រាជធានីភ្នំពេញ ៖ អាជ្ញាធរខណ្ឌដូនពេញបានធ្វើពិធីប្រកាសតែងតាំងលោកម៉ុក ច័ន្ទករុណា ជាអភិបាលរងខណ្ឌដូនពេញជំនួសលោកឈឹម ឌីណា ដែលត្រូវចូលនិវត្ដន៍ ។ ពិធីប្រកាសតែងតាំង និងផ្ទេរភារកិច្ចនេះធ្វើឡើងនៅព្រឹកថ្ងៃទី១៤…
រាជធានីភ្នំពេញ ៖ អាជ្ញាធរខណ្ឌដូនពេញបានធ្វើពិធីប្រកាសតែងតាំងលោកម៉ុក ច័ន្ទករុណា ជាអភិបាលរងខណ្ឌដូនពេញជំនួសលោកឈឹម ឌីណា ដែលត្រូវចូលនិវត្ដន៍ ។ ពិធីប្រកាសតែងតាំង និងផ្ទេរភារកិច្ចនេះធ្វើឡើងនៅព្រឹកថ្ងៃទី១៤ មិថុនា ២០១៨ ក្រោមអធិបតីភាពលោក ឃួង ស្រេងអភិបាលរាជធានីភ្នំពេញ និងមន្ត្រីក្រោមឱវាទរដ្ឋបាលរាជធានីភ្នំពេញជាច្រើនរូបទៀត ។
លោកឃួង ស្រេងអភិបាលរាជធានីភ្នំពេញបានលើកឡើងថា ក្នុងនាមមន្ដ្រីបម្រើការងារនៅសាលាខណ្ឌ និងក្នុងនាមជាមន្ត្រីចំណុះឲ្យរដ្ឋបាលខណ្ឌដែលជាអាណាព្យាបាលនៅមូលដ្ឋាន ត្រូវបំពេញការងារជូនប្រជាពលរដ្ឋឲ្យបានល្អ ជាពិសេសលោកម៉ុកច័ន្ទករុណាដែលទើបតែងតាំងថ្មី ត្រូវយកចិត្តទុកដាក់ប្រកបដោយជោគជ័យ និងសហការ សាមគ្គីភាពឲ្យបានល្អ ដើម្បីជំរុញការបម្រើសេវាសាធារណៈឲ្យទទួលបានការគាំទ្រមានជំនឿជឿទុកចិត្តមកលើអាជ្ញាធរមូលដ្ឋាន ។
លោកបន្តថា ដើម្បីសម្រេចភារកិច្ចនេះឱ្យបានល្អ មន្ដ្រីដែលទើប និងទទួលភារកិច្ចថ្មីត្រូវខិតខំ គោរពប្រតិបត្ដិ តាមផែនការការងារច្បាស់លាស់ និងចំគោលដៅ ដើម្បីអនុវត្តន៍ដោយរក្សាឱ្យបាននូវសាមគ្គីភាពផ្ទៃក្នុង និងមានកិច្ចសហប្រតិបត្តិការល្អជាមួយស្ថាប័ន អង្គភាពពាក់ព័ន្ធជាពិសេសប្រជាពលរដ្ឋជាមួយអាជ្ញាធរដែនដីខណ្ឌសង្កាត់ ។ លោកឃួង ស្រេងបានណែនាំដល់ថ្នាក់ដឹកនាំក៏ដូចជា អាជ្ញាធរគ្រប់លំដាប់ថ្នាក់ត្រូវរួមគ្នាសម្រេចរាល់កិច្ចការដែលរាជរដ្ឋាភិបាល បានប្រគល់ជូន ដោយអនុវត្តន៍ឱ្យបានជាក់ស្ដែងនូវការកែទម្រង់ស៊ីជម្រៅ លើគ្រប់វិស័យ របស់រាជរដ្ឋាភិបាលដែលមានអភិបាលកិច្ចល្អជាស្នូលដោយអនុវត្តន៍តាមពាក្យស្លោកបម្រើ ប្រជាពលរដ្ឋឱ្យកាន់តែល្អប្រសើរឡើង គឺដើម្បីសុខុមាលភាពរបស់ប្រជាពលរដ្ឋ និងវិបុលភាពប្រទេសជាតិ ។
លោកម៉ុក ច័ន្ទករុណាទើបប្រកាសតែងតាំងថ្មីបានប្ដេជ្ញា និងសន្យាថាលោកនឹងយកអស់កម្លាំងកាយចិត្តបម្រើការងារជូនប្រជាពលរដ្ឋ និងបង្កើនការងាររបស់ខ្លួនឲ្យបានទ្វេដង ដើម្បីអនុវត្ដការងារគោលនយោបាយភូមិសង្កាត់មានសុវត្ថិភាព ពិសេសរក្សាសាមគ្គីភាពផ្ទៃក្នុងឲ្យបានល្អជាមួយគ្នា និងខិតខំបំពេញលើការងារឲ្យកាន់តែល្អជូនប្រជាពលរដ្ឋ ៕
ចែករំលែកព័តមាននេះ