រាជធានីភ្នំពេញ ៖ នាវេលាម៉ោងប្រមាណ៥ព្រឹកថ្ងៃទី២៤ មិថុនា មានគ្រេាះអគ្គិភ័យមួយបានកើតឡើងបំផ្លាញលំនៅឋានអស់២២ខ្នង ដោយមានអណ្តាតភ្លើងលាយឡំទៅដោយផ្សែងខ្មៅខ្មួលហុយឡើងទៅលើអាកាស នៅក្នុងភូមិក្បាលទំនប់ទី៣ សង្កាត់បឹងទំពុនទី២ ខណ្ឌមានជ័យ ។…
រាជធានីភ្នំពេញ ៖ នាវេលាម៉ោងប្រមាណ៥ព្រឹកថ្ងៃទី២៤ មិថុនា មានគ្រេាះអគ្គិភ័យមួយបានកើតឡើងបំផ្លាញលំនៅឋានអស់២២ខ្នង ដោយមានអណ្តាតភ្លើងលាយឡំទៅដោយផ្សែងខ្មៅខ្មួលហុយឡើងទៅលើអាកាស នៅក្នុងភូមិក្បាលទំនប់ទី៣ សង្កាត់បឹងទំពុនទី២ ខណ្ឌមានជ័យ ។ លំនៅឋានដែលត្រូវភ្លើងឆេះនេះ សុទ្ធសឹងសាងសង់ពីឈើប្រក់សង្ក័សី ទំហំចន្លេាះពី៥ម៉ែត្រគុណ៨ម៉ែត្រ និងសង់ជាប់គ្នារដឹកតែម្តង ។
ប្រភពព័ត៌មានឱ្យដឹងថា នាវេលាព្រលឹមស្រាងៗនោះ គេឮសូរសំឡេងផ្ទុះចេញពីតំបន់ខាងលើ ហើយមិនបានប៉ុន្មាននាទីផង ស្រាប់តែមានអណ្តាតភ្លើងឆាបឆេះឡើង ធ្វើឱ្យអ្នករស់នៅក្បែរនេាះភ័យស្លន់ស្លោរត់ជាន់ជើងគ្នាប្រសាច ដោយអ្នកខ្លះព្យាយាមយកទឹកជះទប់ស្កាត់អណ្តាតភ្លើង និងអ្នកខ្លះទៀតព្យាយាមជញ្ជូនអីវ៉ាន់ចេញពីផ្ទះដើម្បីសង្គ្រោះពីអណ្តាតភ្លើង ។
ដោយមើលឃើញអណ្តាតភ្លើងឆេះរាលដាលកាន់តែខ្លាំងឡើងៗ ប្រជាពលរដ្ឋក៏បានរាយការណ៍ទៅអាជ្ញាធរមូលដ្ឋានឱ្យជួយអន្តរាគមន៍ ។ភ្លាមនេាះ អាជ្ញាធរមូលដ្ឋានរួមទាំងរថយន្តពន្លត់អគ្គិភ័យជាច្រើនគ្រឿងបានទៅដល់ និងបាញ់ទឹកទប់ស្កាត់អណ្តាតភ្លើងកំុឱ្យឆាបឆេះរាលដាលខ្លាំង ។ ប៉ុន្តែ បើទេាះជាមានការខិតខំប្រឹងប្រែងពីកម្លាំងអជ្ញាធរនិងមន្ត្រីអគ្គិភ័យយ៉ាងណាក៏ដោយ ក៏ភ្លើងបានលេបត្របាក់លំនៅឋានអស់ជាច្រើនខ្នងជាបន្តបន្ទាប់ទៅហើយដែរ ។
នាយការិយាល័យនគរបាលបង្ការនិងពន្លត់អគ្គិភ័យរាជធានីភ្នំពេញ លោកវរសេនីយ៍ឯក ព្រហ្ម យ៉ន ឱ្យដឹងថា ក្នុងគ្រោះអគ្គិភ័យខាងលើនេះ កម្លាំងពន្លត់អគ្គិភ័យមានការលំបាកខ្លាំងបំផុតក្នុងការធ្វើអន្តរាគមន៍បាញ់ទឹកពន្លត់ ព្រេាះច្រកផ្លូវនៅទីនេាះមានសភាពតូចចង្អៀតទាំងផ្លូវក្រៅនិងផ្លូវក្នុង មិនអាចឱ្យរថយន្តពន្លត់អគ្គិភ័យចូលទៅបាញ់ទឹកបានទាន់ពេល ។ ទម្រាំតែកម្លាំងជំនាញតទុយោចូលទៅដល់កន្លែងកើតហេតុ គឺអណ្តាតភ្លើងបានឆាបឆេះខ្លាំងណាស់ទៅហើយ ។
លោកនាយការិយាល័យបន្តថា ប៉ុន្តែបើទេាះបីជាមានការឆាបឆេះខ្លាំងយ៉ាងណាក៏ដោយ ក៏កម្លាំងជំនាញ ដោយមានការសហការល្អពីអាជ្ញាធរមូលដ្ឋាន បានព្យាយាមបាញ់ទឹកពន្លត់អណ្តាតភ្លើងឱ្យរលត់សូន្យសុងទៅវិញ១០០ភាគរយ ដោយចំណាយពេលប្រមាណ១ម៉ោង និងប្រើប្រាស់រថយន្តពន្លត់អគ្គិភ័យ២៧គ្រឿង ក្នុងនេាះ៥គ្រឿងមកពីអាវុធហត្ថរាជធានីភ្នំពេញ និង២២គ្រឿងមកពីស្នងការដ្ឋាននគរបាលរាជធានីភ្នំពេញ ។
អភិបាលរងខណ្ឌមានជ័យ លោកឌី រ័ត្នខេមរុណ ឱ្យដឹងថា លំនៅឋានចំនួន២២ខ្នងដែលត្រូវអគ្គិភ័យលេបត្របាក់នេះ មានប្រជាពលរដ្ឋរស់នៅ៣៣គ្រួសារ និងមានទ្រព្យសម្បត្តិបងប្អូនមួយចំនួនធំទៀតត្រូវបាត់បង់ជាមួយផ្ទះ ។ប៉ុន្តែយ៉ាងណាក៏ដោយ ពំុមានមនុស្សណាម្នាក់រងរបួសឬគ្រេាះថ្នាក់ដល់អាយុជីវិតទេ នៅក្នុងគ្រោះមហន្តរាយនេះ ។ ឯចំពោះមូលហេតុនៃការឆាបឆេះ សមត្ថកិច្ចជំនាញពំុទាន់អាចបញ្ជាក់បាននៅឡើយទេ ដោយរង់ចាំធ្វើកោសល្យវិច័យនៅពេលក្រោយ ៕
ចែករំលែកព័តមាននេះ