ខេត្តមណ្ឌលគិរី ៖ ស្ត្រីជនជាតិព្នងម្នាក់បានស្លាប់ ក្រោយបញ្ជូនទៅសង្គ្រោះបន្ទាន់នៅមន្ទីរពេទ្យបង្អែកខេត្ត ។ ចំណែកបុរសជាប្តីបានរងរបួសធ្ងន់ធ្ងរកំពុងសម្រាកព្យាបាល ក្រោយជួបហេតុការ គ្រោះថ្នាក់ចរាចរណ៍ នៅចំណុចកែងផ្លូវបំបែកដាក់ដាំ លើបណ្តោយផ្លូវលេខ៧៦ ខណៈកំពុងមានភ្លៀងធ្លាក់យ៉ាងខ្លាំង នៅល្ងាចថ្ងៃទី១៨ កក្កដា ២០១៨ ស្ថិតភូមិអូរស្ពាន សង្កាត់ស្ពានមានជ័យ ។
លោក កាន់ ពេញ អធិការនគរបាលក្រុងសែនមនោរម្យបានឲ្យដឹងថា មានករណីគ្រោះថ្នាក់ចរាចរណ៍ រវាងរថយន្ត និងម៉ូតូក្នុងដំណើរបញ្ច្រាសទិសគ្នា ដោយអ្នកបើករថយន្តឈ្មោះ មាន សុខសំណាង ភេទប្រុស អាយុ៤០ឆ្នាំ ជនជាតិខ្មែ រស់ភូមិចំការតែ សង្កាត់ស្ពានមានក្រុងសែនមនោរម្យ ខេត្តមណ្ឌលគិរី រថយន្ត ស្លាកលេខភ្នំពេញ ២AC- ៧៧២៦ (អ្នកបើករថយន្តរត់គេចខ្លួនបាត់) ។
អ្នកបើកម៉ូតូឈ្មោះ ប្រុង ផើល ភេទប្រុស អាយុ៤៨ឆ្នាំ ជនជាតិព្នង រស់នៅភូមិពូទ្រូ ឃុំសែនមនោរម្យ ស្រុកអូររាំង ខេត្តមណ្ឌលគិរី ជិះម៉ូតូម៉ាកស៊ីរូស គ្មានផ្លាកលេខរងរបួសធ្ងង់បាក់ជើងខាងស្ដាំចំនួន០២កំណាត់ ចំណែកអ្នករួមដំណើរឈ្មោះ ញើច ឃ្វើច ជាប្រពន្ធ អាយុ៣៦ឆ្នាំ ត្រូវជាប្រពន្ធ បានរងរបួសធ្ងន់ ពេលបញ្ចូនមកដល់មន្ទីរពេទ្យបង្អែកខេត្តមណ្ឌលគិរីបានស្លាប់នៅវេលាម៉ោង១៨និង០០នាទី ។
ចំណែកសពបានប្រគល់ឲ្យទៅក្រុមគ្រួសារធ្វើបុណ្យតាមប្រពៃណី ។ បច្ចុប្បន្នជនរងគ្រោះត្រូវបានសម្រាក ព្យាបាលនៅមន្ទីរពេទ្យខេត្ត ឯវត្ថុតាងយកមករក្សាទុកនៅអធិការ ក្រុងសែនមនោរម្យរង់ចាំកសាងសំណុំរឿងបញ្ចូនទៅតុលាការ ៕
ចែករំលែកព័តមាននេះ