រាជធានីភ្នំពេញ ៖ ក្រោមអនុសាសន៍ដ៏ម៉ឺងម៉ាត់រាល់អង្គប្រជុំប្រចាំខែ របស់នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ដែលបានផ្តោតលើកិច្ចការងារសំខាន់ ស្តីពីការទប់ស្កាត់ និងបង្ក្រាបបទឧក្រិដ្ឋកម្មគ្រឿងញៀន កាលពីរសៀលថ្ងៃទី០១ កក្កដា ២០១៨ កម្លាំងសមត្ថកិច្ច ការិយាល័យទី៦ នៃមន្ទីរប្រឆាំងគ្រឿងញៀនក្រសួងមហាផ្ទៃ បានធ្វើការចាប់ខ្លួនឧក្រិដ្ឋជន ជួញដូរគ្រឿងដោយខុសច្បាប់ម្នាក់ និងដកហូតវត្ថុតាងថ្នាំញៀនប្រមាណជាង១៦គីឡូក្រាម នៅកណ្តាលរាជធានីភ្នំពេញ។
ឧក្រិដ្ឋជនមានឈ្មោះ ម៉េង រតនា ហៅខ្វៃ ភេទប្រុស អាយុ៤១ឆ្នាំ ជនជាតិខ្មែរ មុខរបរ និងស្នាក់នៅមិនពិតប្រាកដ។ ទាក់ទិននឹងការចាប់ខ្លួនជនសង្ស័យ ជួញដូរគ្រឿងញៀនខាងលើនេះ លោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន ក្រសួងមហាផ្ទៃ បានបង្ហើបឲ្យដឹងថា មុននឹងឈានដល់ការចាប់ខ្លួនឈ្មួញគ្រឿងញៀន និង ថ្នាំញៀនជាង១៦គីឡូក្រាមនេះ កម្លាំងជំនាញនៃការិយាល័យទី៦ ដែលដឹកនាំដោយលោក ឧត្តមសេនីយ៍ត្រី ហម គន្ធី នាយករងមន្ទីរប្រឆាំគ្រឿងញៀន បានបើកការស្រាវជ្រាវ និង ស៊ើបអង្កេតរាប់ថ្ងៃខែទម្រាំកំណត់បានមុខសញ្ញាជួញដូរគ្រឿងញៀនដ៏ធំមួយនេះ។
លោក ឡឹក វណ្ណៈ បន្តថា ក្រោយពីកំណត់មុខសញ្ញបានច្បាស់លាស់ហើយ លោកនាយឧត្តមសេនីយ៍ ម៉ក់ ជីតូ អគ្គស្នងការរង ទទួលបន្ទុកការងារប្រយុទ្ធប្រឆាំងគ្រឿងញៀន បានអនុញ្ញាតឲ្យលោក ឡឹក វណ្ណៈ រៀបចំកម្លាំងជំនាញបំពាក់ដោយអាវុធការពារខ្លួន ចេញបង្ក្រាបបទជួញដូរគ្រឿងញៀននោះឲ្យខាងតែបាន ។ ជាក់ស្តែងនាវេលាម៉ោងប្រមាណ៣ និង៣០នាទីរសៀលថ្ងៃទី០១ កក្កដា កម្លាំងសមត្ថកិច្ចដែលដឹកនាំដោយលោកឧត្តមសេនីយ៍ ហម គន្ធី បានធ្វើការស្ទាក់ចាប់ឃាត់ខ្លួន ជនសង្ស័យម្នាក់ ដែលកំពុងធ្វើដំណើតាមរថយន្ត នៅចំណុចលើដងផ្លូវមួយជិតស្ថានទូតចិន ក្នុងសង្កាត់ ទួលទំពូងទី២ ខណ្ឌចម្ការមន រាជធានីភ្នំពេញ រួមទាំងដកហូតថ្នាំញៀន ប្រភេទ មេតំហ្វេតាមីន(ICE) ប្រមាណ១៥គីឡូ៨១២ក្រាម និងហេរ៉ូអ៊ីនចំនួន២បន្ទះ ស្មើ៧ខាំ៨៩៤ ក្រាម។
ក្រោយពីចាប់ខ្លួន ជនសង្ស័យជាឧក្រិដ្ឋជនជួញដូរគ្រឿងញៀនរូបនេះបានសារភាញថា ខ្លួនមានការទំនាក់ទំនងជាមួយ ជនជាតិចិនម្នាក់ តាំងពីឆ្នាំ១៩៩៣ រហូតដល់ឆ្នាំ២០១៦ ដោយរកស៊ី និងជួយរក្សាទុក ចែកចាយគ្រឿងញៀនខុសច្បាប់ជាបន្តបន្ទាប់។ ជនសង្ស័យបន្តថា រហូតមកដល់ថ្ងៃទី២៦ មិថុនា ២០១៨ ជនជាតិចិនម្នាក់នោះ បានឲ្យខ្លួនទៅទទួលគ្រឿងញៀនមួយសាក់កាដូ និង មួយដុំមានចំនួន២៨កញ្ចប់តូច នៅចំណុចខាងក្រោយណាហ្គាវើល និងឲ្យខ្លួនយកទៅរក្សាទុក និង ចែកចាយបន្ត។ លុះដល់វេលារសៀលថ្ងៃទី០១ កក្កដា ២០១៨ ក៏ត្រូវសមត្ថកិច្ចមន្ទីរប្រឆាំគ្រឿងញៀនចាប់ ខ្លួនតែម្តងទៅ៕
https://youtu.be/3CMgLE_wyR4
ចែករំលែកព័តមាននេះ