រាជធានីភ្នំពេញ ៖ មន្ត្រីជាន់ខ្ពស់ធនាគារជាតិនៃកម្ពុជាថ្លែងថា នៅក្នុងរយៈពេលជាង២ទសវត្សរ៍កន្លងទៅនេះ សេដ្ឋកិច្ចកម្ពុជាសម្រេចបានកំណើនជាង៧% ហើយនឹងបន្តមានកំណើនរឹងមាំរយៈពេលវែងខាងមុខទៀត ។
លោក ជា ចាន់តូ ទេសាភិបាលធនាគារជាតិនៃកម្ពុជា បានលើកឡើងបែបនេះនៅក្នុងជំនួបពិភាក្សាការងារជាមួយលោក Vassili PROKOPENKO សេដ្ឋវិទូជាន់ខ្ពស់នៃនាយកដ្ឋានទីផ្សារមូលធន និងរូបិយវត្ថុរបស់មូលនិធិរូបិយវត្ថុអន្តរជាតិ (IMF) នៅថ្ងៃទី១៦ កក្កដា ឆ្នាំ២០១៨កន្លងមក ។ លោកទេសាភិបាលថ្លែងថា ៖« សេដ្ឋកិច្ចកម្ពុជា ក្នុងរយៈពេលជាង២ទសវត្សរ៍មកនេះ សម្រេចបានកំណើនជាង៧% ហើយនៅពេលខាងមុខនោះ កម្ពុជាក៏នៅតែទទួលបានកំណើនរឹងមាំក្នុងរង្វង់៧%ដដែល ដោយសារកម្លាំងចលករសំខាន់ជួយជំរុញវិស័យនេះ ដូចជា វិស័យកាត់ដេរ សំណង់ ទេសចរណ៍ និងភាពប្រសើរឡើងវិញជាសន្សឹមៗ ហើយវិស័យកសិកម្មក៏មានភាពរីកចម្រើនដែរ » ។ លោកបន្តថា ៖« អតិផរណាបន្តមានកម្រិតទាបសមរម្យ ។ រីឯកត្តាចម្បងនៃកំណើនអតិផរណា គឺការបន្តកើនថ្លៃលើម្ហូបអាហារ ដែលឆ្លុះបញ្ចាំងកំណើនតម្រូវការប្រើប្រាស់ គួបផ្សំនឹងកំណើនថ្លៃទំនិញ និងសេវាពាក់ព័ន្ធ និងប្រេងឥន្ធនៈ ដែលបណ្តាលមកពីការកាត់បន្ថយបរិមាណផ្គត់ផ្គង់របស់ប្រទេសនាំចេញមួយចំនួន» ។ លោកបន្តថា ៖« ប្រព័ន្ធធនាគារមានការរីកចម្រើនយ៉ាងខ្លាំង និងកំពុងក្លាយជាស្ថាប័នមួយប្រកបដោយការគោរព និងជឿជាក់ពីសំណាក់អតិថិជន តាមរយៈការរក្សាសុវត្ថិភាព ការគ្រប់គ្រងទីផ្សារប្តូរប្រាក់ និងទុនបម្រុងអន្តរជាតិ » ។
លោកទេសាភិបាលបានបន្តទៀតថា វិស័យធនាគារនៅក្នុងរយៈពេល២ទសវត្សរ៍ចុងក្រោយ គឺមានការរីកចម្រើនគួរឲ្យកត់សម្គាល់ ដែលការរីកចម្រើននេះ ត្រូវទាមទារឲ្យធនាគារជាតិនៃកម្ពុជា ដែលជាអាជ្ញាធររូបិយវត្ថុ និងអាជ្ញាធរលើគ្រឹះស្ថានធនាគារ និងហិរញ្ញវត្ថុ ក្លាយជាស្ថាប័នមួយប្រកបដោយការគោរព និងមានភាពជឿជាក់ពីសាធារណជន លើសមត្ថភាពរបស់ខ្លួន តាមរយៈការអនុវត្តគោលនយោបាយហិរញ្ញវត្ថុ ការរក្សាប្រព័ន្ធសុវត្ថិភាពធនាគារ និងហិរញ្ញវត្ថុ ការគ្រប់គ្រងទីផ្សារប្តូរប្រាក់ ទុនបម្រុងអន្តរជាតិ ការគ្រប់គ្រងប្រព័ន្ធទូទាត់ ការបោះពុម្ពផ្សាយរូបិយវត្ថុជាតិ ការផ្តល់សេវាជូនរាជរដ្ឋាភិបាល និងគ្រឹះស្ថានធនាគារ និងហិរញ្ញវត្ថុផងដែរ ។ ជាការឆ្លើយតប លោក Vassili PROKOPENKO សេដ្ឋវិទូជាន់ខ្ពស់នៃនាយកដ្ឋានទីផ្សារមូលធន និងរូបិយវត្ថុរបស់មូលនិធិរូបិយវត្ថុអន្តរជាតិ (IMF) បានថ្លែងនូវការអបអរសាទរចំពោះរាជរដ្ឋាភិបាលកម្ពុជា ដែលសម្រេចបាននូវកំណើនដ៏ល្អ និងជាកំណើនខ្ពស់នៅក្នុងតំបន់ និងក្នុងពិភពលោកដែលកម្ពុជាគួរតែមានមោទនភាពខ្លាំង ខណៈសេដ្ឋកិច្ចកម្ពុជាបានងើបឡើងជាបន្តបន្ទាប់ ។
សេដ្ឋវិទូ ម៉ី កល្យាណ ទីប្រឹក្សាឧត្តមក្រុមប្រឹក្សាសេដ្ឋកិច្ចជាតិ បានថ្លែងយល់ស្របនឹងការលើកឡើងខាងលើ ដោយលោកបានមានប្រសាសន៍ថា សេដ្ឋកិច្ចកម្ពុជានៅតែមានកំណើនរឹងមាំ ដោយសារកម្លាំងចលករជំរុញកំណើនសេដ្ឋកិច្ច នៅតែមានភាពល្អប្រសើរ ហើយសេដ្ឋកិច្ចកម្ពុជាបាននិងកំពុងធ្វើពិពិធិកម្មការនាំចេញកាន់តែច្រើន ដែលបានបង្កើត និងផ្តល់តម្លៃបន្ថែមកាន់តែច្រើនក្នុងសេដ្ឋកិច្ចរបស់ជាតិ ។
លោកបន្តថា ៖« ការរីកចម្រើនវិស័យឧស្សាហកម្ម និងការទាញយកមកប្រើប្រាស់បាននូវធនធានធម្មជាតិ នឹងជាកម្លាំងសេដ្ឋកិច្ចថ្មីមួយ ដើម្បីជួយទ្រទ្រង់កំណើនសេដ្ឋកិច្ចរបស់ប្រទេសនេះ » ៕
ចែករំលែកព័តមាននេះ