រាជធានីភ្នំពេញ ៖ លោក កោ វណ្ឌី អនុប្រធានប្រធានសាលាដំបូងរាជធានីភ្នំពេញ និងជាចៅក្រមជំនុំជម្រះរឿងក្តី មន្ត្រីនគរបាលម្នាក់ បានប្រើអំពើហិង្សាវាយទាត់ធ្លាក់មន្ត្រីចរាចរណ៍ជាប់កិច្ចសន្យា កាលពីព្រឹកថ្ងៃទី០៧ មិថុនា ២០១៨ ដោយបានប្រកាសសាលក្រមសម្រេចផ្ដន្ទាទោសដាក់ពន្ធនាគារកំណត់២ឆ្នាំ តែទោសនេះអនុវត្តពន្ធនាគារត្រឹម៦ខែ ទោសសល់ប៉ុន្មានត្រូវព្យួរសាកល្បង និងពិន័យជាប្រាក់ចំនួន៤លានរៀល បង់ចូលថវិការដ្ឋ ក្រោមការចោទប្រកាន់ ពីបទ ហិង្សាដោយចេតនាមានស្ថានទម្ងន់ទោស និង បទប្រើប្រាស់ដោយគ្មានសិទ្ធនូវសញ្ញាសម្គាល់ដែលកំណត់ដោយ អាជ្ញាធរសាធារណៈ។ ការសម្រេចនេះបើកផ្លូវឲ្យជនជាប់ចោទប្ដឹងឧទ្ធរណ៍តាមកំណត់ច្បាប់បើមិនសុខចិត្ត និង ការកាត់ក្តីរបស់សាលាដំបូងរាជធានីភ្នំពេញ។ ជនជាប់ចោទឈ្មោះ សៅ បញ្ញា អាយុ៣៣ឆ្នាំ បម្រើការងារនៅ ការិយាល័យរដ្ឋបាលសរុប នៃនាយកដ្ឋានប្រឆាំបទល្មើសបច្ចេកវិទ្យាក្រសួងមហាផ្ទៃ។
គួរបញ្ជាក់ថា រឿងក្ដីនេះមន្ត្រី ប៉ូលិសស័ក្ដ៤ ជាប់ពាក់ព័ន្ធប្រើអំពើហិង្សាធាក់ទៅមន្ត្រីប៉ូលិសចរាចរណ៍ជាប់កិច្ចសន្យា កាលពីព្រឹកថ្ងៃទី១៦ ឧសភា ២០១៨។ សវនាការនេះដឹកនាំដោយលោកចៅក្រម កោ វណ្ឌី អនុប្រធានសាលាដំបូងរាជធានីភ្នំពេញ និងលោក កុល បុន ជាតំណាងអយ្យការ។ ក្នុងសវនាការជនជាប់ចោទបានសារភាពថា ខ្លួនគេពិតជាបានធាក់មន្ត្រីប៉ូលិសចរាចរណ៍មែន ដោយសារខឹងខ្លាំងពេក។ គួររំលឹកទៀតថា ចៅក្រមស៊ើបសួរសាលាដំបូងរាជធានីភ្នំពេញលោក ពេជ្រ វិជ្ជាធរ កាលពីរសៀលថ្ងៃទី១១ មករា ២០១៨ បានសម្រេចចេញដីកាឃុំខ្លួនជនសង្ស័យឈ្មោះ សៅ បញ្ញា ដាក់ព័ន្ធនាគារជា បណ្តោះអាសន្ន ក្រោមការចោទប្រកាន់ពីសំណាក់លោក សៀង សុខ ព្រះរាជអាជ្ញារង ចំនួន២បទល្មើស ទី១.បទ ហិង្សាដោយចេតនា មានស្ថានទម្ងន់ទោស និងទី២.បទប្រើប្រាស់ដោយគ្មានសិទ្ធិនូវសញ្ញាសម្គាល់ ដែលកំណត់ ដោយអាជ្ញាធរសាធារណៈ តាមមាត្រា២១៨ និងមាត្រា៦១៤ នៃក្រមព្រហ្មទណ្ឌ។
នៅរសៀលថ្ងៃទី១០ មករា ២០១៨ មន្ដ្រីនគរបាលដែលប្រើហិង្សាលើកជើងធាក់មន្ត្រីនគរបាលចរាចរណ៍បណ្ដាលឲ្យដួលអុកគូទ ត្រូវបានកម្លាំងនគរបាល កម្រិតធ្ងន់រាជធានីភ្នំពេញ បានបញ្ជូនទៅកាន់សាលាដំបូងរាជធានីភ្នំពេញ ដើម្បីធ្វើការសាកសួរ។ អំពើហិង្សានោះបាន កើតឡើង នៅចំណុចភ្លើងស្ដុបត្រឡោកបែក ដែលនគរបាលរូបនេះ បានបើករថយន្ដម៉ាក Ford ពាក់ស្លាកលេខ ភ្នំពេញ 2AC-9099 ដោយបើកខុសច្បាប់ចរាចរណ៍ ក៏ត្រូវបានក្រុមមន្ដ្រីជាប់កិច្ចសន្យាឃាត់ ដើម្បីធ្វើការផាកវិន័យតាមច្បាប់ ចរាចរណ៍។ ប៉ុន្ដែការអនុវត្តច្បាប់បែបនេះ ធ្វើឲ្យនគរបាលនោះខឹងរហូតចុះពីលើរថយន្ដទាញកអាវអូស ថែមទាំងធាក់ចំ ដើមទ្រូងមួយជើងផ្ងារទៅក្រោយ បើទោះបីជនរងគ្រោះបានលត់ជង្គង់ និងលើកដៃគោរពក្នុងន័យបង្ហាញថា សុំទោសក៏ដោយ។ ជនរងគ្រោះត្រូវមន្ត្រីនគរបាលធាក់មួយជើងចំកណ្ដាលដើមទ្រូងបណ្ដាលដួលអុកគូទនោះ ឈ្មោះ អឿន ចំណាន ជាមន្ត្រីជាប់កិច្ចសន្យា៕
ចែករំលែកព័តមាននេះ