ខេត្តកំពង់ធំ ៖ ករណីបុរសម្នាក់ស្រវឹងស្រាដើរធ្លាក់រណ្តៅទឹកស្លាប់បានបង្កឲ្យមានការភ្ញាក់ផ្អើលកាលពីវេលាម៉ោង០៩និង៣០នាទីព្រឹកថ្ងៃទី០៤ ខែកក្កដា ឆ្នាំ២០១៨ ស្ថិតក្នុងភូមិត្រដក់ពង ឃុំពង្រ ស្រុកបារាយណ៍ ខេត្តកំពង់ធំ ។…
ខេត្តកំពង់ធំ ៖ ករណីបុរសម្នាក់ស្រវឹងស្រាដើរធ្លាក់រណ្តៅទឹកស្លាប់បានបង្កឲ្យមានការភ្ញាក់ផ្អើលកាលពីវេលាម៉ោង០៩និង៣០នាទីព្រឹកថ្ងៃទី០៤ ខែកក្កដា ឆ្នាំ២០១៨ ស្ថិតក្នុងភូមិត្រដក់ពង ឃុំពង្រ ស្រុកបារាយណ៍ ខេត្តកំពង់ធំ ។
សមត្ថកិច្ចនគរបាលបានឲ្យដឹងថា សពជនរងគ្រោះមានឈ្មោះ ពៅ ភាន់ ភេទប្រុស អាយុ៥៥ឆ្នាំ រស់នៅភូមិកើតហេតុខាងលើ ។ បើយោងតាមការបំភ្លឺពីសាច់ញាតិរបស់ជនរងគ្រោះ និងអ្នកភូមិប្រាប់ថា ជនរងគ្រោះ គឺជាមនុស្សចូលចិត្តផឹកស្រាជាប្រចាំ ហើយតែងតែស្រវឹងមិនសូវជាលស់ថ្ងៃណានោះឡើយ លុះនៅព្រឹកថ្ងៃកើតហេតុ ជនរងគ្រោះបានយកដបស្រាទៅអង្គុយផឹកជិតរណ្តៅទឹកមួយកន្លែងសម្រាប់ដងស្រោចដំណាំរហូតស្រវឹងជោគជាំយ៉ាងខ្លាំងទោះជាសាច់ញាតិនិយាយក៏មិនស្តាប់ ធ្វើឲ្យអ្នកផងខឹងមិនសូវរវីរវល់យកចិត្តទុកដាក់ជាមួយនឹងជនរងគ្រោះនោះឡើយ ។
បើតាមការសន្និដ្ឋានរបស់អ្នកភូមិថា នៅពេលដែលជនរងគ្រោះស្រវឹងស្រាប្រហែលជាគាត់ងើបដើរក៏ធ្លាក់ចូលរណ្តៅទឹកបណ្តាលឲ្យស្លាប់ ក្រោយពីស្ងាត់មាត់ឈឹងមិនឮសម្លេងនិយាយឡូឡារបស់ជនរងគ្រោះនោះ សាច់ញាតិ និងអ្នកជិតខាងក៏នាំគ្នាដើរមករកមើល ស្រាប់តែឃើញជនរងគ្រោះបានលង់ទឹកស្លាប់បាត់ទៅហើយ រួចក៏បានរាយការណ៍ប្រាប់ដល់អាជ្ញាធរសមត្ថកិច្ចយើងបានចុះដល់កន្លែងកើតហេតុធ្វើការពិនិត្យសពឃើញថា ពុំមានស្លាកស្នាមអ្វីពាក់ពន្ធនិងករណីឃាតកម្មឡើយ គឺសពស្លាប់ដោយធ្លាក់ចូលក្នុងរណ្តៅទឹកពិតប្រាកដមែនក៏ប្រគល់ជូនសាច់ញាតិធ្វើបុណ្យតាមប្រពៃណី ៕
ចែករំលែកព័តមាននេះ