ប្រធានបក្ស CPP ៖ ខ្ញុំសូមសន្យាការពារទឹកដីនេះឲ្យបានគង់វង្ស

ថ្ងៃទី ២២ ខែ កក្កដា ឆ្នាំ ២០១៨
ម៉ោង ១០:១៥
គុច ណារ៉េន

រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានគណបក្សប្រជាជនកម្ពុជា (CPP) នៅព្រឹកថ្ងៃទី២២ ខែកក្កដា ដែលត្រូវនឹងថ្ងៃទី១៦ នៃការធ្វើយុទ្ធនាការឃោសនាបោះឆ្នោតសម្រាប់ការបោះឆ្នោតជ្រើសតាំងតំណាងរាស្ត្រនោះបានបង្ហោះសារក្នុងបណ្តាញសង្គមហ្វេសប៊ុកធានាអះអាងថា សម្តេចនឹងការពារទឹកដីនេះឲ្យបានគង់វង្ស ។

សម្តេចតេជោបានបង្ហោះសារអមជាមួយនឹងរូបថតមួយសន្លឹកដែលសម្តេចអង្គុយថតជាមួយចៅស្រីមួយរូបដែលមានខ្លឹមសារថា ៖ «សន្លឹកឆ្នោតយើង គឺសម្រាប់គណបក្សប្រជាជនកម្ពុជា លេខ២០!» ។ សម្តេចបានសរសរបន្តទៀតថា កម្ពុជារីកចម្រើនមកទល់សព្វថ្ងៃនេះ គឺដោយ សារការខិតខំប្រឹងប្រែងរបស់យើងទាំងអស់គ្នា ។ អរគុណបងប្អូនជនរួមជាតិដែលមានជំនឿទុកចិត្តផ្តល់ការគាំទ្រតាមរយៈការបោះឆ្នោតជារៀងរាល់អាណត្តិមកឲ្យគណបក្សប្រជាជនកម្ពុជា ដែលមានខ្ញុំជាអ្នកដឹកនាំ ។

សម្តេចតេជោ ហ៊ុន សែន ប្រធានគណបក្សកាន់អំណាចបានសរសេរអះអាងបន្តទៀតថា ៖ «ខ្ញុំសូមសន្យាការពារទឹកដីនេះឲ្យបានគង់វង្ស និងថែរក្សាសុខសន្តិភាពជូនបងប្អូនជនរួមជាតិឲ្យបានឋិតថេរយូរអង្វែង ដើម្បីបងប្អូនប្រជាពលរដ្ឋ និងកូនក្មួយយុវជនមានឱកាសកាន់តែច្រើនឡើង» ។ ឆ្លៀតក្នុងនោះផងដែរ សម្តេចតេជោ បានអំពាវនាវឲ្យអ្នកបោះឆ្នោតចេញទៅបោះឆ្នោតឲ្យបានច្រើន និង «សូមបងប្អូនទៅបោះឆ្នោតគាំទ្រគណបក្សប្រជាជនកម្ពុជារបស់យើងទាំងអស់គ្នានៅថ្ងៃទី២៩ កក្កដា ២០១៨ ខាងមុខនេះ!» ។

សូមបញ្ជាក់ថា ការបោះឆ្នោតនាពេលដ៏ខ្លីខាងមុខនេះ គឺសម្រាប់អាសនៈរដ្ឋសភាចំនួន ១២៥ អាសនៈ ។ សម្រាប់ការបោះឆ្នោតថ្នាក់ជាតិឆ្នាំ២០១៨ នេះបក្សកាន់អំណាចបាននឹងកំពុងធ្វើយុទ្ធនាការលើកទឹកចិត្តអ្នកបោះឆ្នោតឲ្យចេញទៅបោះឆ្នោតឲ្យបានច្រើន ខណៈថ្នាក់ដឹកនាំអតីបក្សប្រឆាំង (CNRP) ដែលត្រូវរំលាយចោលដោយអំណាចតុលាការកំពូល ក៏បានខិតខំអំពាវនាវមិនឲ្យមហាជនទៅចូលរួមបោះឆ្នោតផងដែរ ៕