ចាប់ខ្លួនមេអាប៉ោង២នាក់ សុទ្ធតែជនពិការជើងរត់មិនរួចដូចគេ
- កណ្តាល
ខេត្តកណ្ដាល ៖ កាលពីវេលាម៉ោង២រសៀល ថ្ងៃទី១៥ កក្កដា ២០១៨នេះ កម្លាំងសមត្ថកិច្ចនគរបាល ស្រុកកៀនស្វាយ ខេត្តកណ្តាល បានចុះបង្ក្រាបល្បែងសីសងខុសច្បាប់(អាប៉ោង)…
ខេត្តកណ្ដាល ៖ កាលពីវេលាម៉ោង២រសៀល ថ្ងៃទី១៥ កក្កដា ២០១៨នេះ កម្លាំងសមត្ថកិច្ចនគរបាល ស្រុកកៀនស្វាយ ខេត្តកណ្តាល បានចុះបង្ក្រាបល្បែងសីសងខុសច្បាប់(អាប៉ោង) មួយកន្លែងនៅចំណុច ភូមិឈើទាល២ ឃុំឈើទាល ស្រុកកៀនស្វាយ តែកិច្ចបង្ក្រាបនោះសមត្ថកិច្ចចាប់ខ្លួនបានមេបាញ់ អាប៉ោងពីរនាក់ ដែលសុទ្ធតែជនពិការជើងរត់មិនរួច ចំណែកអ្នកលេងរត់បាត់អស់ សល់តែស្បែកជើង នៅគរកន្លែងវង់ល្បែង។
ជនសង្ស័យម្នាក់ឈ្មោះ កូវ ផាត ភេទប្រុស អាយុ៥៤ឆ្នាំ មុខរបរនៅផ្ទះ ( ពិការស្វិតជើង) ជាម្ចាស់ផ្ទះផ្ដល់ទីកន្លែងឲ្យលេងល្បែងស៊ីសងខុសច្បាប់ (អាប៉ោង) មានទីលំនៅ ភូមិឈើទាល២ ឃុំឈើទាលស្រុកកៀនស្វាយខេត្តកណ្ដាល (ត្រូវបានឃាត់ខ្លួន)។ និងម្នាក់ទៀតឈ្មោះ នូ រស់ ភេទប្រុស អាយុ៥៦ឆ្នាំ ជនជាតិខ្មែរ មុខរបរនៅផ្ទះ (ក៏ជាជនពិការជើងទាំងពីរដែរ ) មានទីលំនៅ ភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។ វត្តុតាងចាប់យកបានមាន ទី១-ចានបាញ់អាប៉ោង ០១, ទី២-គំរបចានអាប៉ោង ០១ ទី៣-កម្រាលរន្ធចាក់អាប៉ោង ០១ ទី៤-ស្បែកជើង ៦ គូ។
នៅវេលាម៉ោងខាងលើ មានប្រជាពលរដ្ឋល្អ បានរាយការណ៍ឲ្យសមត្ថកិច្ចដឹងថា មានក្រុមអ្នកលេង ល្បែងស៊ីសងខុសច្បាប់(អាប៉ោង)មួយកន្លែង នៅផ្ទះឈ្មោះ កូវ ផាត ភូមិឈើទាល២។ ក្រោយពីទទួលបានព័ត៌មាននោះ កម្លាំងសមត្ថកិច្ចនគរបាលប៉ុស្តិ៍រដ្ឋបាល ឃុំឈើទាល បានចុះទៅបង្ក្រាបភ្លាម តែពេលនោះអ្នកលេងហាក់ដូចជាបានដឹងមុន នាំគ្នារត់ចោលស្បែកជើងអស់ នៅសល់តែ(មេ)២នាក់រត់មិនរួច ព្រោះពួកគេជាជនពិការជើងដូចគ្នា សុខចិត្តនៅលើកដៃសំពះ សើចដាក់ប៉ូលិស និងអង្វករសុំការយោគយល់ប៉ុណ្តោះ។
តែទោះជាយ៉ាងណាក្តីសមត្ថកិច្ច បានធ្វើការឃាត់ខ្លួន មេអាប៉ោង២នាក់នោះ ដើម្បីធ្វើការអប់រំ និង ឲ្យធ្វើកិច្ចសន្យាបញ្ឈប់លេងទៅថ្ងៃក្រោយទៀត។ សមត្ថកិច្ចធ្វើបែបនេះដោយសម្អាង លើមេអាប៉ោងទាំង២នាក់សុទ្ធជនពិការ៕
ចែករំលែកព័តមាននេះ