រាជធានីភ្នំពេញ ៖ ប្រជាពលរដ្ឋរស់នៅក្នុងសហគមន៍គង្គាផុស ភូមិគង្គាផុស សង្កាត់ទួលសង្កែ២ ខណ្ឌឫស្សីកែវ ចំនួនជាង៤០០គ្រួសារស្មើនឹង៤០២ក្បាលដី ត្រូវបានរាជរដ្ឋាភិបាលកម្ពុជា ប្រទានកម្ម ដីធ្លីជូន…
រាជធានីភ្នំពេញ ៖ ប្រជាពលរដ្ឋរស់នៅក្នុងសហគមន៍គង្គាផុស ភូមិគង្គាផុស សង្កាត់ទួលសង្កែ២ ខណ្ឌឫស្សីកែវ ចំនួនជាង៤០០គ្រួសារស្មើនឹង៤០២ក្បាលដី ត្រូវបានរាជរដ្ឋាភិបាលកម្ពុជា ប្រទានកម្ម ដីធ្លីជូន ក្រោយពីរស់នៅគ្មានប័ណ្ណកម្មសិទ្ធិជិត២០ឆ្នាំកន្លងមកនេះ។ ការប្រកាសប្រគល់ជូននេះ បានធ្វើឡើងកាលពីរសៀលថ្ងៃទី០២ កក្កដា ២០១៨ ភូមិគង្គាផុស សង្កាត់ ទួលសង្កែ២ ខណ្ឌឫស្សីកែវ ក្រោមអធិបតីភាពលោក ឃួង ស្រេង អភិបាលរាជធានីភ្នំពេញ។
លោក សារិន វណ្ណា ប្រធានមន្ទីររៀបចំដែនដីសំណង់ និងសុរិយោដី រាជធានីភ្នំពេញ បានឲ្យដឹងថា គម្រោងរៀបចំដែនដី និងរដ្ឋបាលដីធ្លីរាជធានីភ្នំពេញ បានចាប់ផ្តើមនៅខែតុលា ឆ្នាំ២០០៣ រហូតមកដល់បច្ចុប្បន្នគម្រោង ចុះបញ្ជីដីធ្លីបាន៦០សង្កាត់ ក្នុងរាជធានីភ្នំពេញ។ លោកបន្តថា ការប្រទានកម្មនេះ រាជរដ្ឋាភិបាលក្រោមការដឹកនាំរបស់សម្តេចតេជោ ហ៊ុន សែន គឺប្រទានកម្មឥឲ្យទាំងអស់តែម្តង ពោលគឺទាំងប្រថាប់ត្រា បង់ពន្ធអន្តរក្រសួង និងការបង់ពន្ធមួយម៉ែត្រការ៉េ ចំនួន៥០០រៀល ក៏រដ្ឋជាអ្នកបង់ជូនផងដែរ។
លោក ឃួង ស្រេង អភិបាលរាជធានីភ្នំពេញបានលើកឡើងថា អាជ្ញាធរចុះមកក្នុងពេលនេះគឺដើម្បីជួយប្រជាពលរដ្ឋមិនមែន មកបោកប្រាស់ទេ ដោយឃើញការលំបាករបស់ប្រជាពលរដ្ឋ ទើបសម្តេចសម្រេចប្រទានកម្មជូនបងប្អូនប្រជាពលរដ្ឋតែម្តង លើផ្ទៃដី២ហិកតាកន្លះ នៅសហគមន៍គង្គាផុសសង្កាត់ទួលសង្កែ២នេះ។ លោកបន្តថា បុរីខ្លះបំបែកក្បាលដី ហើយមិនចែកទេ ទុកនៅធនាគារដោយមិនបានប្រគល់ឲ្យបងប្អូន ដែលធ្វើឲ្យការស្នាក់នៅមិនស្របច្បាប់ ដែលបញ្ហានេះមានច្រើននៅតាមបុរី ហើយបញ្ហានេះមួយចំនួន ត្រូវបានរដ្ឋបាលរាជធានីដោះស្រាយបានមួយចំនួនហើយ។
ក្នុងឱកាសនោះដែរ លោក ឃួង ស្រេង បានជំរុញឲ្យមន្ត្រីដែនដី ត្រូវធ្វើទាំងថ្ងៃសោរ៍អាទិត្យ ដើម្បីប្រគល់ជូនប្រជាពលរដ្ឋឲ្យបានលឿន ចៀសវាងទុកយូរកើតជាបញ្ហា។ លោកបន្តថា យើងបានបំពេញការងារជូនបងប្អូនប្រជាពលរដ្ឋហើយ នៅតែបងប្អូនត្រូវជួយមកពួកយើងខ្ញុំវិញ បងប្អូនធ្វើបុណ្យចង់បានបុណ្យ ឯយើងខ្ញុំធ្វើបុណ្យក៏ចង់បាន បុណ្យដែរ។ ដូច្នេះកុំភ្លេចទៅបោះឆ្នោតនៅថ្ងៃទី២៩ កក្កដា ២០១៨ខាងមុខ៕
ចែករំលែកព័តមាននេះ