ខេត្តកែប ៖ យ៉ាងហោចណាស់ក៏មានមនុស្សស្លាប់២នាក់ និងរបួសធ្ងន់ម្នាក់ដែរ នៅក្នុងហេតុការណ៍គ្រោះថ្នាក់ចរាចរណ៍មួយ កាលពីវេលាម៉ោង៨និង៣០នាទីយប់ថ្ងៃទី១៩ ខែមិថុនា ឆ្នាំ ២០១៨ ត្រង់ចំណុចផ្លូវកោង…
ខេត្តកែប ៖ យ៉ាងហោចណាស់ក៏មានមនុស្សស្លាប់២នាក់ និងរបួសធ្ងន់ម្នាក់ដែរ នៅក្នុងហេតុការណ៍គ្រោះថ្នាក់ចរាចរណ៍មួយ កាលពីវេលាម៉ោង៨និង៣០នាទីយប់ថ្ងៃទី១៩ ខែមិថុនា ឆ្នាំ ២០១៨ ត្រង់ចំណុចផ្លូវកោង ស្ថិតក្នុងភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប លើកំណាត់ផ្លូវជាតិលេខ៣៣ បង្កឡើងរវាងរថយន្ត និងម៉ូតូសេ១២៥ បុកគ្នាក្នុងទិសដៅបញ្ជ្រាសទិសគ្នា ។
តាមសេចក្តីរាយការពីកន្លែងកើតហេតុបានឲ្យដឹងថា មុនពេលកើតហេតុគេឃើញម៉ូតូម៉ាកសេ១២៥ ពណ៌ខៀវ គ្មានស្លាកលេខ បើកបរក្នុងទិសដៅពីកើតទៅលិច ដោយមានដឹកអ្នករួមដំណើរ២នាក់ពីក្រោយផង លុះមកដល់ចំណុចកើតហេតុក៏ស្រាប់ឃើញរថយន្តម៉ាកហ៊ីយ៉ាន់ដាយ ពណ៌ស គ្មានស្លាកលេខ បានបើកបរយ៉ាងលឿនក្នុងទិសដៅបញ្ជ្រាសគ្នាក៏បានរេចង្កូតបុកម៉ូតូចំពីមុខពេញទំហឹង បណ្តាលឲ្យអ្នកបើកម៉ូតូ និងអ្នករួមដំណើរម្នាក់បានស្លាប់ភ្លាមៗនៅកន្លែងកើតហេតុ (សរុបស្លាប់២នាក់) និងអ្នករួមដំណើរម្នាក់ទៀតខាងម៉ូតូបានរងរបួសធ្ងន់ត្រូវបានសមត្ថកិច្ចយករថយន្តសង្គ្រោះរបស់ស្នងការខេត្តដឹកទៅសង្គ្រោះនៅមន្ទីរពេទ្យបង្អែកខេត្តកែប ។
សមត្ថកិច្ចនគរបាលចរាចរណ៍ស្រុកដំណាក់ចង្អើរដែលចុះទៅអន្តរាគមន៍ក្នុងហេតុការគ្រោះថ្នាក់ចរាចរណ៍ខាងលើបានឲ្យដឹងថា ជនរងគ្រោះដែលជាអ្នកបើកម៉ូតូមានឈ្មោះ សាយ សារុន ភេទប្រុស អាយុ៥៣ឆ្នាំ មុខរបរកសិករ មានទីលំនៅភូមិកំពង់ត្នោត ឃុំកូនសត្វ ស្រុកទឹកឈូ ខេត្តកំពត (បានស្លាប់) និងអ្នករួមដំណើរពីរនាក់ ទី១- ឈ្មោះ វឿន សុភគ្រ័ ភេទប្រុស អាយុ៣៤ឆ្នាំ (ស្លាប់នៅកន្លែងកើតហេតុ) មានទីលំនៅភូមិអូក្រសារ សង្កាត់អូក្រសារ ក្រុងកែប ខេត្តកែប និងទី២ – ឈ្មោះ ឆឹង អឿន ភេទប្រុស អាយុ៥៤ឆ្នាំ មានទីលំនៅភូមិអំពេង ឃុំអង្កោល ស្រុកដំណាក់ចង្អើរ ខេត្តកែបបានរងរបួសធ្ងន់ ។
សមត្ថកិច្ចឲ្យដឹងទៀតថា មូលហេតុនៃគ្រោះថ្នាក់ខាងលើដោយសាររថយន្តមិនប្រកាន់ស្តាំ ហើយក្រោយពេលកើតហេតុអ្នកបើកបររថយន្តបានរត់គេចខ្លួនបាត់ បន្សល់ទុករថយន្តនៅកន្លែងកើតហេតុ ។ ក្រោយពីពិនិត្យវាស់វែងរួចសពត្រូវបានសមត្ថកិច្ចប្រគល់ឲ្យក្រុមគ្រួសារយកទៅរៀបចំធ្វើបុណ្យតាមប្រពៃណី រីឯអ្នករងរបួសត្រូវបានដឹកទៅសង្គ្រោះ ។
ចំណែករថយន្តបង្ក និងម៉ូតូរងគ្រោះត្រូវបាននាំទៅរក្សាទុកនៅអធិការដ្ឋានស្រុកដំណាក់ចង្អើរ រង់ចាំភាគីខាងរថយន្ត និងគ្រួសារខាងជនរងគ្រោះចូលខ្លួនមកដោះស្រាយគ្នាតាមផ្លូវច្បាប់នៅពេលក្រោយ ៕
ចែករំលែកព័តមាននេះ