រាជធានីភ្នំពេញ៖ ផលិតផលធ្វើពីដីដូចជាក្អម ឆ្នាំង ពែង ថូ និងវត្ថុផ្សេងៗជាច្រើនទៀតត្រូវគេដាក់តាំងបង្ហាញនៅសណ្ឋាគារអីុនធើរកុងទីណង់តាល់ រាជធានីភ្នំពេញ កាលពីថ្ងៃទី២ មីនា ដែលរៀបចំធ្វើឡើងដោយគម្រោង Cambodia Traditional pottery Project ដើម្បីបង្ហាញពីស្នាដៃរបស់ខ្មែរក្នុងការកែច្នៃរូបរាងថ្មី និងប្លែកដែលមើលទៅគួរឱ្យទាក់ភ្នែក ។
រាជធានីភ្នំពេញ៖ ផលិតផលធ្វើពីដីដូចជាក្អម ឆ្នាំង ពែង ថូ និងវត្ថុផ្សេងៗជាច្រើនទៀតត្រូវគេដាក់តាំងបង្ហាញនៅសណ្ឋាគារអីុនធើរកុងទីណង់តាល់ រាជធានីភ្នំពេញ កាលពីថ្ងៃទី២ មីនា ដែលរៀបចំធ្វើឡើងដោយគម្រោង Cambodia Traditional pottery Project ដើម្បីបង្ហាញពីស្នាដៃរបស់ខ្មែរក្នុងការកែច្នៃរូបរាងថ្មី និងប្លែកដែលមើលទៅគួរឱ្យទាក់ភ្នែក ។
លោកស្រី Yumazaki Yukie អ្នកគ្រប់គ្រងគម្រោងជាជនជាតិជប៉ុនមានប្រសាសន៍ថា ដោយសារតែប្រជាពលរដ្ឋកម្ពុជា ជាពិសេស នារីៗខ្មែរមានស្នាដៃគ្រប់គ្រាន់ក្នុងការបង្ហាញឱ្យគេឃើញថា រាល់ផលិតផលទាំងអស់របស់ពួកគាត់ពិតជាអាចចូលទៅក្នុងទីផ្សារបានទើបគម្រោងដាក់តាំងបង្ហាញជាសាធារណៈនៅក្នុងសណ្ឋាគារអីុនធើរកុងទីណង់តាល់នេះ ។ ផលិតផលកុលាលភាជន៍ទាំងអស់នេះគឺសុទ្ធតែជាផលិតផលរបស់ខេត្តកំពង់ឆ្នាំងដែលនារីៗនៅក្នុងខេត្តនោះខិតខំកែច្នៃ ដើម្បីឱ្យមានសោភ័ណភាពល្អ និងស្អាតឡើង ។
លោកស្រីបន្តថា ភ្ជាប់ជាមួយនឹងការតាំងបង្ហាញពិព័រណ៍នេះដោយសារគម្រប់ខួបពីរឆ្នាំ នៃការរងគ្រោះដ៏ធំនៅប្រទេសជប៉ុនដោយរលកយក្សស៊ូណាមីដែលធ្វើឱ្យប្រជាជនជាច្រើននាក់បានបាត់បង់ជីវិត និងខូចខាតទ្រព្យសម្បត្តិយ៉ាងច្រើនសន្ធឹកសន្ធាប់ កាលពីថ្ងៃទី១១មីនា ២០១១ កន្លងមកយើងមានបំណងនឹងលក់ផលិតទាំងអស់នេះដើម្បីបានថវិកាខ្លះៗយកទៅជួយជនរងគ្រោះ។ ទោះបីជាប្រទេសជប៉ុនជាប្រទេសធំជាងកម្ពុជាក៏ដោយ កម្ពុជាក៏អាចជួយឧបត្ថម្ភដល់ប្រទេសជប៉ុនបានដែរទៅតាមលទ្ធភាពដូចជាតាមរយៈផលិតផលទាំងអស់នេះក្ដីគឺនារីៗនៅខេត្តកំពង់ឆ្នាំងជាអ្នកផលិត និងយកទៅលក់នៅក្នុងទីផ្សារផ្សេងៗ ។ ផលិតផលទាំងអស់នេះបន្ទាប់ពីបានទទួលការគាំទ្រនៅក្នុងទីផ្សារប្រទេសកម្ពុជាហើយនោះ តាមគម្រោងនឹងយកនាំចេញទៅប្រទេសក្រៅថែមទៀត ហើយបើកាលណាអាចនាំចេញទៅក្រៅបាននោះនឹងធ្វើឱ្យផលិតផលរបស់ខ្មែរកាន់តែល្បីដោយសារមានគេស្គាល់ច្រើន ។
លោកស្រីYumazaki Yukie បន្ថែមទៀតថា កំពង់ឆ្នាំងគឺជាខេត្តមួយដែលមានឈ្មោះល្បីល្បាញខាងផលិតផលកុលាលភាជន៍ជាសម្ភារដែលធ្វើឡើងពីដីនៅក្នុងព្រះរាជាណាចក្រកម្ពុជា ។ នៅក្នុងភូមិកុម្ភការីបានទទួលការបណ្ដុះបណ្ដាលជំនាញស្មូនដីពីអ្នកជំនាញការមកពីប្រទេសជប៉ុន ដើម្បីបង្កើតកេរ្តិ៍ឈ្មោះថ្មីរបស់ខ្លួន ហៅថាកុលាលភាជន៍កំពង់ឆ្នាំង ។ វត្ថុធាតុដើម និងសម្ភារទាំងអស់សុទ្ធតែជាធនធានធម្មជាតិពិតៗនៅក្នុងខេត្តកំពង់ឆ្នាំង ។
នៅល្ងាចថ្ងៃនោះមានកម្មវិធីពិសេសគឺការលក់ដេញថ្លៃស្នាដៃពិសេសៗដើម្បីធ្វើជាសកម្មភាពសប្បុរសធម៌សម្រាប់ជួយដល់អ្នករងគ្រោះដោយគ្រោះមហន្តរាយពីរលកយក្សស៊ូណាមីនៅតំបន់ឦសានប្រទេសជប៉ុនកាលពីពីរឆ្នាំមុន ៕
ចែករំលែកព័តមាននេះ