ខេត្តបន្ទាយមានជ័យ ៖ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មបានថ្លែងថា ៖« យើងត្រូវនាំគ្នាលើកកម្ពស់ផលិតផលខ្មែរ ដើម្បីជួយដល់ជីវភាពបងប្អូនប្រជាពលរដ្ឋខ្មែរ » ។ លោករដ្ឋមន្ត្រីបានថ្លែងបែបនេះនៅក្នុងពិធីតាំងពិព័រណ៍ពាណិជ្ជកម្ម ដែលបានរៀបចំឡើងនៅក្រុងសិរីសោភ័ណ កាលពីថ្ងៃទី៨ មិថុនា កន្លងមក ។
លោករដ្ឋមន្ត្រីបន្ដថា ការតាំងពិព័រណ៍ពាណិជ្ជកម្មផលិតផលខ្មែរនាឱកាសនេះ គឺជាយុទ្ធនាការទិញផលិតផលខ្មែរទូទាំងប្រទេសកម្ពុជា ដើម្បីជួយលើកកម្ពស់ផលិតផលក្នុងស្រុក និងសូមអំពាវនាវដល់បងប្អូនប្រជាពលរដ្ឋត្រូវលើកកម្ពស់និងគាំទ្រផលិតផលខ្មែរ ដើម្បីជួយដល់ជីវភាពបងប្អូនប្រជាពលរដ្ឋ និងលើកកម្ពស់វិស័យពាណិជ្ជកម្ម ទាំងផលិតផលកសិកម្ម ឧស្សាហកម្ម និងសិប្បកម្ម និងផលិតផលផ្សេងៗទៀត ដើម្បីពង្រឹងភូមិ១ ផលិតផល១ ។
លោក លី សារី អភិបាលរងខេត្តបន្ទាយមានជ័យ មានប្រសាសន៍ថា ការរៀបចំពិព័រណ៍ពាណិជ្ជកម្មផលិតផលខ្មែរ គឺជាយុទ្ធនាការទិញផលិតផលខ្មែរ ដែលបានជំរុញវិស័យពាណិជ្ជកម្មឲ្យរីកចម្រើនជាបន្ដបន្ទាប់ ជាពិសេសការងារផលិត, ការងារទីផ្សារសម្រាប់ផលិតផលកសិកម្ម និងការគ្រប់គ្រងអាជីវកម្ម ។
លោកបន្ដថា ៖« ព្រឹត្តិការណ៍ពិព័រណ៍នេះ មានស្ដង់ផលិតផលជាង១០០ស្តង់ ក្នុងនោះមានស្តង់ខេត្តបន្ទាយមានជ័យចំនួន១១ ដោយដាក់តាំងលក់ផលិតផលខ្មែរដែលធ្លាប់តាំងពិព័រណ៍អន្តរជាតិនៅបរទេស និងត្រូវបានទទួលស្គាល់ពីអន្តរជាតិថា ផលិតផលខ្មែរមានគុណភាពគួរឲ្យកោតសរសើរ » ។
លោកបន្ដថា ៖ « ខេត្តបន្ទាយមានជ័យគឺជាខេត្តមួយនៅជាប់ព្រំដែនថៃ ហើយមានច្រកសេដ្ឋកិច្ចចំនួន៣កន្លែង រួមមាន ច្រកអន្តរជាតិប៉ោយប៉ែត, ច្រកតំបន់ព្រំដែនម៉ាឡៃ ស្រុកម៉ាឡៃ និងច្រកតំបន់ព្រំដែនបឹងត្រកួន ស្រុកថ្មពួក ។ ច្រកទាំង៣នេះមានតួនាទីសំខាន់ក្នុងការជំរុញកំណើនសេដ្ឋកិច្ច និងទំហំពាណិជ្ជកម្មរវាងប្រទេសទាំងពីរ » ៕
ចែករំលែកព័តមាននេះ