ខេត្តបាត់ដំបង ៖ ក្រោមគម្រោងហិរញ្ញប្បទានពិសេសរបស់រាជរដ្ឋាភិបាលកម្ពុជាផ្តល់ឱ្យក្រុមហ៊ុនធនាគារស្រូវ (កម្ពុជា) ក្រោមអធិបតីភាពលោកជូ គឹមឡេង រដ្ឋលេខាធិការក្រសួងសេដ្ឋកិច្ច និងហេរញ្ញវត្ថុ លោកប៊ុត គឹមស៊ាន អភិបាលរងខេត្តបាត់ដំបង លោកអ៊ុ រាត្រី អភិបាលរងខេត្តបន្ទាយមានជ័យដែលបានធ្វើឡើងវេលាព្រឹកថ្ងៃទី០៣ ខែកក្កដា ឆ្នាំ២០១៨ ក្នុងភូមិសាស្ត្រ ក្រុមហ៊ុនបៃតងកម្ពុជា ក្រុង-ខេត្តបាត់ដំបង ។
លោកឧកញ៉ា ភួ ពុយ ប្រធានក្រុមប្រឹក្សាភិបាលធនាគារស្រូវ (កម្ពុជា-ភីអិលស៊ី) បានមានមតិស្វាគមន៍ និងបានបញ្ជាក់ថា ឃ្លាំងស្តុកស្រូវដែលអាចស្តុកស្រូវ២០ម៉ឺនតោន និងឡសម្ងួតដែលមានសមត្ថភាពសម្ងួតស្រូវ៣ពាន់តោនក្នុង១ថ្ងៃ ដែលជាឃ្លាំងស្តុកស្រូវ និងឡសម្ងួតខ្នាតធំជាងគេនៅកម្ពុជា ស្ថិតក្រោមគម្រោងវិនិយោគរបស់រាជរដ្ឋាភិបាលកម្ពុជាផ្តល់ឲ្យក្រុមហ៊ុនធនាគារស្រូវ (កម្ពុជា) ភីអិលស៊ី ក្នុងតម្លៃសរុបចំនួន១៥លានដុល្លារអាមេរិក ត្រូវបានដាក់ឲ្យដំណើរការបម្រើសហគមន៍ស្រូវអង្ករជាទូទៅនៅក្នុងខេត្តបាត់ដំបងនៅថ្ងៃទី០៣ ខែកក្កដានេះ គឺជាចម្លើយឆ្លើយតបតាមតម្រូវការរបស់ប្រជាកសិករក្នុងសហគមន៍ដែលជួបការលំបាកកន្លងមកនោះ ។
បន្ទាប់មកលោក កៅ ថាច អគ្គនាយកធនាគារអភិវឌ្ឍន៍ជនបទស្តីពីហិរញ្ញប្បទានពិសេសរបស់រាជរដ្ឋាភិបាលបានរំលឹកជូនដល់បងប្អូនប្រជាពលរដ្ឋ ប្រជាសហគមន៍ដែលមានវត្តមានក្នុងពិធីសម្ភោធថា ក្នុងរយៈកាលកន្លងមកជាពិសេសការធ្លាក់ចុះជាគំហុកនៃតម្លៃស្រូវ មិនសមហេតុផល កាលពីឆ្នាំ២០១៦ និងដោយមើលឃើញពីកង្វះឃ្លាំងស្តុកស្រូវ ឡសម្ងួត និងការបង្វិលទុនក៏ដូច បញ្ហាដែលតែងតែកើតមានដោយសារ ការផ្គត់ផ្គង់ស្រូវលើសតម្រូវការ ក្នុងរដូវប្រមូលផលស្រូវជាដើម និងដោយមើលឃើញពីការលំបាកដូចនេះទើបរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រីបានដាក់ចេញជាបន្ទាន់នូវគម្រោងអន្តរាគមន៍ ពិសេសរបស់រាជរដ្ឋាភិបាលតាមរយៈធនាគារអភិវឌ្ឍន៍ជនបទ ជាប្រតិបត្តិការអនុវត្តគម្រោង ពិសេសសាងសង់ឃ្លាំងស្តុកស្រូវ និងឡសម្ងួតស្រូវនៅក្នុងតំបន់ខេត្តបាត់ដំបង ក្នុងគោលដៅធានាស្ថេរភាពថ្លៃស្រូវ និងលើកកម្ពស់ថ្លៃស្រូវដល់ប្រជាកសិករ ដើម្បីលើកស្ទួយថ្លៃស្រូវ និងរួមចំណែកលើកកម្ពស់ជីវភាពរបស់ប្រជាកសិករ ។
