ខេត្តកំពង់ឆ្នាំង ៖ លោកម៉ឹង ពន្លកប្រធានសមាគមចលនាយុវជនកម្ពុជា(ក.១៥៧) នៅព្រឹកថ្ងៃទី១៣ ខែមិថុនា ឆ្នាំ២០១៨នេះបានចាត់តាំងឲ្យក្រុមការងារ សហការជាមួយសប្បុរសជន និងសមាជិកសហភាពសហព័ន្ធយុវជនកម្ពុជា(សសយក) និងអាជ្ញាធរមូលដ្ឋានចុះចែកអំណោយមនុស្សធម៌ជូនប្រជាពលរដ្ឋ៥០០គ្រួសារ ស្ថិតនៅក្នុងឃុំសែប ស្រុកកំពង់ត្រឡាច ខេត្តកំពង់ឆ្នាំង ។
ក្នុងឱកាសនោះដែរលោកស៊ុន សុវណ្ណារិទ្ធអភិបាលរងខេត្តកំពង់ឆ្នាំងជំនួសមុខដល់ប្រជាពលរដ្ឋចំនួន៥០០គ្រួសារបានថ្លែងអំណរគុណចំពោះក្រុមគ្រួសារលោកតាន់ ទ្រីដែលជាអាជីវករនៅរាជធានីភ្នំពេញបានបរិច្ចាគថវិកាផ្ទាល់ខ្លួនជាអំណោយមនុស្សធម៌ជូនប្រជាពលរដ្ឋ ហើយក៏ថ្លែងអំណរគុណដល់បងប្អូនសមាជិកក្រុម១៥៧ និងក្រុម(សសយក) ដែលបានអញ្ជើញចូលរួមក្នុងសកម្មភាពមនុស្សធម៌នេះ ។
លោកស៊ុន សុវណ្ណារិទ្ធបានបន្តថា អ្វីដែលក្រុមគ្រួសារលោកតាន់ ទ្រី និងលោក តាន់ វណ្ណាបាននឹងកំពុងធ្វើ គឺជាការចូលរួមជាមួយរាជរដ្ឋាភិបាលកម្ពុជាក្នុងការជួយកាត់បន្ថយភាពក្រីក្រក៏ដូចជា ជួយសម្រួលដល់ជីវភាពរបស់បងប្អូនប្រជាពលរដ្ឋផងដែរ ។ ជាមួយគ្នានោះដែរលោកវ៉ាន់ សាន ដែលជាសមាជិកសមាគមចលនាយុវជនកម្ពុជា(ក.១៥៧)បានថ្លែងថា ជំនួសមុខលោកម៉ឹង ពន្លកប្រធាន ក.១៥៧ សូមថ្លែងអំណរគុណដល់ក្រុមគ្រួសារលោកតាន់ ទ្រី ដែលបានផ្តល់អំណោយមនុស្សធម៌ជូនបងប្អូនប្រជាពលរដ្ឋ កាយវិការនេះ គឺជាការរួមចំណែកក្នុងការជួយកាត់បន្ថយភាពក្រីក្រជាមួយរាជរដ្ឋាភិបាល ។
លោកវ៉ាន់ សានបានបន្តថា ចំពោះសកម្មភាពមនុស្សធម៌នេះលោកម៉ឹង ពន្លក ដែលជាប្រធាន ក.១៥៧ សូមសម្តែងការគាំទ្រយ៉ាងពេញទំហឹង ហើយក៏អំពាវនាវដល់សប្បុរសជនផ្សេងៗទៀតសូមចូលរួមចំណែកក្នុងសកម្មភាពមនុស្សធម៌ និងជួយកិច្ចការសង្គមតាមលទ្ធភាពដែលអាចធ្វើបានទោះតិចក្តីច្រើនក្តី ដើម្បីប្រយោជន៍ប្រជាពលរដ្ឋ និងជាតិមាតុភូមិ ៕
ចែករំលែកព័តមាននេះ