ខេត្តមណ្ឌលគិរី ៖ សេចក្តីរាយការណ៍បានឲ្យដឹងថា រថយន្តប្រមាណ១០០គ្រឿងបានកកស្ទះអស់រយៈពេលជាច្រើនម៉ោង កាលពីព្រឹកថ្ងៃទី១៨ កក្កដា ២០១៨ លើកំណាត់ផ្លូវជាតិលេខ៧៦ ត្រង់ចំណុចផ្លូវចុះចំណោតអូរងើយ ក្នុងភូមិអណ្តូងក្រឡឹង…
ខេត្តមណ្ឌលគិរី ៖ សេចក្តីរាយការណ៍បានឲ្យដឹងថា រថយន្តប្រមាណ១០០គ្រឿងបានកកស្ទះអស់រយៈពេលជាច្រើនម៉ោង កាលពីព្រឹកថ្ងៃទី១៨ កក្កដា ២០១៨ លើកំណាត់ផ្លូវជាតិលេខ៧៦ ត្រង់ចំណុចផ្លូវចុះចំណោតអូរងើយ ក្នុងភូមិអណ្តូងក្រឡឹង ឃុំសែនមនោរម្យ ស្រុកអូររាំង ក្រោយសមត្ថកិច្ចបានព្យាយាមស្ទួចរថយន្តធុនយក្សមួយគ្រឿងដែលបានក្រឡាប់ធ្លាក់ផ្លូវតាំងពីយប់ថ្ងៃទី១៥ មក ។
សមត្ថកិច្ចបានឲ្យដឹងថា រថយន្តធុនវេអងពាក់ស្លាកលេខវៀតណាម បានដឹកក្រដាសកាតុងពីស្រុកអូរយ៉ាដា ខេត្តរតនគិរី លុះមកដល់ចំណុចកើតហេតុស្របពេលមានភ្លៀងធ្លាក់គួបផ្សំផ្លូវចុះចំណោតខ្លាំង ហើយអ្នកបើកបរមិនស្គាល់ស្ថានភាពផ្លូវផងនោះក៏ជ្រុលចង្កូចធ្លាក់ទៅខាងឆ្វេងដៃជាច្រើនត្រឡប់ ។
ទោះជាយ៉ាងណាហេតុការណ៍ខាងលើនេះសមត្ថកិច្ចអះអាងថា ពុំមានបណ្តាលឲ្យមនុស្សណាម្នាក់រងគ្រោះថ្នាក់ឡើយ ក្រៅពីខូចខាតរថយន្ត និងទំនិញ ។ គិតត្រឹមម៉ោង៩ព្រឹកថ្ងៃទី១៨ កក្កដា ២០១៨ ការកកស្ទះនៅចំណុចកើតហេតុត្រូវបាននគរបាលស្រុកអូររាំងដែលដឹកនាំបញ្ជាផ្ទាល់ដោយលោក ប៊ូ ប៊ុនឈាត ជាអធិការនគរបាលចុះជួយសម្រួលចរាចរណ៍ដល់អ្នកដំណើរបានជាប្រក្រតី ។
លោក ឡោ សុខា ស្នងការនគរបាលខេត្តបានផ្តាំផ្ញើដល់គ្រប់អ្នកធ្វើដំណើរឆ្លងកាត់ខេត្តមណ្ឌលគិរី ជាពិសេសអ្នកទេសចរដែលមកកម្សាន្តនៅខេត្តសូមមានស្មារតីប្រុងប្រយ័ត្នខ្ពស់ ព្រោះនៅតំបន់នេះផ្លូវមានស្ថានភាពឡើងចុះភ្នំរាប់មិនអស់នៅតាមសងខាងផ្លូវមានដើមឈើដុះបិទបាំងគ្រប់ផ្លូវកែង ហើយជាងនេះទៅទៀតរដូវនេះមានភ្លៀងធ្លាក់ច្រើនថែមទាំងចុះអ័ព្ទទាំងថ្ងៃទាំងយប់មិនអាចមើលឃើញឧបសគ្គនៅខាងមុខដែលអាចបង្កជាគ្រោះថ្នាក់បានគ្រប់ពេលវេលា ៕
ចែករំលែកព័តមាននេះ