លោក កៅ ថាច បានបន្ថែមទៀតថា បន្ទាប់ពីគម្រោងអន្តរាគមន៍នេះបានដាក់ចេញមក ឃើញថា ដោយរាជរដ្ឋាភិបាលកម្ពុជាជំរុញតាមរយៈធនាគារអភិវឌ្ឍន៍ជនបទសម្រេចបានរួមមាន ៖ ១- បង្កើនឥណទានជាទុនបង្វិលកើនឡើងដល់៥០លានដុល្លារអាមេរិក (កញ្ចប់ថវិកា ពិសេសរបស់រាជរដ្ឋាភិបាល ចំនួន៤៣លានដុល្លារអាមេរិក និងប្រើប្រាស់មូលនិធិផ្ទាល់របស់ធនាគារអភិវឌ្ឍន៍ជនបទចំនួន៧លានដុល្លារអាមេរិក) ដល់រោងម៉ាស៊ីនកិនស្រូវ , ក្រុមហ៊ុនកែច្នៃ និងនាំចេញអង្ករ និងមជ្ឈមណ្ឌល ឬអ្នកប្រមូលទិញស្រូវសម្រាប់ប្រមូលទិញស្រូវនារដូវប្រមូលផល ។
២ – បង្កើនការវិនិយោគចំនួន១៥លានដុល្លារអាមេរិកផ្សេងទៀត សម្រាប់គម្រោងវិនិយោគ លើការសាងសង់ឃ្លាំងស្តុក និងឡសម្ងួតស្រូវ នៅទីតាំងយុទ្ធសាស្ត្រតាមតំបន់ខេត្តចំនួន៣ គឺតំបន់ខេត្តព្រៃវែង តំបន់ខេត្តកំពង់ធំ និងតំបន់ខេត្តតាកែវ ដែលក្នុងនោះ៥លានដុល្លារអាមេរិកសម្រាប់សាង់សង់ឃ្លាំងដែលមានសមត្ថភាពស្តុកទុកស្រូវយ៉ាងតិច៥០,០០០តោន និងឡសម្ងួតមានសមត្ថភាព សម្ងួតស្រូវបាន១,៥០០តោនក្នុងមួយថ្ងៃ ។ ជាពិសេសតម្លៃស្រូវសែនក្រអូបបានកើនឡើងដល់ប្រមាណ ១,២០០ រៀលក្នុង១គីឡូក្រាមនារដូវប្រមូលផលឆ្នាំ២០១៧-២០១៨ ធៀបនឹងគ្រាដូចគ្នាឆ្នាំមុនប្រមាណ៩០០ រៀលក្នុង១គីឡូក្រាមតែប៉ុណ្ណោះ។
លោក ជូ គឹមឡេង រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុតំណាងលោកអគ្គបណ្ឌិតសភាចារ្យ អូន ព័ន្ធមុនីរ័ត្នបានលើកឡើងថា ស្ថិតក្នុងបរិយាកាសអំណោយផលនៃសុខសន្តិភាព ស្ថិរភាពនយោបាយ សណ្តាប់ធ្នាប់សង្គម និងការរក្សាបានស្ថិរភាពម៉ាក្រូសេដ្ឋកិច្ចយ៉ាងល្អប្រសើរកន្លងមកសេដ្ឋកិច្ចកម្ពុជាបានបន្តសម្រេចកំណើន ៦.