រាជធានីភ្នំពេញ ៖ លោក ឃួង ស្រេង អភិបាលរាជធានីភ្នំពេញ បានបញ្ជាដល់កម្លាំងសមត្ថកិច្ចឱ្យធ្វើការស្រាវជ្រាវជាបន្ទាន់ ដើម្បីរកអ្នកម៉ៅការសំណង់ ឱ្យមកទទួលខុសត្រូវចំពោះជនរងគ្រោះ បន្ទាប់ពីមានការបាក់ធ្លាក់ដំបូល…
រាជធានីភ្នំពេញ ៖ លោក ឃួង ស្រេង អភិបាលរាជធានីភ្នំពេញ បានបញ្ជាដល់កម្លាំងសមត្ថកិច្ចឱ្យធ្វើការស្រាវជ្រាវជាបន្ទាន់ ដើម្បីរកអ្នកម៉ៅការសំណង់ ឱ្យមកទទួលខុសត្រូវចំពោះជនរងគ្រោះ បន្ទាប់ពីមានការបាក់ធ្លាក់ដំបូល (ប្លង់សេ) ជាន់ទី២៣ នៃអគារខុនដូ និងសណ្ឋាគារ Mekong view tower 6 ដែលបណ្តាលឱ្យកម្មករសំណង់២នាក់ ស្លាប់និងរងរបួសកម្មករប្រុសស្រី៥នាក់ទៀត ។
ការដាក់បទបញ្ជានេះ ខណៈពេលដែលលោកអភិបាលរាជធានីភ្នំពេញ អមដំណើរដោយលោកអភិបាលរងក្រុង និងលោក ឃ្លាំង ហួត អភិបាលខណ្ឌជ្រោយចង្វា ព្រមទាំងមន្ត្រីជំនាញបានចុះទៅដល់កន្លែងកើតហេតុទាំងយប់ ។ ទោះបីជាយ៉ា់ងណា គេពុំដឹងពីមូលហេតុនៃការបាក់ធ្លាក់ពិតាននេះនៅឡើយទេថា បណ្តាលមកពីមូលហេតុអ្វីនោះ ។
គួរបញ្ជាក់ថា ដំបូលជាន់ទី២៣ដែលជាជាន់បង្ហើយ នៃអគារខុនដូនិងសណ្ឋាគារ Mekong view tower 6 ដែលមានទីតាំងក្នុងភូមិ ទី២ក្នុងសង្កាត់ជ្រោយចង្វា ខណ្ឌជ្រោយចង្វា បានបាក់ធ្លាក់បណ្តាលឱ្យកម្មករសំណង់ប្រុសស្រី៥នាក់រងរបួស(ធ្ងន់៣នាក់ និងស្រាល២នាក់) ព្រមទាំងបាត់ខ្លួនកប់ក្នុងភក់បេតុង ក្រោមក្តារពុម្ពអស់រយៈពេលជាច្រើនម៉ោង ទើបរកសពឃើញក្រោយពេលកាយបេតុងចេញ ។
ហេតុការណ៍បាក់ផ្ទៃប្លង់សេដែលកើតឡើងគួរឱ្យភ្ញាក់ផ្អើលនេះ បង្កឱ្យមានការឆោឡោកាលពីវេលាម៉ោង១និង៤០នាទីរសៀលនិងដឹងដល់សមត្ថកិច្ចនៅវេលាម៉ោងប្រមាណ២និង៣០នាទីរសៀលថ្ងៃទី១ កក្កដា ។
កម្មករសំណង់ដែលស្លាប់១-ឈ្មោះ បាន លាស់ ភេទប្រុស អាយុ៤៨ឆ្នាំ រស់នៅភូមិតាពុំ ឃុំល្វេ ស្រុកកោះសូទិន ខេត្តកំពង់ចាម, ២-ឈ្មោះ នាម ហ៊ីង ភេទប្រុស អាយុ៣៨ឆ្នាំ រស់នៅខេត្តសៀមរាប ។
