ខេត្តកំពង់ស្ពឺ ៖ បុរសម្នាក់ត្រូវបានសមត្ថកិច្ចឃាត់ខ្លួន បន្ទាប់ពីប្រើហិង្សាដាក់លើប្រពន្ធខ្លួន ព្រោះតែប្រចណ្ឌជាមួយពួកម៉ាក ហេតុការណ៍កើតឡើងកាលពីម៉ោង១និង៣០នាទីរសៀលថ្ងៃទី១៨ ខែមិថុនា ឆ្នាំ២០១៨ នៅត្រង់ចំណុចដីឡូផ្ទះជនរងគ្រោះ ស្ថិតក្នុងភូមិដូនទិព្វ…
ខេត្តកំពង់ស្ពឺ ៖ បុរសម្នាក់ត្រូវបានសមត្ថកិច្ចឃាត់ខ្លួន បន្ទាប់ពីប្រើហិង្សាដាក់លើប្រពន្ធខ្លួន ព្រោះតែប្រចណ្ឌជាមួយពួកម៉ាក ហេតុការណ៍កើតឡើងកាលពីម៉ោង១និង៣០នាទីរសៀលថ្ងៃទី១៨ ខែមិថុនា ឆ្នាំ២០១៨ នៅត្រង់ចំណុចដីឡូផ្ទះជនរងគ្រោះ ស្ថិតក្នុងភូមិដូនទិព្វ ឃុំប្រាំបីមុម ស្រុកថ្ពង។
បើតាមសមត្ថកិច្ចបានឱ្យដឹងថា ជនបង្កជាប្តីខាងលើឈ្មោះ សឿន សុន ហៅអីក អាយុ៣៨ឆ្នាំ មុខរបរកសិករ ចំណែកប្រពន្ធឈ្មោះ ហំ អិត អាយុ២៩ឆ្នាំ មុខរបរកសិករ មានកូនស្រី២នាក់ក្នុងបន្ទុក។ រីឯមិត្ត២នាក់មាន ១-ឈ្មោះ ឃឹង សែម ភេទប្រុស អាយុ៤៥ឆ្នាំ និង២-ឈ្មោះ សៅ ភេទប្រុស អាយុ២៨ ឆ្នាំអ្នកទាំង២រស់នៅភូមិជាមួយគ្នា ។
តាមការរៀបរាប់របស់ស្ត្រីរងគ្រោះឱ្យដឹងថា ដំបូងបុរសជាប្តីបានទិញស្រា.ស១លីត្រកន្លះមកផឹកជាមួយពួកម៉ាករបស់គាត់២នាក់ លុះផឹកអស់ប្តីស្រវឹងក៏កើតជារឿងប្រចណ្ឌប្រពន្ធជាមួយឈ្មោះ ឃឹម សែមថា លួចសាហាយស្មន់នឹងគ្នា តែនាងបដិសេធថា មិនពិតនោះទេ។ ហើយទោះជានាងបដិសេធយ៉ាងណាក៏ប្តីនៅតែចោទដដែលរហូតទាស់ពាក្យសំដីជាមួយនាងបាន វាយចានឆ្នាំងចោលគ្មានសល់ ។ ដោយឃើញដូច្នេះនាងក៏នាំកូនមកផ្ទះម្តាយបង្កើតនៅក្បែរនោះ ស្រាប់តែប្តីមកតាមរករឿងដល់ផ្ទះម្តាយទៀតផង។
តាមប្រភពពីសមត្ថកិច្ចឱ្យដឹងនៅរសៀលថ្ងៃទី១៩ មិថុនាផងដែរថា បុរសជាប្តីនេះមិនត្រឹនមតែវាយបំផ្លាញទ្រព្យសម្បត្តិប៉ុណ្ណោះទេ នៅយកដំបងគល់ឈើប្រវែង 36Cm តាមវ៉ៃប្រពន្ធដល់ផ្ទះម្តាយ បណ្តាលឲ្យរបួសខ្នងជាទម្ងន់ទៀតផង។ ក្រោយមកស្ត្រីរងគ្រោះត្រូវបានបញ្ជូនទៅមន្ទីរពេទ្យបង្អែកភ្លាមៗ ដើម្បីសង្គ្រោះ ចំណែកជនបង្កត្រូវបាននាំខ្លូនមកអធិការដ្ឋាននគបាលស្រុកថ្ពង ដើម្បីកសាងសំណុំរឿងបញ្ជូនទៅឲ្យការិយាល័យប្រឆាំងការជួញដូរ និងការពារអនីតិជនខេត្តចាត់ការបន្តតាមច្បាប់ ។ ហើយនៅចំពោះមុខសមត្ថកិច្ចជនបង្កនោះសារភាពថា ខ្លួនពិតជាបានវាយបំផ្លាញទ្រព្យសម្បត្តិក្នុងផ្ទះ និងវាយប្រពន្ធពិតមែន គឺដោយសារតែខ្លួនស្រវឹងស្រាហើយប្រចណ្ឌប្រពន្ឋជាមួយពួកម៉ាករបស់ខ្លួន។
ចែករំលែកព័តមាននេះ