៩% ក្នុងឆ្នាំ២០១៧ ។ លោកបន្តថា ប្រទេសកម្ពុជាកំពុងតែផ្លាស់ប្តូររចនាសម្ព័ន្ធសេដ្ឋកិច្ច ពីប្រទេសដែលពឹងផ្អែកលើវិស័យ កសិកម្ម ទៅជាប្រទេសដែលពឹងផ្អែកលើវិស័យឧស្សាហកម្ម និងសេវាកម្ម ។ កម្រិតជីវភាពរបស់ប្រជាជនកាន់តែមានភាពប្រសើរឡើងដែលឆ្លុះបញ្ចាំងតាមរយៈសូចនាករសង្គម ជាពិសេសការកើនឡើងនៃ ផលិតផលសរុបក្នុងស្រុកជាមធ្យមសម្រាប់មនុស្សម្នាក់ពី១,០៤២ ដុល្លារអាមេរិក ក្នុងឆ្នាំ២០១៣ ដល់ប្រមាណ១,៤៣៥ ដុល្លារអាមេរិក ក្នុងឆ្នាំ២០១៧ ។
កម្ពុជាបានសម្រេចនូវបង្គោលចរដ៏សំខាន់មួយនៅក្នុងប្រវត្តិសាស្ត្ររបស់ខ្លួន គឺបានប្រែក្លាយពីប្រទេសមានចំណូលទាបទៅជាប្រទេសមានចំណូលមធ្យមកម្រិតទាប ហើយកំពុងបន្តដំណើរឈានទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ។ លើសពីនេះ ត្រូវបន្តជួយសម្របសម្រួលការទិញ-លក់ស្រូវ ក៏ដូចជាកសិផលផ្សេងទៀត តាមរយៈការបង្កលក្ខណៈងាយស្រួលដល់ការដឹកជញ្ជូនស្រូវរបស់កសិករពីទីវាលស្រែ ឬកន្លែងប្រមូលផ្តុំទិញ-លក់ស្រូវ ដែលអាចជានៅសាលាឃុំ ឬកន្លែងផ្សេងទៀត ដែលងាយស្រួលដល់ការប្រមូលផ្តុំទិញ-លក់ស្រូវរបស់បងប្អូន កសិករយើង ។ ជាមួយគ្នានេះ រាជរដ្ឋាភិបាលកម្ពុជា តាមរយៈធនាគារអភិវឌ្ឍន៍ជនបទសូមបន្តគាំទ្រ និងជំរុញយន្តការផ្តល់ឥណទានជាទុនបង្វិលក៏ដូចជា លើទឹកចិត្តដល់វិស័យឯកជនឲ្យពង្រីកឃ្លាំងស្តុក និងឡសម្ងួតស្រូវឲ្យបានកាន់តែធំ និងមានលក្ខណៈស្តង់ដារក្នុងការ រក្សាទុកស្រូវ- អង្ករ ឲ្យមានគុណភាពល្អ ។
លោក ជូ គឹមឡេង បានប្រកាសដាក់ឲ្យដំណើរការជាផ្លូវការ «ឃ្លាំងស្តុកស្រូវទំហំ២០០,០០០តោន និងឡសម្ងួត ដែលមានសមត្ថភាពសម្ងួតស្រូវ ៣,០០០តោន ក្នុង១ថ្ងៃ របស់ក្រុមហ៊ុនធនាគារស្រូវ (កម្ពុជា) ភីអិលស៊ី នៅខេត្តបាត់ដំបង ក្រោមកម្មវិធីពិសេសរបស់រាជរដ្ឋាភិបាល» ។ ឆ្លៀតក្នុងឱកាសនោះផងដែរ គណៈអធិបតីក៏បានសំណូមពរ និងអំពាវនាវដល់ប្រជាពលរដ្ឋទាំងអស់ ដែលមានសិទ្ធិបោះឆ្នោត ហើយដែលមានឈ្មោះនៅក្នុងបញ្ជីបោះឆ្នោត សូមអញ្ជើញទៅចូលរួមបោះឆ្នោតជ្រើសតាំងតំណាងរាស្ត្រ នៅថ្ងៃអាទិត្យ ទី២៩ ខែកក្កដា ឆ្នាំ២០១៨ ខាងមុខឲ្យបានគ្រប់ៗគ្នា ៕
ចែករំលែកព័តមាននេះ