ជនរងគ្រោះទាំង២នាក់ បានកប់ក្រោមបេតុងក្តារពុម្ពនិងដែកជន្ទល់រហូតដល់វេលាម៉ោង១០និង៣០នាទីយប់ ទើប សមត្ថកិច្ច និងក្រុមកម្មករ ព្រមទាំងក្រុមជាងប្រមាណជិត៥០នាក់ បាននាំគ្នាបុកបំបែកបេតុង ដើម្បីស្វែងរកសពកម្មករទាំង២នាក់ឃើញ ។ ចំណែកអ្នករងរបួសភ្លាម ពុំបានស្គាល់ឈ្មោះពិតប្រាកដឡើយ ១-ឈ្មោះ នឿន ភេទប្រុស របួសជើង ជាជាង, ២-ឈ្មោះ ផាត របួសជើង, ៣-ឈ្មោះ រិទ្ធ ភេទប្រុស របួសស្មា, ៤-ឈ្មោះ ស្រី លន ភេទស្រី របួសស្មា និង៥-ជាស្ត្រី មិនស្គាល់ឈ្មោះបានរបួសកែងដៃ ។
តាមឈ្មោះ ប៉ង សារុន ភេទប្រុស ជាប្រធានផ្នែករដ្ឋបាលនៃការដ្ឋានអគារខុនដូនិងសណ្ឋាគារ Mekong view tower 6 បានឱ្យដឹងថា ផ្ទៃប្លង់សេដែលបាក់នោះមានទំហំ១២ម៉ែត្រគុណនឹង២៤ម៉ែត្រ និងមានកម្រាស់០,១៤ម៉ែត្រ ស្ថិតនៅដំបូលជាន់ទី២៣ បានបាក់នៅវេលាម៉ោង១និង៤០នាទីរសៀល ខណៈពេលដែលមានជាងឈ្មោះ ផាត និងឈ្មោះ មឿន ជា ជាអ្នកទទួលខុសត្រូវ ព្រមទាំង មានវិស្វករឈ្មោះ សៅ ផាណូ ជាអ្នកត្រួតពិនិត្យមើលបច្ចេកទេស ។
ទាក់ទិននៃការបាក់ធ្លាក់ប្លង់សេនេះ ប្រធានរដ្ឋបាលរូបនោះ ពុំបានឱ្យដឹងពីមូលហេតុនៃការបាក់នេះឡើយ ។ នៅក្នុងការបាក់នេះបណ្តាលឱ្យកម្មករនិងជាងចំនួន៥នាក់ ក្នុងនោះមានប្រុស៣ និងស្រី២នាក់ បានរងរបួស និងបានបាត់ខ្លួនចំនួន២នាក់ ដោយកប់ក្នុងបេតុងដែលទើបចាក់រួច ។
តាមជាងសំណង់បានប្រាប់សមត្ថកិច្ចឱ្យដឹងថា នៅវេលាព្រឹកថ្ងៃកើតហេតុ ក្រុមជាងប្រមាណ១៧នាក់ បាននាំគ្នាចាក់ប្លង់សេដំបូលជាន់ទី២៣នៃអគារខុនដូ និងសណ្ឋាគារ ។ លុះនៅវេលារសៀលក៏បន្តបាញ់បេតុងលាយស្រាប់ចាក់ប្លង់សេទៀត ស្រាប់តែបណ្តាលអោយបាក់ជន្ទល់ជ្រែង ក៏ធ្លាក់បេតុងមកក្រោមបណ្តាលឱ្យកម្មករ និងជាងរងរបួស ដែលនៅផ្នែកខាងលើ ព្រមទាំងសង្កត់ជាង២នាក់ ដែលកាន់វិទ្យុទាក់ទង និងចាំមើលជន្ទល់ក៏បាត់ខ្លួនដោយជាប់នៅពីក្រោមពិតាននោះតែម្តង ។
តាមប្រភពថា ការរុករកជាង(កម្មករ)ដែលបាត់ខ្លួន ត្រូវបានប្រើម៉ូទ័របុកបំបែកបេតុង និងកាត់គាស់រហូតដល់វេលាម៉ោងប្រមាណ១០និង៣០នាទីយប់ គឺអស់រយៈពេលប្រមាណជាង៩ម៉ោង ទើបរកសាកសពជាង២នាក់ដែលកប់នៅក្រោមក្តារពុម្ព និងជន្ទល់ព្រមទាំងបេតុង ដោយដៃកាន់ជាប់ដែលជន្ទល់យ៉ាងអាណោចអាធ័ម ។ សពត្រូវបានក្រុមគ្រួសារនាំយកទៅធ្វើបុណ្យតាមប្រពៃណីនៅឯស្រុកកំណើត ៕
ចែករំលែកព័តមាននេះ