ខេត្តកំពង់ចាម ៖ កាណូតដទទឹង «ពាមជីកង-កោះអណ្តែត» មួយគ្រឿង ដែលផ្ទុកពលរដ្ឋ និងព្រះសង្ឃជាង២០អង្គ/នាក់ រួមទាំងរថយន្តចំនួន២គ្រឿងនិងម៉ូតូផង ពេលបើកចម្លងមកដល់កណ្ដាលទន្លេមេគង្គ ស្រាប់…
ខេត្តកំពង់ចាម ៖ កាណូតដទទឹង «ពាមជីកង-កោះអណ្តែត» មួយគ្រឿង ដែលផ្ទុកពលរដ្ឋ និងព្រះសង្ឃជាង២០អង្គ/នាក់ រួមទាំងរថយន្តចំនួន២គ្រឿងនិងម៉ូតូផង ពេលបើកចម្លងមកដល់កណ្ដាលទន្លេមេគង្គ ស្រាប់ តែរលត់ម៉ាស៊ីន ហើយរសាត់តាមខ្សែទឹកហូរទៅទើរនៅកន្ទុយកោះកណ្តាលទន្លេ ។ ហេតុការណ៍នេះ កើត ឡើងកាលពីល្ងាចថ្ងៃទី១៦ ខែកក្កដាកន្លងទៅ ហើយត្រូវបានលោក គួច ចំរើន អភិបាលខេត្ត ឲ្យយកកា ណូតផ្សេងទៅជួយចម្លង ។
អ្នកស្រី អ៊ាន សារ៉ាន អាយុ៤០ឆ្នាំ តំណាងឲ្យម្ចាស់កាណូតដទទឹងខាងលើ បានឲ្យដឹងថា គាត់មានកាណូត២គ្រឿង សម្រាប់ចម្លងប្រជាពលរដ្ឋទៅវិញទៅមក ហើយកន្លងមក ក៏មិនដែលជួបហេតុការណ៍អ្វីគួរឲ្យកត់ សម្គាល់ដែរ គ្រាន់តែកាណូតខូចបន្តិចបន្តួចប៉ុណ្ណោះ ។
អ្នកស្រីបន្តថា នារសៀលថ្ងៃទី១៦ ខែកក្កដា កាណូតរបស់គាត់មួយគ្រឿង បើកឆ្លងពីត្រើយពាមជីកងទៅដល់កោះអណ្តែត ស្រុកស្រីសន្ធរ ស្រាប់តែខូចម៉ាស៊ីននៅទីនោះ ក៏ឲ្យកម្មករឡើងជិះកាណូតទី២ដឹកអ្នក ដំណើរត្រឡប់មកត្រើយពាមជីកងវិញ ។ លុះនៅវេលាម៉ោង៤ និង៣០នាទីរសៀលថ្ងៃដដែល ពេលកាណូតដឹកអ្នកដំណើរឆ្លងទៅត្រើយកោះអណ្តែតដល់កណ្តាលទន្លេមេគង្គ ស្រាប់តែរលត់ម៉ាស៊ីនហើយកាណូតបានរសាត់ទៅតាមខ្សែទឹកហូរ ។
ពេលនោះ គាត់បានទូរស័ព្ទប្រាប់អ្នកបើកកាណូតឲ្យចូលអែបច្រាំងនៅកន្ទុយកោះ ដែលមានចម្ងាយប្រមាណជិត២គីឡូម៉ែត្រពីត្រើយពាមជីកង ។ បន្ទាប់មកក៏បានឲ្យប្តីទៅតាមរកទូករបស់បងប្អូនខ្មែរអ៊ិស្លាមចេញមកជួយអូសតែមិនអាចអូសកើតដោយសារតែមានទំហំតូចជាងកាណូតដ ហើយកាណូត២គ្រឿងដែលចតនៅច្រាំងទន្លេមេគង្គនៅពាមជីកងរបស់ថៅកែម្នាក់ទៀត ក៏រកអ្នកបើកបរមិនបានទៀត ។
ទោះជាយ៉ាងណា ក្រោមការជួយជ្រោមជ្រែងរបស់លោកអភិបាលខេត្ត អភិបាលស្រុកកងមាស លោកអធិការនគរបាលស្រុកបានជួយខ្នះខ្នែងរកបានកាណូត១គ្រឿងពីភូមិថ្មី ដែលមានទំហំធំមកអូសកាណូតរបស់គាត់មកដល់ច្រាំងទន្លេពាមជីកងវិញនៅវេលាយប់ទៅហើយ និងបានសាងមនុស្សនិងរថយន្តឆ្លងទាំងយប់ដើម្បីបន្តដំណើរទៅកោះអណ្តែត ។
តំណាងម្ចាស់កាណូតដទទឹងបញ្ជាក់ថា ក្នុងនាមគាត់ជាម្ចាស់កាណូត សូមថ្លែងអំណរគុណដ៏ជ្រាលជ្រៅចំពោះថ្នាក់ដឹកនាំខេត្ត ដែលបានជួយអន្តរាគមន៍រកកាណូតផ្សេងមកដឹកអ្នកដំណើរនៅលើកាណូតជាប់គាំងនៅកន្ទុយកោះ ដោយសារតែបញ្ហារលត់ម៉ាស៊ីនកាណូតនេះ ៕
ចែករំលែកព័តមាននេះ