រាជធានីភ្នំពេញ ៖ តាមប្រភពព័ត៌មានបឋម កាលពីព្រឹកថ្ងៃទី២១ ខែមិថុនា នៅសាលាដំបូងរាជធានីភ្នំពេញត្រូវបានគេដឹងថា មានបង្កើតគណៈកម្មការមួយដើម្បីត្រួតពិនិត្យ ប្រគល់ និង ទទួលកញ្ចប់វត្ថុតាងគ្រឿងញៀនចំនួនជិត៦០គីឡូក្រាម ដើម្បីត្រៀមដុតបំផ្លាញចោលនាថ្ងៃទី២៦ ខែមិថុនាខាងមុខនេះ ដែលរៀបចំឡើងនៅកោះពេជ្រ ក្នុងទិវាអន្តរជាតិប្រយុទ្ធប្រឆាំងគ្រឿងញៀន ។ ប្រភពព័ត៌មានពីមន្ត្រីសាលាដំបូងរាជធានីភ្នំពេញ បានឲ្យដឹងថា ពិធីនេះធ្វើឡើងដោយលោក តុប ឈុនហេង អនុប្រធានសាលាដំបូង ដោយមានការអនុញ្ញាតពីលោក តាំង ស៊ុនឡាយ ប្រធានសាលាដំបូងរាជធានីភ្នំពេញផងដែរ ។
កញ្ចប់គ្រឿងញៀនជិត៦០គីឡូក្រាមនេះ គណៈកម្មការដែលមានលោក តុប ឈុនហេង ដឹកនាំ ត្រូវបានប្រគល់ជូនទៅលោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ និងលោកឧត្តសេនីយ៍ទោ សាន សុទ្ធី អនុប្រធានមន្ទីរប្រយុទ្ធប្រឆាំងគ្រឿងញៀន និងមន្ត្រីពាក់ព័ន្ធ ទទួលយករក្សាទុក ដើម្បីដុតបំផ្លាញចោលនៅថ្ងៃទី២៦ ខែមិថុនាខាងមុខ ។មន្ត្រីសាលាដំបូងនិយាយថា គ្រឿងញៀនជិត៦០គីក្រាមនេះមានចំនួន៤ទៅ៥ប្រភេទ ដែលសមត្ថកិច្ចមន្ទីរប្រឆាំគ្រឿងញៀន បានធ្វើការបង្ក្រាបនៅចុងឆ្នាំ២០១៧ និងរហូតមកដល់ពាក់កណ្តាលឆ្នាំ២០១៨នេះ ។ ថ្នាំញៀននេះ ត្រូវបានសមត្ថកិច្ចចាប់យកពីជនល្មើស ដែលបានប្រគល់ជូនតុលាការចាត់ការតាមផ្លូវច្បាប់រួចអស់ហើយ ហើយមានសំណុំរឿងខ្លះបានតតាំងក្តីរហូតដល់តុលាការកំពូល និងមានសាលដីកាស្ថាពរទៀតផង ។
ឯសំណុំរឿងខ្លះទៀត នៅសាលាដំបូងរាជធានីភ្នំពេញ និងសាលាឧទ្ធរណ៍ ក៏ប៉ុន្តែមានសាលដីកានិងសាលក្រមស្ថាពរដូចគ្នា ដូច្នេះហើយបានជាសាលាដំបូងរាជធានីភ្នំពេញ បង្កើតគណៈកម្មការប្រគល់និង ទទួលសម្រាប់ដុតបំផ្លាញចោលនាពេលឆាប់ៗខាងមុខនេះ ៕
ចែករំលែកព័តមាននេះ