ក្រោមក្រសែភ្នែកទស្សនិកជនរាប់ម៉ឺននាក់នៅថ្ងៃប្រារព្ធពិធីបើកមហាព្រឹត្តិការណ៍World Cup 2018 ក្នុងពហុកីឡដ្ឋាន Luzhniki ទីក្រុងម៉ូស្គូ ប្រទេសរុស្ស៊ី កាលពីថ្ងៃទី១៤ មិថុនាកន្លងទៅ គេសង្កេតឃើញវត្តមានកំពូលតារាចម្រៀង…
ក្រោមក្រសែភ្នែកទស្សនិកជនរាប់ម៉ឺននាក់នៅថ្ងៃប្រារព្ធពិធីបើកមហាព្រឹត្តិការណ៍World Cup 2018 ក្នុងពហុកីឡដ្ឋាន Luzhniki ទីក្រុងម៉ូស្គូ ប្រទេសរុស្ស៊ី កាលពីថ្ងៃទី១៤ មិថុនាកន្លងទៅ គេសង្កេតឃើញវត្តមានកំពូលតារាចម្រៀង Pop ដ៏ល្បីរបស់អង់គ្លេសលោក Robbie Williams និងកញ្ញា Aida Garifullina ជាអ្នកចម្រៀងអូប៉េរ៉ារបស់រុស្ស៊ី ចេញមកអង្រួនបរិយាកាសដ៏ឱឡារិកនេះ ឱ្យរឹតតែកក្រើកថែមទៀត ។
បន្ទាប់មកជាការបង្ហាញខ្លួនរបស់អគ្គរដ្ឋទូតរបស់ FIFA និងអតីតបវរកញ្ញារុស្ស៊ីនាង Vctoria Lopyreva កាន់បាល់សម្រាប់ការប្រកួតផ្លូវការក្នុងថ្ងៃបើកឆាកនេះ ខណៈអតីតវីរបុរសប្រេស៊ីលលោក Ronaldo ចេញមកស្វាគមន៍ទស្សនិកជន អមជាមួយនឹងរូបតំណាងព្រឹត្តិការណ៍ Zabivaka ។
ជាកិច្ចបន្ទាប់ ក្រោយពិធីអបអរព្រឹត្តិការណ៍នេះបានកន្លងទៅប្រមាណ១៥នាទី ប្រធានាធិបតីរុស្ស៊ីលោក វ៉្លាឌីមៀរ ពូទីន មានប្រសាសន៍ទៅកាន់អ្នកគាំទ្រទូទៅ ក៏ដូចជាកីឡាករគ្រប់រូបជាមួយនឹងទឹកមុខរីករាយថា «រុស្ស៊ីស្រឡាញ់ និងចូលចិត្តកីឡាបាល់ទាត់ ចាប់តាំងពីរុស្ស៊ីធ្វើជាម្ចាស់ផ្ទះការប្រកួតនៅក្នុងឆ្នាំ១៨៩៧មកម៉្លេះ» ។ ជាមួយគ្នានេះដែរ ប្រធាន FIFA លោក GianniInfantino ក៏បានថ្លែងយ៉ាងខ្លីក្នុងថ្ងៃបើកឆាកនេះផងដែរថា «ប្រិយមិត្តជាទីស្រឡាញ់ ! សូមស្វាគមន៍មកកាន់ការប្រកួតបាល់ទាត់ពិភពលោក World Cup!» ។
មុនចាប់ផ្តើមការប្រកួត ក៏មានវត្តមានអ្នកចាំទីក្រុមជម្រើសជាតិអេស្ប៉ាញកីឡាករ Casillas រួមដំណើរជាមួយតារាម៉ូដែលនាង Natalia Vodianova ដង្ហែពាន World Cup ចូលទីលានប្រកួត ដើម្បីឱ្យទស្សនិកជនទាំងអស់បានឃើញពានរង្វាន់ផ្ទាល់ភ្នែក ។ មិនត្រឹមតែប៉ុណ្ណោះ ក៏មានការបាញ់កាំជ្រួចយ៉ាងច្រើនសន្ធឹកសន្ធាប់ជាការអបអរសាទរព្រឹត្តិការណ៍បាល់ទាត់លំដាប់ពិភពលោកលើកទី២១ក្នុងប្រវត្តិសាស្ត្រ World Cup ផងដែរ ។
គួររំលឹកថា ការប្រកួតនៅថ្ងៃបើកឆាកមុនដំបូងគេនេះ គឺជាប៉ះគ្នារវាងក្រុមម្ចាស់ផ្ទះរុស្ស៊ី និងក្រុមអារ៉ាប៊ីសាអូឌីត ហើយក្រុមរុស្ស៊ីបានលត់គូប្រកួតយ៉ាងចាស់ដៃក្នុងលទ្ធផល៥ទល់០ នៅមុខអ្នកគាំទ្រប្រមាណ៨ម៉ឺននាក់ ៕
ចែករំលែកព័តមាននេះ