រាជធានីភ្នំពេញ ៖ រាជរដ្ឋាភិបាលបានកំណត់ពេលវេលាជាក់លាក់ហើយ ដើម្បីចាប់ផ្តើមបើកការដ្ឋានសាងសង់ផ្លូវល្បឿនលឿនពីភ្នំពេញ ទៅកាន់ខេត្តព្រះសីហនុ ដោយកំណត់យកខែវិច្ឆិកាចុងឆ្នាំនេះ ជាពេលបើកដំណើរការសាងសង់ ។ នេះបើតាមមន្ត្រីអ្នកនាំពាក្យក្រសួងសាធារណការ និងដឹកជញ្ជូន…
រាជធានីភ្នំពេញ ៖ រាជរដ្ឋាភិបាលបានកំណត់ពេលវេលាជាក់លាក់ហើយ ដើម្បីចាប់ផ្តើមបើកការដ្ឋានសាងសង់ផ្លូវល្បឿនលឿនពីភ្នំពេញ ទៅកាន់ខេត្តព្រះសីហនុ ដោយកំណត់យកខែវិច្ឆិកាចុងឆ្នាំនេះ ជាពេលបើកដំណើរការសាងសង់ ។ នេះបើតាមមន្ត្រីអ្នកនាំពាក្យក្រសួងសាធារណការ និងដឹកជញ្ជូន ។
លោក វ៉ាស៊ឹម សុរិយា អ្នកនាំពាក្យរូបនេះបានឲ្យដឹងតាមទូរស័ព្ទនាព្រឹកថ្ងៃទី១០ កក្កដាថា ការសាងសង់ផ្លូវល្បឿនលឿន ឬ Express Way ត្រូវបានលោកទេសរដ្ឋមន្ត្រី ស៊ុន ចាន់ថុល ប្រកាសកំណត់កាលបរិច្ឆេទជាក់លាក់ហើយ គឺយកខែវិច្ឆិកា ដើម្បីបើកការដ្ឋានសាងសង់ផ្លូវល្បឿនលឿនលើកទី១ នៅកម្ពុជានេះ ។
លោកបន្តថា កន្លងមក ខាងក្រុមហ៊ុនចិន មានការបារម្ភពីការជាប់គាំងគម្រោងកណ្តាលទី ហេតុនេះ ទើបពួកគេជំរុញឲ្យរាជរដ្ឋាភិបាល ដោះស្រាយផលប៉ះពាល់ជាមួយប្រជាពលរដ្ឋលើគម្រោងផ្លូវនេះបញ្ចប់សិន ។
លោកបន្តថា ៖« ការដោះស្រាយផលប៉ះពាល់បាននិងកំពុងដំណើរការ និងអាចបញ្ចប់នៅពេលណាមួយ ហើយបើចប់មុនផែនការ ការសាងសង់ផ្លូវនេះនឹងធ្វើមុនខែវិច្ឆិកា » ។
លោកបន្តថា ៖« ផ្លូវប្រវែងជាង១៩០គីឡូម៉ែត្រនេះ នឹងចំណាយថវិកាប្រមាណ១.៨០០លានដុល្លារអាមេរិក និងគ្រោងចំណាយពេល៤ឆ្នាំ ដើម្បីបញ្ចប់គម្រោងនេះ » ។
លោក វ៉ាស៊ឹម សុរិយា បានបន្ថែមថា ផ្លូវនេះនឹងសាងសង់មានកម្ពស់ខ្ពស់ប្រៀបដូចជាស្ពាន ហើយនឹងមានការសាងសង់របងព័ទ្ធជុំវិញ ដើម្បីកុំឲ្យមានសត្វ ឬចំណុចឆ្លងកាត់ច្រើន ព្រោះវាជាផ្លូវល្បឿនលឿន និងមិនមានចំណុចឆ្លងកាត់ច្រើននោះទេ ។
លោកបន្តថា ៖« ផ្លូវនេះនឹងជួយជំរុញការដឹកជញ្ជូនកាន់តែលឿន, កាត់បន្ថយពេលវេលា, កាត់បន្ថយការចំណាយ និងជួយជំរុញកំណើនសេដ្ឋកិច្ចជាតិ » ។
លោកបណ្ឌិត ម៉ី កល្យាណ ប្រធានក្រុមប្រឹក្សាវិទ្យាស្ថានសិក្សាការអភិវឌ្ឍ បានថ្លែងថា បញ្ហាហេដ្ឋារចនាសម្ព័ន្ធជារឿងប្រឈមមួយក្នុងការអភិវឌ្ឍសេដ្ឋកិច្ចកម្ពុជា ប៉ុន្តែរាជរដ្ឋាភិបាលក្នុងប៉ុន្មានឆ្នាំចុងក្រោយនេះ បានរៀបចំគោលនយោបាយ និងវិនិយោគលើហេដ្ឋារចនាសម្ព័ន្ធយ៉ាងច្រើន ដើម្បីជំរុញកំណើនសេដ្ឋកិច្ចជាតិ ។ លោកបន្តថា អ្វីដែលរាជរដ្ឋាភិបាលបានធ្វើ គឺស្ថិតក្នុងទិសដៅត្រឹមត្រូវមួយហើយ ប៉ុន្តែលោកស្នើសុំឲ្យមានការពន្លឿនការវិនិយោគលើហេដ្ឋារចនាសម្ព័ន្ធ ដើម្បីកាត់បន្ថយតម្លៃដើមនៃការដឹកជញ្ជូន ។
លោកបន្តថា ៖« វាជារឿងចាំបាច់ដែលត្រូវកសាងហេដ្ឋារចនាសម្ព័ន្ធ ដើម្បីជំរុញសេដ្ឋកិច្ចកម្ពុជាទៅកាន់ដំណាក់កាលថ្មីមួយទៀត ព្រោះបើចង់ឲ្យសេដ្ឋកិច្ចកម្ពុជាកើនឡើង និងឈានទៅកាន់លំដាប់ថ្មី កម្ពុជាត្រូវការវិនិយោគលើហេដ្ឋារចនាសម្ព័ន្ធបន្ថែមទៀត»៕
ចែករំលែកព័តមាននេះ