សហព័ន្ធបាល់ទាត់អន្តរជាតិ (FIFA) បានប្រកាសកាលពីពេលថ្មីៗនេះថា ពានរង្វាន់កីឡាករឆ្នើម(The Best FIFA Men’s Player) ប្រចាំឆ្នាំ២០១៨ នឹងត្រូវបោះឆ្នោតជ្រើសរើសចេញពីបញ្ជីសម្រាំងពិសេស១០រូប(Top10) ដែលឆ្នាំមុនៗរើសចេញពីបញ្ជីសម្រាំង២៣រូប ។
ការវាយតម្លៃកីឡាករឆ្នើមធ្វើឡើងដោយគណៈកម្មការជំនាញចំនួន១៣រូបក្នុងនោះក៏មានតារាជើងចាស់ប្រេស៊ីល Ronaldo និង Lothar Matthaeus របស់អាល្លឺម៉ង់ផងដែរ ។ ទន្ទឹមគ្នានេះដែរ ប្រធានក្រុមជម្រើសជាតិ គ្រូបង្វឹក ប្រព័ន្ធផ្សព្វផ្សាយ និងអ្នកគាំទ្រទាំងអស់ត្រូវធ្វើការជ្រើសរើសតាមរយៈការបោះឆ្នោតនៅចន្លោះថ្ងៃទី២៣ កក្កដា ដល់ថ្ងៃទី១០ សីហា ។
ម្ចាស់ជ័យលាភីគ្រងពាននេះនឹងត្រូវប្រកាសឱ្យដឹងនៅឯពិធី The Best FIFA Football Awards នាថ្ងៃទី២៤ កញ្ញា នៅក្នុងក្រុងឡុងប្រទេសអង់គ្លេស ។ តារាល្បីក្នុងពិភពបាល់ទាត់ Cristiano Ronaldo និង Lionel Messi សុទ្ធតែឈ្នះពាននេះម្នាក់៥លើកក្នុងរយៈពេល១០ឆ្នាំមុន ដែលពេលនោះមានឈ្មោះ «FIFA World Player និង Ballon d’Or» ។ ឥឡូវ ពាននេះនឹងត្រូវប្តូរឈ្មោះហៅថាពាន «The Best FIFA’s Men Player» វិញ ។
គួរបញ្ជាក់ថា មានពានរង្វាន់ផ្សេងទៀតក៏នឹងត្រូវប្រគល់ទៅឱ្យកីឡាករលេងល្អបំផុត គ្រូបង្វឹក អ្នកចាំទី និងពានរង្វាន់លេងត្រឹមត្រូវផងដែរ ដែលជាការលើកទឹកចិត្តឱ្យការលេងមានក្រមសីលធម៌ ៕
ចែករំលែកព័តមាននេះ