទ្វារមាសអាចពេលខ្លះជាសញ្ញាតែមួយគត់ក្នុងពេលមានកូនក្រៅស្បូនថ្វីបើអ្នកអាចមានសញ្ញា ផ្សេងៗទៀតដូចជា ឈឺក្នុងពោះ ស្មា ឬអាងត្រគាក ។
៥-ជំងឺកូនពង ៖ ករណីខ្លះទារកក្នុងផ្ទៃហាក់បីដូចជាមិនលូតលាស់គ្រប់គ្រាន់ក្នុងផ្ទៃឡើយ ហើយអ្នកប្រហែលជាឃើញតែកោសិកាមិនធម្មតាលូតលាស់រញ៉េរញ៉ៃក្រៅពីកូនទៅវិញ ។
ករណីខ្លះវាប្រហែលជាមិនបង្ករោគសញ្ញា និងគ្រាន់តែរកឃើញក្នុងពេលថតអេកូប៉ុណ្ណោះឯង ។ ប៉ុន្តែស្ត្រីខ្លះធ្លាប់មានការធ្លាក់ឈាមតាមទ្វារមាសដោយមាន ឬគ្មានដុំគ្រាប់ៗក្នុងស្បូនឡើយ ។ អាការ ផ្សេងៗទៀត អាចជាការចាញ់កូនធ្ងន់ ឬពោះធំខុសធម្មតា ។
៦-សញ្ញារលូតកូន ៖ ការឈឺពោះបែប រមួលៗ និងហូរឈាមអាចជាសញ្ញានៃការបាត់បង់ការមានផ្ទៃពោះ ឬលូតកូនបាន ។ យ៉ាងណាមិញការរលូតកូនគឺជារឿងកម្រណាស់ក្រោយពីមានផ្ទៃពោះបាន៣ខែហើយ ។ ជាមួយគ្នានេះដែរ ចូរចងចាំក្នុងចិត្តថា ប្រហែល៥០ភាគរយនៃស្ត្រីដែលរលូតកូនគឺមិនធ្លាប់មានការធ្លាក់ឈាមអ្វីទាំងអស់ ដូច្នេះវាក៏មិនមែនជាសញ្ញាបញ្ជាក់តែមួយគត់ងដែរ ។
៧-ការរបើកសុក ៖ ក្រៅពីការធ្លាក់ឈាមតាមទ្វារមាស អ្នកប្រហែលជាធ្លាប់មានការឈឺចាប់នៅខ្នង និងឈឺពោះដែរក្នុងករណីរបើកសុក ។ វាអាចធ្វើឲ្យមានផលវិបាកធ្ងន់បើសិនជាមិនត្រូវបានរកឃើញ ភ្លាមៗទេ ព្រោះវាអាចបណ្តាលឲ្យទារកក្នុងផ្ទៃកង្វះអុកស៊ីសែន ឬម្តាយបាត់បង់ឈាមច្រើនផង ។ បើសិនជាការរបើកសុកកើតឡើងជិតថ្ងៃកើត អ្នកប្រហែលជាត្រូវសម្រាលឲ្យបានលឿនហើយ ។
៨-ជំងឺសុកបាំងមាត់ស្បូន ៖ សុកបាំងមាត់ស្បូនអាចមានពីរប្រភេទគឺបាំងជិត ឬតិចតួច។ ជំងឺនេះអាចធ្វើឲ្យធ្លាក់ឈាមតាមទ្វារមាស ដោយមិនមានការឈឺចាប់ឡើយ ។ ពេលខ្លះ វាអាចស្រួលបួលទៅវិញដោយខ្លួនឯងនៅចន្លោះសប្តាហ៍ទី៣២ ទៅ៣៥ ដោយសារតែសុកលូតលាស់ទៅខាងលើវិញ បន្តិចម្តងៗ ។ ប៉ុន្តែសុកនៅតែស្ថិតនៅខាងក្រោមដដែល ដូច្នេះអ្នកប្រហែលជាត្រូវសម្រាលកូនដោយវះកាត់វិញទើបជារឿងមានសុវត្ថិភាព ។
៩-ជំងឺសុកមិនធ្លាក់ ៖ នៅពេលស្ត្រីមានជំងឺសុកមិនធ្លាក់ វាអាចជាហេតុផលធំមួយនាំឲ្យធញលាក់ឈាមក្នុងត្រីមាសចុងក្រោយ ។ ការធ្លាក់ឈាមរបៀបនេះអាចកើតឡើងច្រើន រហូតដល់គម្រាមគំហែងដល់អាយុជីវិត និងបាត់បង់ឈាមច្រើនក្នុងពេលសម្រាលទៀតផង ។ ករណីភាគច្រើនវាត្រូវបានគេរកឃើញក្នុងពេលពិនិត្យផ្ទៃពោះដោយការថតអេកូជាប្រចាំ ។ បើសិនជាអ្នកមានជំងឺនេះមែន គ្រូពេទ្យអាចនឹងត្រូវការកាត់ស្បូនចោលក្រោយពីសម្រាលកូនរួចដើម្បីកុំឲ្យបាត់បង់ឈាមច្រើន ។
១០-សម្រាលមិនគ្រប់ខែ ៖ ការធ្លាក់ឈាមតាមទ្វារមាសក្នុងពេលមានផ្ទៃពោះយូរហើយ អាចជាសញ្ញាមួយដែលបញ្ជាក់ថា រាងកាយត្រៀមនឹងការសម្រាលកូនហើយ ។ រឿងនេះកើតឡើងនៅពេលដែលឈាមលាយជាមួយទឹករំអិលធ្លាក់ចេញមកខាងក្រៅ ។ បើសិនជាវាកើតឡើងអ៊ីចឹងមុនពេលថ្ងៃកើតមែន វាអាចជាការសម្រាលមិនគ្រប់ខែហើយ (ស្រង់ពីគេហទំព័រសុខភាព) ៕
ចែករំលែកព័តមាននេះ